Batan-on sa Balut Island, gisangyawan

Sama kaanindot sa mga talan-awon sa ilang lugar nga unom ka oras ang biyahe gikan sa Digos, ang relasyon sa mga batan-on padayon nga ginapalambo.

Puno sa kadasig ang mga batan-on sa Parokya ni Santa Teresita Del Niño Jesus sa Balut Island, Sarangani, Davao Occidental nga mitambong sa gipahigayon nga Parish Youth Formation niadtong Disyembre 4-6,2015.

Gikan sa nagkadaiyang GKKs sa isla nga sakop sa parokya, nahimong malampuson ang panagtagbo tungod sa suporta sa kura paroko nga si Rev. Fr. Saturnino Andoy, DCD ug Art Vincent Daligdig (Parish Youth Coordinator).

Ang mga batan-ong lideres, madasigon nga naminaw sa mga katesismo bahin sa Ministriya sa Batan-on ug Human Trafficking nga gihatag sa Diocesan Youth Apostolate, pinangunahan ni Rev. Fr. Marvin Zamora, DCD (Diocesan Youth Director), Ms.Willybeth Salutillo (Diocesan Youth In-Charge), Ms. Vanessa Franca (Diocesan Youth Leader), ug Mr. Leowin Briones (Diocesan Youth Formator).

Kini nga pormasyon gipahigayon aron mas mapalalom ang kahibalo nila bahin sa ilang Ministriya, ang mga panglantaw ug mga tumong niini. Nindot pamalandungon nga luyo sa kalayo sa gigikanan sa mga batan-on, dili babag ang paglatas sa tubig aron lang mahiusa alang sa Ginoo. (Vanessa Franca | Sta. Cruz)