Bag-ong parokya sa Calinan, gikalipay sa kura paroko

Dakong kalipay ang gibati sa kura paroko sa Most Sacred Heart of Jesus Parish sa Calinan nga mao si Father Arnel P. Tadeo sa pagkatukod sa quasi parish sa Baguio District.

“Nagmalipayon ko kay nagtubo ang simbahan sa Calinan, mao na nga naa nay bag-ong anak…”

Sumala pa ni Fr. Tadeo ang pagkatukod sa quasi parish sa Baguio District timailhan nga nilambo ang simbahan. Gitawag siya ug “quasi parish” kay aduna siyay gamay’ng kakulangan nga kinahanglan pa tagaan ug pagtagad, una siya matawag nga “parokya.”

“Nahimo ra na siyang quasi kay aduna pay ginagmayng butang nga han-ayonon pa. Quasi parish or parish, pareha ra na sila, buot pasabot nga nagtubo ang simbahan. Gamay ra jud kalainan ana, naa siyay gamay nga kakulangan, mao na nga gihimo siya nga quasi…but the place can stand by itself already; by the order of the Archbishop naa silay ilahang mga records, mag misa na sila every day ug kada Dominggo.”

Dugang pa ni Fr. Arnel nga ang pagka-aktibo sa mga tao o sa hingtungdan sa Baguio District maoy dakong hinungdan sa pagkatukod sa maong quasi parish.

“Sama sa language ni Archbishop Valles nga ang isa ka-classroom, i-separate kay active naman kaayo ang pipila ka-grupo, mao na nga daghan nag maka-participate, kung dako kaayo ang klase, di man tanan maka-participate, naa na may certain group nga active naman kayo… para dili masayang ang ilang participation, tagaan sila ug usa ka room… sama sa bag-ong quasi Parish karon sa Baguio District.”

Ang nahisgutang quasi parish opisyal nga gideklarar sa Obispo karong adlawa, Disyembre 6 ug sa pagdeklarar niini nagpabilin ang dakong hagit sa pagtinabangay sa mga tawo aron mapadayon ang paglambo sa simbahan. (Angelika G. Calano | TMSHP Calinan SoCCom)