Adbiyento: Panahon sa Grasya

Ikaupat nga Domingo sa Adbiyento
Mi. 5:1-4/ Ps. 80/ Heb. 10:5-10/ Lk. 1:39-45

The Season of Advent is a Season of Grace. Ang Panahon sa Adbyiento mao ang Panahon sa Grasya. Ug ang Ginoo mismo, ang tuburan, the ultimate source of grace mao ang nagpadayag o nag offer niini kanato.

Ug aron maandam ang atong tagsa-tagsa ka mga kaugalingon niining gipadayag nga grasya sa Ginoo niining panahon sa adbyiento, gitagaan kitag upat ka semana o upat ka Dominggo aron kita makapangandam. Ug kining upat ka Dominggo o upat ka semana nga kita mangandam, gisimbolo kini niining gitawag nato nga ADVENT WREATH.

Sa Unang Dominggo sa Adbyiento, gisindihan ang Unang Kandila, pahinumdum kanatong tanan nga ang atong pagpangandam mamahimo untang mainampoon nga pag-pangandam, a prayerful preparation. Usa ka higayon nga kitang tanan, labi na ang matag pamilya mainampoon nga mangandam aron ang atong kaugalingon mamahimong angayan nga mabubu-an sa grasya nga gitanyag sa Ginoo. Diha sa atong pag-ampo, Makita nato ang atong kaugalingon, Makita usab nato ang mga tawo nga naa sa atong palibot ug labaw sa tanan makita nato ang Ginoo, ang tuburan sa tanang grasya.

Sa Ikaduhang Dominggo sa Adbyiento, gisindihan ang Ikadauhang Kandila inubanan sa singgit ni Juan nga Magbubunyag: ANDAMA ANG DALAN SA GINOO, prepare the way of the Lord. Ang pag-andam sa dalan sa Ginoo nga gisinggit ni Juan nga Magbubunyag mao ang pag-andam sa atong kasing-kasing aron maandam kita sa grasya nga gitanyag sa Ginoo. Ug tungod niini, ang panahon sa adbyiento usa ka nindot nga panahon sa pagpangayo ug pasaylo aron malimpyohan ang atong kasingkasing, free from all forms of sins.

Sa Ikatulong Dominggo sa Adbyiento, ang Gaudete Sunday, gisindihan ang Ikatulong Kandila. Ug gipahinumduman kita sa usa ka malipayong disposasyon sa pagpangandam. Ang kalipay usa ka tima-ilhan nga ang presensya sa Ginoo aanaa kanimo. Ug ang malipayon nga kasingkasing mao ang gikinahanglan nga disposasyon alang sa grasya nga gitanyag sa Ginoo.

Ug ang Ika-upat nga Dominggo sa Adbyiento, gisindihan ang Ika-upat nga Kandila ug gipahinumduman kita nga ang tanang tawo nga nagatuo sa matawo nga Mesiyas, ang tuburan sa tanang grasya, mamahimong bulahan. Buot ipasabot, nga ang tanang tawo nga nabendisyonan sa grasya sa Ginoo nga iyang gitanyag niining panahon sa adbyiento, mamahimo usab nga usa ka grasya alang sa uban. Hinungdan nga kita nahimong bulahan atubangan sa Ginoo.

Ang mainampoon nga pagpangandam mao ang pag-adam sa atong kasingkasing nga mamahimong malipayon aron angayan kita nga mabubu-an sa grasya nga gitanyag kanato niining panahon sa adbyiento. Ug human kita ma-grasyahan sa Ginoo, mamahimo usab unta kitang grasya alang sa uban.