Ang Pamilya ug Yukaristiya

Ang Tuig sa Pamilya ug Yukaristiya nagtinguha nga mapatunhay ug molambo pa ang atong kristohanong pamilya nga mahimong misyonerong sumusunod ni Kristo sa Yukaristiya. Magsugod kita niining kasaulogan sa Unang Dominggo sa Adbiyento Nobiyembre 29, 2015.

Kining ika-4 nga hugna sa atong siyam ka tuig nga pagpangandam alang sa atong Hubileyo sa 2021, nagatudlo kanato nga tutukan pagayo ang atong mga paningakamot sa misyon alang sa Kristohanong pamilya ug si Kristo – Yukaristiya nga maoy sukaranan ug lintunganay niini. Dugaydugay na usab ang atong paningkamot diha sa atong Family and Life Apostolate (FLA). Nagasugod kita sa pagkuyog sa mga kaslonon sa pagpangandam sa ilang kasal. Mosunod ang padayong pormasyon sa pagtoo sa kristohanong magtiayon. Anaa ang pagpahigayon sa kasaulogan sa mga Sakramento nga nagapalig-on Kristohanong pagtoo. Hangtud sa pagduyog sa pagbangutan sa pamilyang namatyan ug paglubong sa ilang minatay.

Niining Tuig sa Pamilya ug Yukaristiya, gawas sa naandan na nga buluhaton sa FLA, atong paningkamutan ang mga mosunod:

1. Aron mahibaloan pagusab nato ang kahimtang sa atong mga Kristohanong banay himoon nato sa Bisita Pam’ilya. Higayon kini nga ma “census” ug masuta ang socio-economic ug spiritohanong kahimitang sa atong kasilinganan. Himoon pagusab ang spot mapping sa tanang GKK. Ipabati sa Pamilya ang paghigugma sa Dios ug pagtagad sa Simbahan.
2. Ipahigayon sa matag Parokya ang Re-”clustering” sa mga pamilya sa Gkk, ilabi na kadtong mga dagko ug daghan ang mga sakop. Bahinon ang tanang Kristohanong banay sa tag 10-15 ka banay matag cluster.
3. Pagampo sa Pamilya. Ipakaylap ang tamdanan — KAUBAN SA KRISTOHANONG PAMILYA aron sa pagdasig sa pagpabalik sa pag-ampo sa matag banay pinanguluhan sa mga ginikanan — ang pagrosaryo, bible sharing, debosyon sa Divine Mercy, ug ang debosyon sa Patron sa kapilya.
4. Bisita sa Larawan sa Sagrada Pamilya. Ang Parokya magpahigayon nga ang tanang mga Kristohanong banay maduaw sa larawan sa Sagrada Pamilya sulod sa tibuok Tuig sa Pamilya, aron mapaila kini nga atong sumbanan sa pagtukod sa Kristohanong banay, ug maaghat sila nga motugyan sa ilang banay sa pangama ni Santa Maria atong Inahan, si San Jose iyang bana, ug ni Jesus atong ze Ginoo.
5. Mga Sakramento nga nagatukod sa Pamilya. Ipahigayon nato ang pagsaulog sa Bunyag, Kompirma, Yukaristiya, ug Kaminyoon sa paagi nga maapil gayod ang mga sakop sa banay, ilabi na ang mga ginikanan, sa sakto nga pagpangandam, malipayong pagsaulog, ug mabungahong pagpuyo sa kahulugan sa Sakramento nga gidawat. Ang grasyang madawat gikan sa Sakramento dako kaayong ikatabang sa paghiusa ug pagpatunhay sa pamilya.
6. Aron magpadayon ang kabag-ohan ug kalamboan sa Kristohanong banay, magpahigayon ang Parokya og mga pipila ka higayon karong tuig sa mga recollection/retreat alang sa mga magtiayon nga anaa sa binsan unsang kahimtang. Sa ingon makadawat sila og dugang pagsabot ug kusog aron magpadayon sa pagatubang ug pagpas-an sa ilang mga kahayag ug mga kangitngit sa kaminyoon.
7. Ang FLA sa parokya maglangkob unta sa tanang grupo sa Simbahan nga naninguha sa kalamboan sa Kristohanong banay. Busa, gikinahanglan ang panaglambigitay ug pagtinabangay sa mga GKK, sa CFC, sa DMI, K of C, PYC, PREX, Catholic Schools. Maghiusa unta sila sa Spirito ug sa gugma.
8. Ipahigayon nato ang makahuluganong pagsaulog sa pipila ka mga halandumong adlaw alang sa pamilya — Pangilin sa Holy Family, Easter Triduo hangtud sa Divine Mercy Sunday, Piyesta ni St.Faustina, Fathers’ Day, Mothers’ Day. Sa ingon niini, mapatunhay ang kabililhon sa Pamilya.
9. Mahimo usab unta sa matag parokya ang paggahin og usa ka Dominggo sa bulan isip Dominggo sa Pamilya. Awhagon ang pagdungan og simba sa pamilya, maghatag og mapadayonong katekesis sa mga ginikanan, pagdula sa mga bata, pagsalo-salo, youth encounter, atumanon ang mga edaran.
10. Bansayon ug pahingusgan pagusab ang mga spirituhanon ug lawasnong buhat sa kalooy, ilabi na sa mga pamilya nga naglisod ug naalaot. Pakan-on ang gigutom, painumon ang giuhaw, sininaan ang naghubo, pagdawat sa dumuduong, ayohon ang mga masakiton, pagbisita sa mga gibilanggo, ilubong ang mga minatay.

Ang Tuig sa Pamilya ug Yukaristiya, nindot kaayo nga higayon nga padayonon ang gipaningkamutan nato sa tuig sa mga kabus. Mapalig-on ug mapatunhay pa ang mga gipahingusgan sa miaging tuig. Alang sa Kristohanong banay karon nga hilabihan nga naglisod tungod sa nagkausab ug nagkawala nga maayong struktura sa pamilya, kinahanglan nga ang Simbahan magmakanunyong mamugnaon og mas maayo pang paagi sa pagumol sa Kristohanong banay.