Kristohanong pakigdait pinaagi sa pagdagan

Duha ka tuig sukad namugna ang grupong St. Joseph Runners (SJR), nahimo na kining kabahin sa apostolado sa parokya sa San Jose sa Sta. Cruz, Davao del Sur ug ubay-ubay na ang mga nahimong adbokasiya niini nga may kalambigitan sa Kristohanong panginabuhi sa tagsa-tagsa ka mga miyembro niini.

Unang natukod and SJR niadtong tuig 2013 pinaagi sa pagpanguna ni kanhi parochial vicar Rev. Fr. Frederick Parantar. Si Fr. Parantar isip usa ka aktibong runner nakita ang kamahinungdanon sa pagtukod sa maong grupo tungod kay gawas nga maka promotar kini ug paugmat sa kusog, mapalig-on usab ang relasyon sa matag miyembro pinaagi sa pagdagan.

Ang SJR kaalalay sa parokya sa pagpangalap ug pondong pinansyal aron magpadayon ang pag paayo sa parokya ni San Jose pinaagi sa pagpahigayon ug mga fun runs. Dili kaayo dako ang kontribusyon sa grupo apan nakatabang gayud kini sa ginagmay lamang nga paagi. Sukad tuig 2011, mokabat na sa pito nga mga fun runs ang napahigayon.

Ang kasamtangang presidente sa SJR nga si Mr. Oliver Enot nagbutyag nga gawas sa pagtigum ug pondo alang sa pag suporta sa mga salmutang kompetisyon sa mga miyembro, prioridad gihapon sa SJR ang paghatag ayuda sa simbahan. “Sugod 2014 ug karong 2015 duha ka mga dagko nga fun runs ang gimugna namo ug dako nga porsyon sa income among gi intrigo sa parokya sa katuyuan nga makatabang kini sa konstruksyon sa simbahan.”

Sa laing bahin, hingpit kaayo ang pagpalig-on sa grupo kung hisgutan ang Kristohanong aspeto. Ang SJR adunay kapin trainta (30) ka mga miyembro, tanan mga Kristiyanong Katoliko ug aktibo nga mga miyembro usab sa ilang tagsa-tagsa ka mga Gagmayng Kristohanong Katilingban. Gumikan sa commitment sa grupo nga mahimong kabahin sa kalihukan sa parokya, nahimo kining miyembro sa Komitiba sa Isports alang sa kasaulugan sa ika-75 nga Jubileee celebration sa parokya sunod tuig. “Daghan ang among giandam nga mga kalihokang isports para sunod tuig. Nag expect mi nga sadya ug bibo ang selebrasyon sa Jubilee Year pinaagi sa mga nagkalain laing dula nga among pagabuhaton,” matud na ni Oliver Enot.

Daghan na sab ang nasalmutan nga mga marathons ug trail runs ang grupo dili lang sa Mindanao kung dili lakip na sa laing bahin sa Pilipinas. Sa kasamtangang tuig, ang SJR niapil sa mga popular nga running events sama sa TDR 80 kilometers Ultra Marathon, DC2DC 60K Marathon, Salomon 22K X-Trail Run, 105K Cebu Marathon, 50K Davao City Ultra Marathon ug Mapawa 42K Mountain Marathon didto sa Cagayan de Oro City. Ang mga umaabot nga dula nga salmutan sa SJR mao ang Datu Salumay 32K Trail Run ug Team Titans 70K Ultramarathon karong Nobyembre ug Davao Finisher’s Marathon ug Digos-Kapatagan Marathon karong Disyembre.

Sayo sa Enero sunod tuig, duha ka miyembro sa SJR ang mosalmot sa prestihiyoso kaayo nga Hongkong Standard Marathon.

Ang Bise Presidente sa grupo nga Si Mr. Butch Bajo malipayon kaayo nga nahimo siyang kabahin sa SJR. “Diri nako nakita ang tinuod gyud nga kahulugan sa paugmat sa kusog tungod kay nakahimamat ako ug daghang higala pinaagi sa pagdagan.” Dugang pa niya nga taliwala sa kakapoy sa pag apil ug mga long runs apan kini mahulipan man sa dili matukib nga kalipay ilabina kung moabot na siya sa finish line. “Adunay mga higayon nga dili nako makaya homanon ang taas nga dagan apan sa panahon nga makita nako ang akong kaugalingon nga nahoman ang dagan, walay kabutangan ang akong kasadya ug kini maghatag pa hinuon kanako ug dugang kadasig sa pag apil pa ug daghang mga dula.” (Julius Paner | Sta. Cruz)