‘Wake Up the World!’ Vocation Jamboree Challenge

‘Wake Up the World!’ Vocation Jamboree Challenge

‘Mata na! Bangon mga kabatan-onan ni Kristo! Wake Up the World!’ Kini ang kusog nga singgit-awhag nga napalanog halawom sa kagabhion hangtud sa sayo sa kaadlawon, gikan alas 5:00 sa hapon sa Oktubre 30 hangtud alas 5:00 sa kaadlawon sa Oktubre 31 sa St. Therese Gym sa Clergy House Compound, Madang, Mati City.

Kauban ang 412 nga mga delegado gikan sa upat nga mga parokya sa Mati ug sa parokya sa Lupon, walay puas, walay pagputol-putol ang mga kalihokan gikan sa sinugdanan hangtud sa katapusan nga gisalmutan sa mga kabatan-onan sa Diocesan Youth Apostolate (DYA), Augustinian and Benedictine Youth, ug Youth for Peace sa PHL Army, lakip mga kaparian, kamadrihan, brothers ug seminarians. Nagsugod kini sa Arrival and Registration, unya Dinner by parish or youth group (BYOB), Opening Liturgy nga naggamit sa Taize motion ug Living Rosary, pagsimba sa Balaang Sakramento kon Holy Hour, Welcome Address ni Diocesan Vocation Director Fr. Philip C. Dimalanta, Ice Breakers, ug ang pakigpulong with tremendous animation sa batan-on ug unang paring Salesiano gikan sa Mati, Fr. Ariel Arias, SDB. “Ang pagka-malipayon maoy timaan sa bokasyon,” matud pa ni Fr. Ariel, “ug ang pari, brother o madre usa ka blessing sa pamilya, ug ingon man, maoy konsyensya sa pamilya labi na sa panahon sa mga gubot.”

Misunod ang mga hamubong video presentation sa Consecrated Life sa napulo nga managlahing mga kongregasyong relihiyoso kon diin usab adunay mga bibo ug makahuluganon nga mga pasundayag sa kabatan-onan human sa matag duha o tulo nga presentasyon. Abtik usab kaayo ang mga Emcee, sila si Fray Julius, OSA, ug Miss Nina nga adunay ‘secret source of voice-song-and-dance energy!’ Sorpresa usab ang makalingaw nga pag-awit sa kaparian sa ‘Midnight Jam-concert cum yugyugan’ nga gisundan sa duha ka oras nga pag-disco, Zumba ug dance mob hangtud miabot ang alas 3:15AM nga pag-andam alang sa kasaulogan sa Balaang Eyukaristiya konselebrada, sa pagpanguna ni Apostolic Administrator and Yugyugan King Fr. Edito S. Bano. Si Fr. Bano usab ang nag-award sa mga papremyo, token, ug certificates ngadto sa mga mipartisipar. Sumala ni diocesan coordinator Sr. Eva Marie G. Tabugoc, CSJ, ang Voc-Jam usab nagtumong sa paglarawan sa kalipay ug katunhayan sa kinabuhing konsagrada ug sa pag-alagad sa katawhan sa Dios, labi na sa mga kabus ug hinikawan sa  sosyodad. Mapasalamaton ang steering committee sa Diocesan Vocation sa dakong kalampusan sa labing unang Voc-Jam nga gipaluyuhan sa mga parokya ug tulunghaan sa Mati ug Lupon, relihiyosong pundok, sectoral youth, men in uniform, former seminarians’ group, sa panggamhanang probinsyal ubos ni Gov. Cora N. Malanyaon sa Davao Oriental, ug ni Bishop Emeritus Patricio H. Alo, D.D. nga mitambong sa opening program and dinner, ug nakighalubilo sa mga pundok relihiyoso ug mga lider sa kabatan-onan.

Happy Birthday…Happy Priestly Anniversary to Lupon priests!

“Dako gayud nga grasya ang niabot ning tungora sa atong double celebration…” mga pulong ni Lupon parish parochial vicar Fr. Jacinto Ortiza sa iyang pagsaulog sa iyang ika-73 nga adlawng natawhan, samtang gisaulog usab ni parish priest Fr. Ricardo Siblos ang iyahang ika-20 nga kasumaran sa pagkapari niadtong ika-31 sa Oktubre sa bag-ong gi-konkreto ug hamugaway nga parish parking space. Giluwat sa duha ka pari ang ilang dakong pagpasalamat kang Bishop Emeritus Pat Alo ug sa katawhan nga matud pa nila, kanunay gayud mipakita sa ilang pagsuporta kanila. Sa iyang bahin, gisaysay ni Fr. Siblos ang dili niya malimtan nga higayon kanus-a siya giordenahan sa pagkapari ni Bishop Alo.  Mapasalamaton usab ang duha sa tanan nga mitambong, labi na kadtong naggikan sa mga silingang lungsod ug barangay. “Todo dawat mo namo,” matud pa ni Fr. Jacinto, kinsa nidugang nga giregalohan siya og maayong panahon sa Diyos niadtong gabhiona, human sa kusug nga pag-ulan halos tibuok adlaw, kon diin balhinon na unta ang mga lamesa ngadto sa sulod sa kumbento. Gipakita sa duha ka pari ang ilang kalipay pinaagi usab sa pagduyog sa mga sayaw sa cha-cha, boogie, ug swing nga gisalmutan sa mga hamtong nga parokyano.