Ang Kabulahanan sa Lumadnong Pagkinabuhi

Malampusong gisaulog sa Archdiocese sa Davao ang tinuig nga pagsaulog sa Domingo sa mga Lumad o Indigenous Peoples Sunday sulod sa tema nga Lumadnong Kinabuhi Bulahan Taliwala sa mga Hagit. Didto kini gipahigayon sa Barangay Kauswagan, Panabo City. Kini ubos sa pagpadagan sa Indigenous People’s Apostolate nga gipangunahan sa ilang director nga si Rev. Fr. Florencio A. Acedo Jr., DCD ug sa pagpangama sa mga kaubanan niini nga mga volunteer staff nga sila si Jose Maria Glenn Olea ug Jocelyn Brillos ug uban pa.

Ang IP Sunday gipahigayon sa maong lugar tungod kay aduna usab kini kalambigitan sa pagtukod ug bag-ong parokya dinhi. Si Timmy Genobiagon maoy naghatag sa maong luna nga katukuran sa bag-ong parokya. Ang mga lideres sa GKK San Roque, ang Konseho sa Barangay Kauswagan nga gipanguluhan sa maabtik nga Kapitan si Jeferson Caparida Sr., ang Parokya sa San Juan Bautista nga gidumala karon sa kura paroko nga si Fr. Arnulfo Cubero, hugot ang pagsuporta sa maong selebrasyon.

Ang kabulig nga Obispo sa Davao, Obispo George B. Rimando, D.D. nihatag gayod sa iyang panahon sa pagsaulog sa Santos nga Misa. Apan sa wala pa sugdi ang Santos nga Misa, aduna usa gipahinungod nga pag-ampo o Ecumenical Prayer. Diha sa homiliya, ang Obispo mihisgot mahitungod sa “kaalam”, ug kon kini ipunting sa lumadnong pagkinabuhi, ang lumadnong kaalam bug-at ug lig-on nang daan sa mga katuigan sa pagdumala sa mga Datu sa mga nagkadaiyang tribu ug pundok, adunay lumadnong pinulungan ug mga balaod, adunahan sa kultura ug tradisyon ug bahandi sa kinaiyahan, nagtamod sa kinaiyahan nga gasa ni Manama, bisan pa sa wala pa ang struktura sa panggamhanan.

Si Fr. Jun Acedo sa iyang pagpamulong naghisgot kabahin sa mga programa sa IPA nagkanayon, nga ang IPA adunay Livelihood, Education, Advocacy and Development Program nga gipadagan. Ubos niini gipakusgan ang pagpatungha sa mga batan-ong lumad nga makalampos sa ilang pagtuon sa elementarya, sekondarya ug unta sa kolehiyo arun mubalik kini sila sa tribu ug makatabang sa pagpalambo sa tribu.

Sa pagkakaron adunay 89 ka mga scholars ang gisuportahan sa mga nagkalain-laing pundok, indibidual, tulunghaan, ug mga ug kaparian ug kamadrehan ang padayonon nga naghatag ug pinansiyal nga suporta sama sa Ateneo de Davao University (ubos sa pangulo niini nga si Fr. Joel Tabora, SJ), University of the Immaculate Conception, Mrs. Victoria Tan, URAYA Land, San Pedro College, Presentation of Mary ug ang mga skwelahan niini nga Holy Cross College of Calinan, Holy Cross of Mintal, St. Peter’s College of Toril, ang pamilya sa Puyod, Garduque, Lu, Selga, Yulo, Pagcaliwagan, ug Rieta. Daghan pa kaayo ang manggihatagon nga mihatag suporta sa Adopt-a-Lumad Skwela kon ALS.

Matod pa ni Fr. Jun aduna pay dakung buluhaton ang IPA sa pagpadagan sa mga programa niini ug daghan pang mga hagit ang giatubang. Ang pagpadayon ug pagsustenar sa mga kinahanglanon sa mga Scholars, ang pagpatrabaho sa mga pinuy-anan niini aron makatuon ug maayo, ang pag-edukar usab sa mga ginikanan arun makasugakod sila sa pagpatungha sa ilang mga anak.

Adunay mga studyante nga nitambong gayod sa maong selebrasyon sama sa Ateneo de Davao University ug San Pedro College nga giubanan pa gani sa ilang presidente nga si Sr. Anabella B. Rona, OP., mga gikan sa tribung Kalagan nga naghatag pa gani ug usa ka pasundayag, tribung Sama nga ninghatag usab ug pasundayag, katilingban sa Kauswagan, Kasilak, Maduao, Upper Licanan, Consolacion, Katipunan, Cacao, tribung Obo-Manobo, tribung Ata-Manobo gikan sa Malabog. Mikabat sa dili ubos sa usa ka libo ang mga mitambong sa maong selebrasyon. Nagpasalamat ug daku ang IPA sa mga ninghatag ug suporta pinansiyal, mga pagkaon ug panahon, ang City Government of Davao ni Mayor Rody Duterte sa tabang ni Bong Go, City Government of Panabo ni Mayor James Gamao, Cecilia Farms ug uban pa.

Ang IPA o Indigenous People’s Apostolate mao ang lokal nga apostolado sa Archdiocese sa Davao ug usa sa mga Pastoral Agency. And iyang lagda gikan sa PCP II, Artikulo 32 nagkanayon nga “ang Simbahan magtukod ug mga Service Apostolates alang sa mga mag-uuma, mananagat ug Tribung Lumad aron mabati ang iyang presensiya diha sa kadaghanan ilabi na sa mga rural nga katilingban. Ang mga serbisyo niini naglangkob sa pagkab-ot sa hustisya alang sa ilang kaugalingon, pagpanalipod sa yutang kabilin, ug pagpreserba sa ilang kultura ug tradisyon. Lakip niini ang pagsangyaw kanila sa Maayong Balita pinaagi sa daloyogo kon dialogue. Ang laraw niini nga uban sila sa panaw paingon sa Gingharian sa Diyos.”

Ang IPA matawagan sa numero 0929-237-8590.