Daug ang Mapaubsanon

Mananagat gikan sa GKK San Vicente Ferrer sakop sa Sto. Niño, Kaputian, emosyonal nga gidawat ni Nole Aque ang iyang kinaunhang sertipiko sa pagpasidungog isip Pangulo sa Liturhiya (PSL). Siya usa sa mitambong sa ika-50 ka tuig nga kasumaran sa Kasaulogan sa Pulong-Pangulo sa Liturhiya (KSP-PSL) dinhi sa Arkidayosis sa Dabaw nga gipahigayon sa University of Southeastern Philippines niadtong Sabado, Nobyembre 7.

Sayo pa lamang sa buntag, mibiyahe na siya gikan sa isla sa Samal. Ug human nga siya ug ang uban nakaplastar na, ang programa nga gitambongan sa 3,846 ka PSLs gisugdan sa Pagpasidungog sa Pulong sa Dios diha sa Bibliya.

Usa usab si Nole nga mitindog sa dihang gitawag ang ngalan sa matag parokya gikan sa Bikaryato sa San Pedro, Sta. Ana, San Pablo, Sto. Rosario, Sacred Heart, ug St. James. Una pa man miabot kining dakung selebrasyon, ang mga PSLs nagtagbo na sa ilang bikaryato aron sa pagilhanay sa matag usa sama sa pagdula ug pagpaambit sa kasinatian.

Ang tanan nahatagan sa sertipiko sa pag-apil. Adunay pipila usab nga nakadawat sa sertipiko sa gidugayon sa pagpangalagad kon “length of service”, apan espesyal alang kang Nole ang iyang nadawat.

Isip mananagat, ang iyang panerbisyo sulod sa 18 ka tuig naghatag kaniya ug di mabayrang kalipay. Matud pa niya, “Nitulo ang akong luha kay usa ko sa 33 nga napili isip ‘Oustanding PSL’. Naningkamut ra man jud ko kay nagtoo ko nga naa jud ang Ginoo.”

Kung sa una, ang asawa niya ang gababag nga magpadayon siya, karon, siya na ang kauban niini.

Usa pud ka dakung grasya ang iyang natagamtaman mao ang makapaeskwela ug anak sa kolehiyo. “Pasalamat ko sa Ginoo kay bisan pobre mi, gihatagan niya ug maayong utok akong anak maong nakakuha ug scholarship.”

“Ang Ginoo dili magpasagad. Kon muhatag kita sa atong panahon, bahandi ug talento, iya kining ibalik nato ikanapulo’g pilo. Dili sa tanang panahon, kita hatagan niya kay magsalig ra unya ta.”

Ang tanan niuli nga malipayon hilabi na gayud si Nole. Sa mapaubsanong kasingkasing, siya miingon: “Sa kanunay magpabilin kita nga mainiton sa pag-alagad. Salamat sa akong katilingban nga naghatag kanako ug suporta pinansiyal aron maka vigil ko kada Sabado sa parokya, madala ang ostiya ug makapangulo ug Kasaulogan Sa Pulong sa Adlaw’ng Dominggo sa among katilingban.”

Sa gidaghanon, gihatagan ug bili sa Simbahan sa Dabaw pinaagi sa nag organisa niini nga Archdiocesan Liturgical Center (ALC) ang mga PSL nga nahimong inspirasyon sa ubang mga PSL sa ilang mga parokya. “Sila girekomendar ug giila nga Outstanding PSL sa ilang tagsa-tagsa ka parokya”, matud pa ni ALC Director Fr. Joel Caasi. Kahinumduman nga sa gipahigayong “Panawduaw” sa PSL niadtong Agosto 29, gipahinumduman niya ang tanan nga “ang pagka-PSL usa ka higayon sa grasya tungod kay ang matag usa kabahin man sa kasaysayan sa kaluwasan, busa magpabiling mapaubsanon.”

Daug gayud ang mapaubsanon.