Ika-150 nga Hubileyo sa Inahan sa Kanunayng Panabang

Sukad pa sa akong pagkagamay, nagmata nakog kahayag sa sinemana nga novena sa Mother of Perpetual Help sa among simbahan ug halos sa tanang simbahan sa Davao. Hangtod karon, nagapadayon kining tinagsa ug katilingbanon nga balansayon ug debosyon. Pagkapari nako sa San Pedro Cathedral niadtong 1976, ang novena mass sa matag Mierkoles maoy pinakadaghan nga gitambongan nga misa. Mahinumdum gayud ako nga ang concluding hymn sa Novena mao ang “Mother of Christ” bisan ug taas, humanon gayud sa mga tawo og awit una manlakaw.

Apan, sama sa tanang butang sa Simbahan moabot gihapon ang panahon nga dili na kaayo kini nahibaloan ug nasabtan, ug magkahinay ang debosyon ug mawala pud ang misyon. Nagkinahanglan ug bag-ong duso sa pagpaila niining debosyon ug pagpakaylap pa niini.

Sa pagsaulog sa ika-150 nga anibersaryo sa pagpabalik sa debosyon sa Inahan sa Kanunayng Panabang ginamit ang Imahen, gilunsad sa mga Redentorista sa tibuok kalibutan, ang 150th Jubilee celebration 1866-2016. Matud pa sa inpormasyon nga nadawat nako, tulo ka hugna ang kasaulogan — pagpangandam (2015), kasaulogan (2016), misyon (2017).

Ang mga Redentorista maoy gisangunan ni Santo Papa Pio IX, sukad pa niadtong tuig 1866 nga magpaila sa Imahen sa atong mahal nga Inahan, isip Inahan sa Kanunayang Panabang. Sila usab ang gisangunan nga ipaila kini sa tibuok kalibutan.

Kitang tanan saksi sa kalampusan nila sa pagtuman sa maong kaakuhan. Gawas sa ilang personal nga presensya sa sentrong mga syudad, sa nasud sama sa Davao, gitukod usab ang mga simbahan ubos sa pangama sa Inahan sa Kanunayng Panabang! Bisan dili Redentorista ang nagdumala.

Tingali ang mga taga Davao aduna nay nahaunang kasayuran bahin niining hubileyo gikan sa mga Redentorista sa Parokya sa Inahan sa Kanunayng Panabang, didto sa Bajada. Mahinungdanon ug mapuslanon gayud alang sa atong umaabot nga Tuig sa Pamilya ug Yukaristiya ug Tuig sa Kalooy, ang magbaton og dugang pang kasayuran bahin sa kahulugan sa imahen, gikan sa atong mga Redentorista.

Sa Diyosesis sa Digos, dunay usa ka parokya nga Inahan sa Kanunang Panabang ang Patron — ang parokya sa Guihing, Hagonoy. Magasaulog kining parokya sa ilang ika-15 nga kapistahan sa umaabot nga Nobiyembre 21 karong tuiga. Busa, mahimo kining parokya usab nga sentro sa dugang pang pagpaila ug pagpakaylap sa maong debosyon, nga magasugod kanila ug mapaambit sa uban. Ug dili lamang debosyon, apan ang iyang misyon usab nga mahimong magamit alang sa Bag-ong Pagsangyaw sa Maayong Balita sa kaluwasan.

Isip bata pa nga Parokya, daghan pa kaayo siyang angay sayran ug tun-an ug puy-an, labot sa ilang mahal nga Patron – IKP. Sa ingon mahimo siyang saksi sa Marianhong kinaiya sa Simbahan ug Kristohanong banay ug katilingban. Ang tema sa iyang kapistahan karong tuiga migamit sa tema s a unang tuig sa Triduo sa Hubileyo – ang pagpalig-on ug pagpalambo sa atong gugma alang sa Inahan sa Dios. Gipanghinaot nga kining maong kapistahan karon maghatag og dugang pagtagad sa dakong bahain sa Mahal nga Birhen sa atong nagkahiusang panaw sa misyon.