Ang Parokya ni Sr. San Miguel sa Padada

1920-1930. Kasagaran sa mga sugbuanon nga nagikan sa Argao, Sibonga, Dumaguete ug Ginatilan namalhin dinhi sa Mindanao ug mitugpa sa usa ka tabunok nga lugar nga ginganlan ug Limonso. Tungod kay kabahin naman sa kulturang Pilipino ang pagkarelihiyoso, una nilang gihandum ang pagpili ug Patron nga maoy himoon nilang gabayan ug tigpataliwala sa pag-ampo ngadto sa Ginoo. Tuod man, gipili nila ug giila dinhi sa Padada ang patron nga si Sr. San Miguel Arkanghel.

Ang unang kapilya nga natukod nahimutang duol sa dakong punoan sa kamanse tapad sa balay sa usa ka konsehal sa lungsod, sa atong National Highway. Gibalhin kini diha sa dapit diin nahimutang ang kasamtangang kumbento, diin ang tapad mao ang balay ni Mr.Raymundo Yap.

Agosto 22, 1952. Sa pagsaulog sa Mary Mediatrix of All Grace Cathedral sa Digos sa kapiyestahan niini, nagsabot ang unang Obispo sa Dabaw nga si Msgr. Clovis Thibault ug and Canadian missionary nga si Fr. Paul Gravel, PME aron sa pagtukod sa parokya ni Sr. San Miguel Arkanghel sa Padada.

Tungod sa dakong gugma ni Fr. Gravel, uban sa bendisyon ni Msgr. Thibault, og sa grasya sa Ginoo, gilayon pagkasunod bulan, Septyembre 7, 1952 inubanan sa suod nga higala nga si Mr. Ypil nga taga Digos, mianhi sila sa Padada aron sa pagsugod sa maong misyon. Sila giabi abi sa katawhan sa Padada nga gipangulohan ni kanhi Mayor Gregorio Matas, uban sa mga lideres sa parokya diin usa niini mao si Mr. Bonifacio Semilla – ang Presidente sa Catholic Association. Giplano ang pagtukod sa dakong simbahan ni Sr. San Miguel. Pagkasunod adlaw, giayo ang karaang kapilya, ug gipahibalo ang mga inilang lider sa mga lungsod sa Hagonoy, Malalag, ug ubang mga tawo gikan sa Sulop, Kiblawan ug Sta. Maria. Gihimo ang alayon sa pagtrabaho sa simbahan ni Sr. San Miguel Arkanghel-nga gitawag ug TAGBO.

Ang unang fiesta nahitabo sa parokya niadtong Septembre 29, 1952. Sa kadako nga giplanong simbahan, nasugdan ang pagbarog niini niadtong Hulyo 6, 1953. Sulod lamang sa tulo ka semana, nakita na dayon sa katawhan sa Padada ang usa ka katingalahang nahimo sa TAGBO ang parokya sa Sr. San Miguel.

Bisan man gani ang mga B’laan sa Maraga-a, Tagakaulo sa Malalag ug sa Sta. Maria nitabang sa pagtukod sa parokya. Tinabangan usab sa mga bulontaryong masun sa Padada,nahimong malampuson ang tanang kahago ni Fr. Paul Gravel.

Septembre 29, 1953. Gisaulog ang unang pista sa dako ug maanindot nga simbahan ni Sr. San Miguel (ang atong makita karon). Dili paman tuod kumpleto ang sulod niini apan padayon nga gipaningkamutan ni Fr. Gravel nga mapalambo ang simbahan. Gipauswag sab ang espirituhanong panginahanglan sa katinglingban.

Dungan niining maong paglambo mao ang pagkuyanap sa mga kapunungan sama sa Catholic Women’s League, Legion of Mary, Katekista, Pre-Cana ug uban pa. Ang mga nahiunang mga lider ug mga miyembro sa parokya mao usab ang adunay mga kasingkasing sa pagtabang sa ubang mga panginahanglan sa sulod sa simbahan.

Dugang pa gayud nga kalamboan nga nahimo ni Fr. Gravel mao ang pagpahigayon ug pagtukod sa institusyon alang sa pormasyon ug pagbag-o sa kinatibuk-ang katilingban sa parokya ang “St. Michael’s Academy,” diin sa ulahi nahimong inilang tulunghaan sa kolehiyo sa Davao del Sur, ubos sa admininistrasyon sa mga misyonaryong Sisters of the Immaculate Conception gikan sa Canada. Si Fr. Gravel ang pinakadugay nga na-assign sa Padada sulod sa 10 ka mabungahong tuig.

Tuig 1963. Si Rev. Fr. Gerard Dubie, PME gikan gihapon sa Canada, nipadayon sa dako nga buluhaton nga nasugdan ni Fr. Gravel, isip leader sa parokya ni San Miguel. Sa dihang nagkasakit siya, gipulihan na usab sa laing kura paroko nga si Rev. Fr. Francios Brunelle, PME. Tungod sa panglawas nga problema, gitawag ug balik sa Canada si Fr. Brunelle ug gipuli kaniya si Rev. Fr. Ricardo Banzon, DCD sa tuig 1964.

Nalipay ang tibuok parokya ug giabi-abi sa katawhan si Fr. Banzon tungod kay siya ang unang Filipinong pari nga nadestino sa Padada. Hamubo lamang ang higayon gihatag kaniya tungod kay nadestino siya sa Davao City aron mangulo sa mga Paring Diocesanhon.

Ang Social Action nga mga proyekto nasugdan ni Rev. Fr. Jean Dennis Tremblay, PME. Dinhi usab gisugdan ang Self-Help Training Project alang niadtong dili maka-eskwela ug formal.

‘Operation Tubig’ o mga bumba ang gipasiugda alang niadtong lugar nga lisod ug tubig ug mga medisina nga gihatag ngadto sa mga taga-baryo uban sa tabang sa mga doktor ug nurses. Usab sa panahon ni Fr. Jean Dennis nga ang mga parokyano nga may talento sa musika, gidasig sa pag-mugna ug organisar ug Parish Rondalla, Children’s Choir, ug Adult Choral Group.

1969. Si Fr. Jean Marie Thibault nipuli nga kura paroko ug makahimo ug dako nga kalamboan sa espirituhanong kinabuhi sa katawhan diha lang sa pagmugna sa lituryanhon ug mga katekismo nga mga kalihukan.

1977. Human sa pagsaulog sa ika-25 ka tuig nga anibersaryo sa kapistahan ni Sr. San Miguel, ubay-ubay gayod ang nahimong kauswagan sa parokya tungod kay ang matag pari nga nahimong kura paroko, nakatampo gayod ug dako diha sa ilang kaalam ug kahibalo alang niining maong paglambo.

1980. Gikan sa PME fathers, misulod ang diocesan nga mga pari isip kura nga si Rev. Fr. Loreto Mesiona. Siya mipuli kang Rev. Fr. Louis George Fortin, PME. Si Msgr. Generoso Camina, DD, PME ang nahimong unang Obispo sa Diyosesis sa Digos.

1985. Misulod sa programa sa diyosesis ang Gagmay’ng Kristohanong Katilingban o GKK sa panahon ni Rev. Fr. Bert Zamora, DCD unya ngadto kang Rev. Fr.Joselyno Gallopin, D.C.D.

Gipahigayon kini sa mga naunang kaparian nga mipahiluna agi’g tubag sa Plenary Council of the Philippines (PCP) II.

Kini suporta sa ikaduhang batikano Konsilyo nga gipahitabo niadtong tuig 1962-1965. Tuod man ang mga kampanya mikuyanap, human gibahin subay sa tulo ka misyon ni KRISTO nga pagkapari, pagkahari ug pagkapropeta. Gipanamkon, miturok, ug milambo ang GKKs sa kinatibuk-ang parokya.

1994-1995. Sa panahon ni Rev. Fr. Delfin Perras, DCD, STL ug Rev. Fr.Nards Sayson, D.C.D. gihimo ang dakong kausaban sa sulod sa simbahan, gikan sa sanktwaryo diin gibalhin ang Balaang Sakramento.

Ang dako ug ang karaang altar gikuha ug gibalhin kini sa nahimutangan sa kasamtangan. Ang Communion Grill gikuha usab ug ang lectern gibalhin sa daplin sa sanktwaryo sa walang bahin niini. Ang kisame giilisan, ug ang sulod og gawas sa simbahan gipintorahan. Ingon man usab ang tanang lingkoranan gi-machine cleaning ug gire-varnished. Dungan niining maong kausaban ang pag apil-apil sa simbahan sa kalihukang pulitikanhon. Misulod ang Parish Pastoral Council for Responsible Voting (PPCRV) ug ang DS-VOTECARE nga nagpahigayon sa Candidates’ Forum. Kapin 95% sa mga GKKs nakadawat sa edukasyon aron mamahimong responsableng botante.

Aduna pa may kakulangan apan ang sigurado, nagapadayon ang katawhan sa Padada sa paglawig diha sa atong Kristohanong pagtoo uban sa giya ni Sr. San Miguel.

1998-2003. Nakita ang dugang kalamboan sa parokya tungod sa kadasig ug kasibot ni Rev. Fr. Ferdinand “Nanding” Lariosa, D.C.D. diha sa pagorganisar sa Parish Builders Ministry ug pagpangita aron makakab-ot ug igong kantidad alang sa dugang pagpa-anindot sa sulod ug gawas sa simbahan.

Makita ang paglambo sa palibot sama sa dagkutanan sa kandila, Tithing Board, landscape, pagdugang sa kural, ug suga sa palibot. Dugang niini ang mga sound system sa simbahan ug sa seminar house ingon man sa pagpanindot niini, sulod sa lima (5) ka tuig niyang pagka kura paroko. Labaw sa tanan ang paglambo sa Liturhiyanong kalihukan sama sa pag adto sa mga GKK sama sa sa apostolado sa pagpanudlo nga dayag sa Bible Apostolate, Family and Life Apostolate, Catechists, ug Youth.

Ang misyon ni Kristo sa pagkapari giabayan sa mga PSL, LML, ANF ug ubang organisasyon sa pag-ampo. Ang misyon ni Kristo sa pagka Hari gipakita sa mga buhat sa pagserbisyo sa lideres sa matag GKK, PSA ug ang PPC nga mao ang nagplano, nag-implementar sa gimugnang balaod sa simbahan.

Bulan sa Hunyo, 2003, ang Kura Paroko nga si Fr. Lariosa, napulihan ni Rev. Fr.Jade Calumpong, D.C.D. kanhi iyang Assistant Parish Priest ug karon mao ang kasamtangang Kura Paroko.

Human sa iyang termino niadtong 2005, naasign si Rev. Fr. Cornelio Toraja, D.C.D. sa parokya hangtud 2008. Siya na karon ang kasamtangang Vicar sa Diocese sa Digos. Siya gisundan ni Rev. Fr. Polding Umblero, D.C.D. Hangtud 2013.

Karon ang kura paroko sa Sr. San Miguel Arkanghel mao si Rev. Fr. Jupiter Canoy, D.C.D., nagapadayon sa pag-renovate ug pagpalambo sa salog sa simbahan.

Mao kini ang kasaysayan sa parokya sa iyang ika-62 ka tuig sa paglawig ug sa way hunong nga paggiya sa mahal nga Patron. (Nemric Kiel Umali | Digos)