“Lantawa si Jesus gilansang sa krus ug nabanhaw”

Niining Tuig sa mga kabus nga nagsingapus na, giawhag kita nga lantawon si Jesus nga gilansang sa krus, namatay apan banhaw. Mao kini ang batong sukaranan sa kakabus sa Ebanghelyo, sa kakabus sa Simbahan.

Alang sa mga kabus, sa mga gibug-atan ug gikapoy, sa mga adunahan, gamhanan, ug dungganan niining kalibutan, gitanyag kining nawong sa Dios nga nagpakakabus diha ni Kristo Jesus. Pinaagi Kaniya, diha Kaniya, uban Kaniya lamang nato masabtan ug madawat ug mapuy-an kining kakabus sa Ebanghelyo nga gidasig ug gimantala sa Simbahan ngadto sa kalibutan.

Kumusta ang atong pagsaulog niining tuiga. Naa bay kabag-ohan sa panglantaw ug pagtuman sa misyon sa Simbahan diha sa atong mga pamilya, sa gamay nga Kristohanong katilingban, sa parokya, sa Diyosesis. Duna bay mga bag-ong lakang ug tinguha aron pagpahigayon sa katumanan sa mga tumong niining tuig sa mga kabus?

Tingali nakatabang kanato kining duso sa Simbahan karon nga pahingusgan ang pagtagad sa panginahanglan sa mga kabus pinaagi sa pag-organisa pag-ayo sa atong ministriya sa gugma ug kalooy. Nakatabang usab kanato nga magmaloloy-on ngadto sa mga layo sa Simbahan ug gitagaan sila og pagtagad ilabi na sa paghatag kanila sa higayon nga makabalik ug makaapil pagusab nga madasigon sa kinabuhi sa Simbahan.

Ang pagsaulog nato sa mga Sakramento gipahigayon nato nga nahimong higayon sa katawhan, nga nabugnaw na sa ilang pagtoo, nga mabuhi ug mabag-o pagusab sila diha sa grasya sa Sakramento. Ang pagsaulog sa Sakramento sa Bunyag, Kompirma, ug Yukaristiya maoy unang mga higayon alang niining pagbag-o.

Sama sa gihapon, bisan ug nagsingapos ang usa ka ang-ang, wala kini nagpasabot nga undangan ang nasugdan. Ipadayon gayud ang gipaninguhaan karong tuig alang sa mga kabus tungod kay kabahin man kini sa ordinaryong panaw sa misyon sa Simbahan.

Spesyal nga Hubileyo sa Kalooy

Dakong grasya sa Dios nga sa sunod tuig magasaulog ang tibuok Simbahan, basi sa gimando ni Papa Francisco, sa Hubileyo sa Kalooy. King maong hubileyo pagasugdan sa atong Santo Papa Francisco didto sa Roma, Disyembre 8, Pangilin sa Immaculada Concepcion. Sa maong kasaulogan pagadumalahan ni Papa Francisco ang pagabli sa Balaang Pultahan, didto sa Basilika ni San Pedro. Human niini, ang mga Simbahang lokal sa tibuok kalibutan magpahigayon usab sa ilang paglunsad sa Hubileyo sa Kalooy pinanguluhan sa ilang Obispo. Saulogon sa matag lokal nga diyosesis ang pagabli sa ilang tagsatagsa nga Balaang Pultahan.

Sa sunod tuig usab, diri sa atong nasud, gitakda usab sa kaobispohan ang ika 4 nga tuig sa atong panaw padulong sa dakong hubileyo nato sa 2021, ang Tuig sa Yukaristiya ug sa Pamilya. Kini magsugod karong umaabot nga Unang Dominggo sa Adbiyento, Nobiyembre 29.

Sama sa ato nang nahibaloan, ang Ika-51 nga International Eucharistic Congress pagahimoon dinhi sa Pilipinas didto sa Cebu. Dako kaayo kining ikatabang sa atong pagsaulog sa Tuig sa Pamilya ug sa Yukaristiya.

Busa, ang diwa sa pagduaw kanato diri sa Pilipinas ni Papa Francisco — kalooy ug duyogkasakit, ug ang Tuig sa mga kabus, matagaan pa gayud og dugang higayon sa sunod nga tuig, nga masilsil ug matisok sa mga kahiladman sa mga magtotoo ug mapadayag sa Simbahan kining iyang tiunay nga hulagway. Dalaygon ang Dios nga Maloloy-on sa nga tanan!