Ang KSP-PSL Dinhi sa Arsidyosesis sa Davao
Pasiunang Pahayag
Atol sa Ika-50 nga kasumaran sa Kasaulogan Sa Pulong (KSP) – Pangulo Sa Liturhiya (PSL) dinhi sa Arsidyosesis sa Davao, ubos sa tema: “KSP-PSL 50 Anyos Na!”, angayan lamang nga atong balik-lantawon ang nanglabay na ug subayon ang kalamboan niini sa mga katuigan lakip na ang nahimo niini diha paglambo sa lokal nga Simbahan, ilabi na katukuran ug kalamboan sa mga Gagmay’ng Kristohanong Katilingban (GKK). Mao kini ang hinayhinay nga atong ipahayag dinhi hangtud sa bulan sa Nobyembre kun diin gideklarar nga KSP-PSL month dinhi sa Simbahan sa Davao ni Arsobispo Romulo G. Valles, D.D., ang kasamtangang Arsobispo.
Ang mga kamatuoran niini gikuha gikan sa July/August 1980 nga issue sa MISSONS-ÉTRANGÈRES, usa ka magazine sa mga PME Fathers kun diin nahasulat ang ilang mga kasinatian sa misyon, sa 25th Anniversary KSP-PSL souvenir book niadtong tuig 1990, mga records gikan sa JCC ug ALC, ug mga pagsaysay sa mga tawo nga nahilambigit ning maong kalihukan ug sa ministriya sa PSL.
Ang Kabilihon sa Pulong sa Dios
Ang pagsaulog sa Pulong sa Dios nahimo nga dakung kabahin sa kinabuhi sa katawhan sa Dios sukad pa kaniadto. Kini ginapahigayon aron pagbalaan sa Adlaw’ng Igpapahulay panahon sa mga Judeyo – “Hinumdumi ang Adlaw’ng Igpapahulay ug balaana kini.“ (Ex 20:8) Hinungdan dili gayud motrabaho. Balaanon nila ang maong adlaw pinaagi sa pag-adto sa mga sinagoga aron pagsimba sa Dios pinaagi sa pagpamati sa pagtulun-an sa mga propeta ug pag-inambitay sa pagpangaon diha sa ilang mga panimalay. Sa panahon ni Kristo ug sa Iyang mga tinun-an, mao usab kini ang ilang ginahimo tungod kay sila mga Judeyo man. (cf. Lk. 24:24)
Human sa pagkabanhaw ni Kristo, ug sa wala na Siya uban kanila, “ang mga tinun-an nagpadayon sa ilang buluhaton sa pagsimba apan hinayhinay sila nga mibulag sa pagsimba sa mga Judeyo. Ang ilang pagsimba ilang gisentro kang Jesus ug gihimo sa Iyang ngalan agi’g pagsaulog sa Iyang pagkabanhaw. Apan nagpabilin ang bililhong elemento sa pagsimba nga mao ang pagpamati sa Pulong sa Dios sumala sa pagtulun-an sa mga apostoles ug ang pagpikaspikas sa tinapay. (cf. Tamdanan alang sa Basic Liturgy Seminar, Buhat 2:38,42-46)
Ug kining maong matang sa pagsimba nagpadayon hangtud karon aron paghandum sa mga makaluwasnong buhat sa Dios diha ni Kristo Jesus.
Ang KSP sa Davao
Ang sinugdanan sa Kasaulogan Sa Pulong (KSP) sa Dios dinhi sa Davao bunga sa paningkamot sa mga misyonerong pari gikan sa mga Recoletos, mga Jesuita ug mga PME kinsa naningkamot nga mokaylap ang Katoliko nga pagtoo ug mamugna ang Simbahan sa nagkalainlaing dapit.
Usa sa mga Simbahan nga namugna mao ang Arsidyosesis sa Davao kun diin nahimong kabahin niini ang parokya ni San Jose nga Mamumuo sa lungsod sa Sta. Cruz, Davao del Sur.
Niadtong tuig 1965, duyog usab sa nga kausaban nga dala sa Ikaduhang Konsilyo Vaticano (Vatican II), nahimong Kura Paroko sa Sta. Cruz si Fr. Claude Matte, PME, inabagan ni Fr. Andre Pigeon, PME.
Binasi sa pag-awhag sa Vatican II, diha sa dokumento nga gihinganla’g “Sacrosanctum Concilium” o “Constitution on the Sacred Liturgy” nga nagkanayon: “Bible services should be encouraged, especially on the vigils of the more solemn feasts… and on Sundays and feastdays” (SC #35.4), gisugdan ni Fr. Andre Pigeon, PME, ang KSP didto sa kapilya sa San Pedro barrio sa Tuban, usa ka kanhi halayo nga baryo sa lungsod sa Sta. Cruz, Davao del Sur.
Ang katuyoan sa maong KSP mao ang pagsaulog sa adlaw’ng Domingo sa mga dapit nga halayo ug dili maabot sa pari matag Domingo alang sa kasaulogan sa Santos nga Misa. Pinaagi niini, “The treasures of the Bible are to be opened up more lavishly, so that richer fare may be provided for the faithful at the Table of God’s Word” (SC #51) bisan pa man kun dili mapahigayon ang pagsaulog sa Santos nga Misa. Gikan didto, mikaylap ang kalihukan sa KSP ngadto sa nagkalainlaing parokya dinasig ug giniyahan sa mga misyonerong PME.
Atol sa usa ka panagtigom sa mga KSP Leaders niadtong July 16-18, 1971 nga gipahigayon sa parokya sa Sto. Rosario, Toril, Dakbayan sa Davao, 7 ka mga parokya ang dunay KSP niadtong higayona. Niadtong tuig 1980, nahimulag sa Arsidyosesis sa Davao ug na-establisar ang Dyosesis sa Digos nga naglangkob sa tibook probinsiya sa Davao del Sur.
Sa pagkakaron ang Arsidyosesis sa Davao dunay 37 ka mga parokya kun diin ang tanang parokya nagapahigayon sa KSP sa matag GKK nga ilang nahisakopan.
Sa sunod nga gula, atong subayon ang paglambo sa KSP dinhi sa Davao lakip na ang gitugyanan nga mangulo niini, ang PSL.
Ang Paglambo sa KSP sa Davao
Niadtong tuig 1965 gisugdan ang kalihukan sa KSP aron saulogon ang Adlaw’ng Domingo ingon nga Adlaw sa Ginoo sa mga dapit kun diin dili maabot sa mga pari alang sa pagsaulog sa Santos nga Misa. Sumala mismo sa pagsaysay ni Fr. Andre Pigeon nga niadtong panahona ang katawhan sa banika, kun “rural areas” makasaulog lamang sa misa maka-usa o makaduha sa usa ka tuig sa lainlaing hinungdan tungod sa kakulang sa pari ug gilay-on niini gikan sa sentro sa parokya ung ingon man ang kanihit sa sakyanan niadtong panahona. Sa hinayhinay ug basi sa awhag sa Konsilyo Batikano II, gikan sa katilingban sa San Pedro, Tuban, Sta. Cruz, Davao del Sur, ang KSP mikaylap sa mga katilingban sa nagkalainlaing parokya. Sumala pa nga sa tuig 1971, 37 na ka mga katilingban ang nagapahigayon niini.
Sa 1975, atol sa unang pagkamugna sa katiguman sa mga Obispo, mga kaparian ug mga layko sa Simbahan sa Mindanao nga gitawag og Mindanao-Sulu Pastoral Conference (MSPC) gihimong duso ang pagmugna sa Gagmay’ng Kristohanong Katilingban (GKK) sa matag dyosesis sa Mindanao. Ang KSP misamot pagkaylap. Kini nahimong instrumento sa padayong paglig-on sa mga katilingban ug pagmugna pa og mga bag-o, dili lamang sa mga katilingban nga banika apan lakip na usab sa mga katilingban nga haduol sa sentro sa parokya o “urban areas”. Ug sa pagka-karon anaa na sa kapin kun kulang dos mil kinyentos (2500) ka mga GKK ang nagapahigayon niini sa banika man o sa mga GKK haduol sa sentro sa parokya nga gialagaran sa kapin kun kulang tres mil otso siyento kwarenta y sais (3,846) ka mga PSL.
Ang paggula sa Directory for Sunday Celebration in The Absence of a Priest gikan sa Roma niadtong tuig 1988, naghatag og direksiyon sa mga kasaulogan nga ginahimo sa mga katilingban nga dili masaulog ang Santos nga Misa. Ang KSP nga ginapahigayon dinhi sa Davao naghinayhinay na usab sa paglambo. Dinhi nahimugso ang duha ka matang sa KSP nga ginasaulog matag semana sa GKK gidasonan usab sa Circular No. 3/90 nga gipagula sa Arsobispo. Alang sa mga GKK nga dili makasaulog sa misa sa Adlaw’ng Domingo diha sa banika, anaa ang Kasaulogan Sa Adlaw’ng Domingo Kun Wala Ang Pari (nga sa minubo gitawag og KSD) uban niini ang pagkalawat, ug alang sa mga GKK nga makasaulog sa misa sa Domingo kay haduol sa sentro sa parokya, anaa ang Hiniusang Pag-ampo sa GKK (nga sa minubo gitawag nga HPG).
Kini gihimo aron sa ingon matag semana ang mga sakop sa GKK managtigom gayud aron pagpadayag sa ilang pagka-Simbahan nga maampoon, ilabi na sa Adlaw’ng Domingo kun diin ginahandum sa Simbahan ang kadaugan sa pagkabanhaw ni Kristo. Dugang niini namugna usab ang KSP alang sa nobena sa patron, alang sa nobena de gallo, alang sa nobena sa minatay ug alang usab sa nagkalainlaing okasyon sama birthday, anniberaryo sa kaminyoon, anibersaryo sa kamatayon (hubkas) ug uban pang higayon nga magkahiusa ang katilingban sa pag-ampo. Dinhi maingon nato nga gihimong sentro ug gihatagan og dakung pagtagad ang Pulong Sa Dios.
Ang Rito ug mga galamiton sa KSP
Ang KSP nahasubay sa rito nga giandam ni Fr. Andre Pigeon, PME, ubos sa pagtugot sa Obispo. Kini gilangkoban sa Pagsaulog sa Pulong sa Dios inubanan sa inandam nga homiliya nga gitawag og komentaryo, Pagdayeg ug Pagpasalamat lakip na ang Paghandum sa Misa ug sa piniling parokya, adunay pagkalawat. Apan sa hinayhinay, gikuha ang pagkalawat tungod usab sa pagpangabuso. Ang mga basahon gikutlo gikan sa mga basahon sa Adlaw’ng Domingo nga gihan-ay sa Carmelite Fathers sa Agusan del Sur samtang ang Komentaryo ug Pangaliya Alang Sa Tanan giandam mismo ni Fr. Pigeon.
Ning panahona, ug tungod sa pagpagula sa Directory for Sunday Celebration in the Abence of A Priest niadtong 1988 nga gidasonan sa Circular 3/90 nga gipagula ni Kanhi Arsobispo sa Davao, Antonio Ll. Mabutas, D.D., milambo ang rito sa KSP dinhi sa Davao. Sa tuig 1990, pinaagi sa Archdiocesan Liturgical Center (ALC) gihikay ang rito sa Kasaulogan sa Adlaw’ng Domingo Kun Wala Ang Pari (KSD) nga saulogon sa matag Domingo sa mga katilingban nga banika ubos sa pagtugot sa Arsobispo ug ang Hiniusang Pag-ampo sa GKK (HP) nga ipahigayon sa bisan unsang adlaw sa semana sa mga katilingban sa sentro sa parokya kansang tuyo mao ang pagpangandam alang sa kasaulogan sa misa sa Domingo. Hinungdan nga gidasig nga isangyaw ang mga basahon sa Domingo nga umaabot. Ang leksyonaryo gihan-ay na sa ALC sumala sa han-ay sa leksyonaryo sa misa samtang ang komentaryo ug pangaliya giandam sa ALC tinabangan sa mga seminarians sa Regional Major Seminary (REMASE) ug pipila ka mga kaparian.
Dugang niini, aduna na usab rito nga gihikay alang sa nobena sa patron nga ginganla’g “Nobenahan I-VI”, alang sa nobena sa minatay ug mga kasaulogan nga dunay kalambigitan sa kamatayon nga gitawag “Sa Kamatayon, Kinabuhi”, Nobena de Gallo alang sa KSP siyam ka adlaw nga adlaw nga pagpangamdam sa dili pa ang Pasko sa Pagpakatawo, ug lakip na usab dinhi “Ang Dalan Sa Krus” alang sa Via Crucis o Way of the Cross nga sagad ginapahigayon sa mga Biyernes sulod sa Kwaresma ug sa Biyernes Santo.
Kining tanan gipaningkamutan sa lokal nga Simbahan sa Dabaw aron malig-on ang kristohanong katilingban ug mapadayag niini ang iyang pagka-maampoon, pagka masangyawon, ug pagka maalagaron.
First KSP Community
Sa pagsugod sa Kasaulogan Sa Pulong niadtong 1965, usa sa mga pangutana mao nga kinsa ang mangulo niini. Sa iyang taho sa binulan nga mantalaan, MISSONS-ÉTRANGÈRES” July/August, 1980, no. 10, si Fr. Pigeon nag-asoy nga naghunahuna sila nga usa lamang ka tawo ang itudlo sa KSP. Apan ilang naamgohan nga mas maayo kung tulo o upat ang itudlo isip “team”. Ilang gitugyan ang KSP sa mga lalaki nga hamtong ug tinahod sa katilingban sa edad nga 40 pataas. Ang mga unang nangulo sa KSP sa San Pedro, Tuban sila si Berto Dacer, Leo Sabandal, Anatalio Ricorba, Dologin ug Florenci Aguilar. Sanglit walay may misa, sila mangulo sa KSP diha sa ilang katilingban matag Domingo ug magpakalawat atol sa kasaulogan.
Niadtong Julio 16-18, 1971 sa panagtigom sa parokya sa Sto. Rosario, Toril, sa mga pangulo sa KSP gikan sa parokya nga dunay KSP, pormal nga gitudlo ni Bishop Clovis Thibault, PME., D.D., Obispo sa Davao, ang mga pangulo sa KSP ug gitawag na nga KSP Liders. Ilang katungdanan ang pagpangulo sa KSP ug ang pagpakalawat sa kapilya sa ilang tagsatagsa ka katilingban sa adlaw’ng Domingo. Dinhi nasinati sa mga tawo ang nga ang ilang kapilya nga kaniadto walay gamit gawas sa tinuig nga piyesta, nahimo nang tinuod nga sentro sa pag-ampo matag adlaw’ng Domingo. Hinayhinay ang mga tawo nabansay ug naabli alang kanila ang kabuhong sa Pulong sa Dios ug kabililhon sa Yukaristya.
First KSP Liders
Gitahagan og gimbug-aton ang ilang katungdanan diha sa Guidelines and Norms on the Gagmay’ng Kristohanong Katilingban nga gipagula niadtong 1996 ug gipalambo sa tuig 2014. Karon ang mga PSL gitahasan na nga maoy kinatibuk-an tigdumala sa ministry sa pagsimba ug pag-ampo sa GKK. Himoon nila kini pinaagi sa (1) Pagpatunhay sa kinabuhing liturhiyanhon sa katawhan diha sa pagpakig-alayon sa mga grupo nga nangalagad sa liturhiya sama sa “music ministry, altar servers, lectors, commentators, cantors, and psalmists, arts and environment; (2) mag-organisar og mga kalihukan nga makapalambo sa debosyon sa katawhan sama sa santos nga rosaryo, mga prosisyon, via cruces, novenas ug uban pang mga kalihukan nga nagpunting sa Pulong sa Dios; (3) Mangulo sa Kasaulogan Sa Pulong – Hiniusang Pag-ampo (HP), Kasaulogan sa Adlw’ng Domingo Kun Wala ang Pari (KSD) ug Kasaulogan sa Kristohanong Paglubong/Kamatayon; ug (4) Mahimong “altar server” panahon sa kasaulogan sa misa diha sa GKK kun wala ang “altar servers”.
Kining tanan aron maablihan sa katawhan ang kabuhong sa pulong sa Dios, mapatunhay ang pagka-maampoon sa katawhan ug malig-on ang ilang pagka-katilingban sa Dios.
Pormasyon sa PSL
Aron mahimong andam ug takus ang mga tawo nga gitugyanan sa pagsaulog sa Pulong Sa Dios, anaa sa mga kamot sa kura paroko ang pag-andam ug pag-umol sa mga KSP Liders. Sa sinugdanan sila giandam pinaagi sa individualinstruction gikan mismo kang Fr. Pigeon. Apan sa dihang nagkadaghan na ang mga nagdumala sa KSP, ginapahigayon ang ilang pormasyon atol sa ilang binulan nga panagtigom sa sentro parokya. Ug sa dihang miabot ang binisaya nga Cursillo, nga kanhi gitawag og “Samaria”, kini gihimong kabahin sa pormasyon sa mga KSP Liders. Dayon ang “Evangelization Seminar” nga giandam ni Fr. Roger Begin, PME., lakip na sab ang CCD kun Christian Life Doctrine. Niining tanan, kabahin ang pagtulun-an sa liturhiya, ang Simbahan, “Christology”, mga sakramento ug ingon man ang kasaulogan sa kristohanong paglubong, pagbisita sa masakiton ug ubang mga panalangin.
Sa nagka-anam na’g kadaghan ang mga KSP Liders, gibati sa mga kura paroko ang panginahanglan sa dugang ug mas han-ay nga pag-umol kanila. Busa sila nakigsabot sa mga seminarista nga taga-Davao nga nagtungha sa Regional Major Seminary nga mag-andam ug magpahigayon sa mas han-ay nga pormasyon sa mga KSP Liders. Kini nahitabo matag bakasyon sa mga seminarista sa mga parokya sa Davao del Sur ug midagan gikan sa tuig 1973 ngadto sa tuig 1975.
Han-ay sa Pograma sa Pormasyon
Sa pagkamugna sa John XXIII Catechetical Center (JCC), niadtong tuig 1975, gipahigayon ang pakigsusi labot sa kalihukan sa KSP ug sa pormasyon sa mga KSP Liders sa 20 ka mga parokya nga dunay KSP niadtong panahona. Nakita sa mga kura paroko nga mas angay klarohon ug han-ayon pa gayud ang programa sa pormayon sa mga KSP Liders. Busa human sa usa ka tuig nahikay unang programa sa pormasyon lakip na ang katungdanan ingon nga pangulo sa KSP. Natukod usab ang estruktura sa pagdumala sa KSP ug sa KSP Liders gikan sa GKK ngadto sa Diocesan Level. Busa sa tuig 1977, gisugdan ang pag-implementar sa bag-ong han-ay sa programa sa pormasyon ubos sa pagdumala sa JCC. Sa nanglabay ang mga katuigan nasinati nga dili lamang KSP ang hatagan og pagtagad sa katilingban. Nakita nga kinahanglan usab diay hatagan og pagtagad ang tanang kalihukan nga may kalabutan sa pag-ampo ug pagsimba, hinungdan nga ang Arsobispo sa Davao naghukom nga ang KSP Lider pagatawgon na nga Pangulo Sa Liturhiya kun PSL. Ug tungod sa hangyo sa pipila ka mga kaparian nga ang PSL hatagan sa katungdanan sa pagsaulog a mga Sakramental, ang JCC naghikay sa PSL Seminar Phase II niadtong tuig 1979-1980. Apan wala kini napadayon tungd kay nakita nga dili pa andam sa paghimo niini. Dungan usab niini ang mga GKK sa mga poblacion ug sa Davao City proper nagsugod na usab pagsaulog sa KSP ginamit ang mga tamdanan sa KSP sa Domingo nga sagad ginapahigayon sa adlaw’ng Sabado o sa laing adlaw sa semana. Ug dinhi nakita na usab ang pagpalambo sa han-ay sa programa sa pormasyon.
Pinalambo nga Han-ay sa Programa sa Pormasyon sa PSL
Sa pagkatukod sa Archdiocesan Liturgical Center sa tuig 1980, hinayhinay nga ang programa sa pormasyon sa PSL gibalhin gikan sa JCC. Apan ang kalihukan sa KSP anaa sa kamot sa tagsatagsa ka Kura Paroko. Dinhi gisugdan sa ALC ang pagmugna sa Basic Liturgy Seminar nga daku kaayo ang gikatabang sa PSL sa pagsabot sa mga elemento sa liturhiya. Hinungdan nga sa pagsugod sa tuig 1988, nagsugyot ang mga kaparian nga palamboon ang programa sa pormasyon sa PSL kun diin ang ALC mangatungdanan lamang sa liturhiyanhong pormasyon sa PSL. Sa pag-uyon sa mga Kura Paroko, gisugdan pag-implementar ang pinalambo nga han-ay sa programa sa pormasyon sa mga PSL gilayon niadtong tuiga. Ang maong programa gilangkoban sa tulo ka ang-ang kun lakang. Sa dili pa itudlo pagka-PSL ang usa ka kandidato, kinahanglan una moagi siya sa unang ang-ang sa pormasyon nga mao ang Basic Christian Formation o Foundational Integral Faith Formation nga langkoban sa Evangelization o Introduction to Salvation History, Basic Bible o Encounter with Jesus through the Bible, Basic Liturgy focusing on the KSP, Bible Reflection and Devotional Prayers ug GKK Seminars focusing on Church renewal being an integral part of the parish as a Communion of Communities. Human niini, mosulod siya sa ikaduhang ang-ang nga mao ang Integral Pastoral Skills Training sama sa PSL Seminar I kun diin tudloan siya sa iyang mga kaakuhan ug katungdanan sa pagka-PSL kun diin siya (1) mangulo sa senemana pag-ampo sa katilingban – ang Kasaulogan sa Adlawng Domingo Kun Wala ang Pari (KSD) o Hiniusang Pag-ampo sa Katilingban (HP), (2) ang pagpangulo sa uban pang mga katilingbanong pag-ampo sama sa novena, via cruces, prosisyon, ug uban pa, (3) ang pagpakig-alayon sa mga grupo nga nagalihok sa liturhiya sama sa choir, lector, ug lain pa, ug (4) ang pagtabang sa pari kun may kasaulogan sa misa sa GKK. Ug kun nakita nga angayan ug takus, moapil siya sa PSL Seminar II aron pagatugyanan sa katungdanan sa pagpakalawat sulod sa KSD kun diin hatagan Siya sa katungdanan sa pagka-Extraordinary Minister of Communion, pagpangulo sa kristohanong paglubong, sa pagpanalangin og mga butang, pagresponso sa mga lubnganan, ug uban pa. Ug human niini gidasig ang mga PSL nga magpalambo sa iyang kasinatian ug kahibalo pinaagi sa pag-apil sa ikatulong ang-ang sa pormasyon na ginatawag og “mapadayonong pormasyon o continuing integral faith formation” diha sa parokya ubos sa pagdumala sa Kura Paroko. Ang ALC mahimong motabang niini pinaagi sa paghan-ay og mga sesyon nga may kalabutan sa paglambo sa kinabuhi sa pag-ampo ug pagsimba sa PSL ilabi na sa tinuig nga pag-andam sa renewal kun pagbag-o sa pangatungdanan. Kining maong bag-ong han-ay sa programa sa pormasyon sa PSL nahimong opisyal niadtong tuig 1990 ug gipalig-on sa tuig 2014 diha sa “Norms and Guidelines on the Gagmay’ng Kristohanong Katilingban” nga gisugdan pag-implementar sa Nobyembre 29, 2015, Unang Domingo sa Adbiyento.
Kining tanan, gihimo aron ang PSL mahimong lig-on nga pangulo ug mapuno sa gahum sa Pulong Sa Dios diha sa iyang pagdumala sa pagsimba ug pag-ampo sa katilingban nga magsugod mismo diha sa iyang kaugalingon sa ingon mahimo siyang panig-ingnan sa pagka-aampoon ug pagkamasimbahon sa katawhan nga iyang pangulohan sa maong buluhaton. Ug sumala ni Fr. Patrice Picard, PME., kanhi Director sa John XXIII catechetical Center (JCC) sa iyang pasiuna sa tamdanan sa Seminar Alang sa PSL I nga gihikay niadtong tuig 1988: “Ang makanunayong pormasyon niining mga Alagad mahinungdanon kaayo ug dayag ang maong panginahanglan tungod kay ang ilang pagtoo kinahanglan nga palamboon ginamt ang tanang mga sarang mahimo. Kinahanglan nga hugot ang pagtoo niining mga Alagad sa gahum sa Pulong sa Dios. Unsaon man nila pagsangyaw sa Pulong nga inubanan sa gahum kon wala sila mitoo niini? Unsaon man nila pagsaulog sa Pulong nga malinawon ug malipayon kon wala sila mitoo sa gahum niini sa pagsumpo sa dautang espiritu? Kinahanglan kining Semnar sa PSL I makaatabang pagppalawon sa pagtoo sa mga Alagad aron ang Kasaulogan Sa Pulong (KSP) makapaamgo sa mga tawo sa gahum sa Pulong diha sa ilang katilingban.” (Bong Baldoza)
No Comments