Ang Pamisa sa mga Patay

Ang Nobyembre 2 mao ang petsa ug bulan nga gihatag sa atong Simbahan sa paghandom sa atong mga kaigsonan nga nangamatay na o All Souls’ Day. Ang Nobyembre mao ang kapistahan nga nagsugod sa una pang mga Kristohanon sa unang siglo diin ang mga ngalan sa mga nangamatay ginasulod sa usa ka tableta o diptychs aron sa pag-ampo. Sa ika-unom nga siglo nahimong kostumbre ang paghinumdum sa mga Benedictines monks diha sa ilang monasteryo sa Whitsuntide. Sa tuig 1048 A.D. si San Odilo sa Cluny nagmando sa iyang mga sakop nga handomon sa tinuig nga mga pag-ampo ang mga minatay nganha sa iyang monasteryo ug kongregasyon. Kini maoy hinungdan nga mikatag ngadto sa mga lain-lain nga kongregasyon sama sa Benedectines ug Carthusians (cf.Catholic Encyclopedia / newadvent.com), ug hangtud karon ato kining napanonod nga kostumbre.

Ang pag-ampo sa minatay usa ka bililhon ug Diosnon nga buhat (2 Macabeo 12:35-46), ug dili kini kabayran ug bisan unsa ka dako nga kantidad kay atubangan sa Dios ang atong tinuod-anay nga pag-ampo ang iyang gikinahanglan ug dili ang kwarta. Ang taas nga pag-ampo nga atong mahatag nganha kanila mao ang pagpahalad nato ug SANTOS NGA MISA sanglit mao kini ang pinakataas nga pag-ampo. Dili mabayran ang sakripisyo nga atong gihalad alang sa atong hinigugma nga namatay. Ang kwarta nga atong gihalad nganha sa misa alang sa kalag usa ka gasa agi ug tabang nato sa materyal nga panginahanglanon sa atong Simbahan sama sa mga gamit nato diha sa misa, kuryente ug pagkaon sa mga nag-alagad. Ikaduha: Wala kitay ato. Ang tanan iya sa Dios busa dili nato ihikaw ang gamay nga kantidad nga halad alang sa mga pag-ampo sa atong minahal nga mipanaw na itandi samga butang unodnon nga atong ginagasto matag-adlaw.