PSB: ‘Ang akong Pagserbisyo Pasalamat”

Siya padayon nga nagahatag ug kadasig sa mga batan-on tungod kay nagmadaugon siya sa iyang pagsakripisyo. Taliwala sa ilang kapobrehon nagapadayon ug madasigon siya sa pagserbisyo sa simbahan. Walo ka kilometrong baklay padulong sa Parokya aron lamang makatambong sa binulan nga kalihokan ug mga miting sa mga batan-on, lisod alang sa pobreng estudyante nga nagasalig pa sa ginikanan nga makapagawas sa kantidad nga P120 alang sa pamasahe sa motor padulong ug pauli sa ilang pinuy-anan.

Apan taliwala sa kalayo sa nahimutangan sa simbahan ug sa GKK-Lupisan, ang dapit nga gipuy-an ni Aldever, padayon siyang nagaalagad sa kalihokan sa mga batan-on ug sa simbahan.

Estudyante sa Cotabato Foundation College of Science and Technology (CFCST-Katipunan) campus, si Aldever T. Apas, ulitawo, 20 anyos ang panuigon, lumulupyo sa Brgy. San Miguel, Arakan Cotabato nga nahimutangan sa GKK-Lupisan, sakop sa San Miguel Parish, Marahan, Marilog, Davao City. Anak sa mag-uuma nga pangulo ug aktibo usab nga nagaalagad sa Parokya ug sa maong GKK, si Aldever usa ka Pangulo sa Batan-on (PSB) ug nag-inusarang Altar Server sa ilang GKK.

Sa pagpangutana kabahin sa iyang gibati sa pagserbisyo sa simbahan, sumala niya, “Anaa kanunay sa akong kasingkasing ug hunahuna, ang atong Ginoog Jesus, ilabina kong magbaklay nako. Hugot ang akong pagsalig ug pagtuo nga dili Niya ako pasagdan sa akong pagserbisyo sa simbahan, kay Siya ang naghatag sa adlaw-adlaw nga grasya sa akong kinabuhi aron ako malahutay. Ang akong pagserbisyo sa simbahan mao ang akong pamaagi sa pagpasalamat sa grasya nga kanunay kong nadawat gikan Kaniya.”

Usa lang ang iyang mensahe alang sa tanan: “Kung gusto daghan ug pamaagi, kung dili, daghang rason.” (Fe Embarda | SoCCom Marahan)