Prison Awareness Sunday

Kining pagsaulog sa Simbahan sa “Prison Awareness Sunday” nagapaningkamot nga mas masabtan ug masuportahan pa nato ang ministriya alang sa mga binilanggo.

Sumala sa atong mahinumduman (nahinumduman pa ba?), ang pagtagad sa mga binilanggo, usa sa mga buhat sa kalooy nga nahisgutan sa Ebanghelyo sa Mt. 25:36 “…nagkinahanglan ako og sapot ug gibistihan mo ako, masakiton ako, anaa ako sa prisohan ug gibistahan mo ako.” Usa kini sa mga sukdanan sa paghukom sa kamaayo ug kamatarong sa mga tawo.

Mamatikdan nato nga ang mga binilanggo, sama sa masakiton, mga hubo, walay pinuy-anan, mga dumuduong, mga gigutom, kasagaran walay igong ikabalos sa pagtagad nga nadawat gikan sa uban. Kon tagdon sila, gugma ra gayud ug duyogkasakit ang naghari ug nagtulod sa matinagdanon.

Ang mga binilanggo anaa pay laing problema maoy hinungdan dili kaayo sila tagdon gawas tingali sa ilang mga kapamilya o kapuso. Mga sad-an man kasagaran sila. May mga utang ug sala sa katawhan. Makahadlok ug malisod ang pagtabang kanila.

Sa pagkatinuod, kining ministriya alang sa mga binilanggo wala kaayo matagad ug maapil sa regular nga pagpangalagad sa Simbahan diha sa GKK ug sa parokya. Diri sa atong Diyosesis sa Digos naa kitay gamay’ng paningkamot ilabi na sa Provincial Jail ug BJMP jail. Apan sa mga lungsod, murag wala na maapil.

Niining tuig sa mga kabus, angayan natong tutokan og organisahon kining ministriya kay ang gugma ni Kristo nag-aghat kanato sa pagbuhat niini.

Una, magsugod kita sa pakiglambigit sa mga nagdumala sa bilanguan ug magsusi sa kahimtang sa mga bilanggo ug bilanguan. Sa unsang paagi mahimo nga makahatag og gamay nga pagtagad sa mga binilanggo? Unsa ang mga posibleng pagtabang ang gitugot?

Ikaduha, ang pagbisita sa mga binilanggo importante kaayo, ilabi na gikan sa ilang mga kapamilya. Ang pagtinabangay uban sa mga katilingban diin sila nagagikan mapuslanon tingali aron makatabang sa pagpahigayon sa pagbisita sa ilang mga kapamilya.

Ikatulo, diha sa mga lungsod wala may bilangguan. Anaa ray gipahiluna sa detention cell sama sa anaa sa estasyon sa Pulis. Maayo nga tagaan usab og pagtagad ang mga gibutang niining lugara, bisan og kadali ra sila didto.

Ikaupat, bisan tuod dili mga bilanguan ang ilang gipahimutangan ug dili usab sila pormal nga mga bilanggo, apan sila nga napugos ug gipugos ug gipugngan nga mga biktima sa ginatawag karon nga “human trafficking” mabantayan usab unta ang ilang presensya sa katilingban, aron mapangitaan og paagi nga makalingkawas sila niining modernong nawong sa kaulipnan — child labor, domestic servitude, sexual exploitation, child pornography, ug uban pa.