(Cf. Kompendiyo sa Katekismo sa Simbahang Katoliko, 64-66)

            P: Unsa man ang matang sa panagbugkos nga anaa tali sa mga minugnang butang?

T: Sumala sa pagbuot sa Dios ang mga binuhat adunay herarkiya ug naga-agad sa usag-usa. Sa samang higayon, anaa usay kahiusahan ug hugot nga panagdugtong sa mga linalang tungod kay ang tanan nagbaton sa mao rang Magbubuhat, gihigugma niya ug gihan-ay padulong sa iyang himaya. Tungod niiini, ang pagtahod sa mga balaod nga nahipatik sa kamugnaan ug ang mga paglambigit nga naggikan sa kinaiya sa mga butang, mao, ang sinugdanan sa kinaadman ug sukaranan sa moralidad.

            P: Unsa man ang kalambigitan tali sa buhat sa pagmugna ug buhat sa pagtubos?

T: Ang buhat sa pagmugna nahingpit diha sa labaw pa nga buhat sa pagtubos, nga sa pagkatinuod nagapatumaw og bag-o nga kamugnaan diin ang tanan makaangkon pag-usab sa iyang tinuod nga kahulogan ug katumanan.

            P: Unsa may atong pagsabot sa giingon nga ang lalaki ug ang babaye gimugna diha sa “larawan sa Dios”?

            T:Tungod kay siya minugna sa larawan sa Dios, ang tawo gawasnon nga makaila ug makahigugma sa ilang Magbubuhat. Ang mga tawo mao lamang ang mga linalang sa kalibotan nga gimbut-an sa Dios alang lamang sa ilang kaugalingon ug gipatawag pag-ambit sa iyang kaugalingong diosnong kinabuhi pinaagi sa kahibalo ug gugma. Ang tanang mga tawo, kay hinimo sa larawan sa Dios, may kahalangdon isip persona. Ang persona dili butang kon dili tawo nga makaila sa kaugalingon ug gawasnon nga makahatag sa kaugalingon ug makasulod sa panaghiusa uban sa Dios ug sa ubang tawo.