Ang Eyukaristiya ug ang Misyon sa Simbahan sa Pagpakig-diyalogo

Kaniadto, adunay usa ka propaganda sa usa ka kan-anan nga nagkanayon, kon binisayaon: Pagkig-ambit sa lamesa, pakig-ambit og higala. Ang pakigsalo dili lamang nagkahulugan og pagdungan sa pagkaon, kondili pag-inambitay ug pagbinaylaoy. Dili matawag nga panagsalo kon ang nagkauban sa pagkaon walay tingganay! Daghang maanindot nga mahitabo alirong sa talad-kan-anan. Lakip niini panagkulukabildo ug pag-inambitay, pagbinayloay sa paglantaw ug pagbati, ang pagpaminaway uban sa pagtahod ug pagpadayag nga gawasnon — nga mamahimong mosangpot sa panagsabot ug hiniusang paningkamot alang sa unsay matarong ug maayo dili lamang sa kaugalingon kondili alang sa tanan. Tawag niini: DIYALOGO.

Ang Dios mismo ang sinugdanan ug sumbanan sa pagpakig-diyalogo. Siya mismo ang nag-una diha sa pagpakighimamat sa tawo. Iyang gimugna ang tawo ug nagpili siya ug katawhan, ang Israel, nga iyang kaugalingon, gitudloan, giubanan, gitabangan ug giluwas. Apan diha kang Jesus, ang Dios nahimong tawo aron ang tawo makaambit sa kinabuhing Diosnon. Mipuyo siya uban sa katawhan, nanudlo, naminaw, nakighiusa kanila aron mahatag niya ang kaayuhan. Kining tanan kongkreto niyang gipadayag sa iyang pagpakigsalo sa katawhan, bisan niadtong gisalikway sa katilingban nga kabos ug kadtong giisip nga makasasala. Nakiglambigit siya sa tanan aron kahatagan ang tanan sa kaluwasan.

Tumong sa Simbahan, sama sa iyang magtutukod nga si kristo, ang pagpakig-diyalogo. Kini ang pagpadayag sa iyang misyon ilabi na dinhi sa Asya ug Pilipinas. Kabubut-on sa Ginoo nga iyang mga sumusunod makiglambigit sa katilingban, maminaw ug motubag sa mga naglainlaing kasinatian, mopaambit sa maayong pagtulun-an ug baruganan, aron hiniusang makapaningkamot alang sa kaayuhan sa tanan. Ang simbahan dili mahimong dili mahilambigit sa katilingban: sa naglainlaing tinuhuan ug pundok: ug sa nagkalainlaing aspeto sa kinabuhing katilingbanon; ilabi diha sa kahimtang sa kalisod, kawad-on ug kakabos.

Gitawag kini nga mamalandong sa mga nagahitabo sa kalibotan: moaninaw, mohukom, ug molihok; mamalandong, motimbangtimbang unsay angayan; ug hiniusa sa katawhan mobuhat unsay matarong. Diha sa iyang pagpanudlo mahitungod sa katilingban, subay balaang kasulatan ug doktrina sa Simbahan, ipatunhay ang kaangayan alang sa tanan, loh-onon ang pamilya, ipahigayon ang matarong nga pamulitika, atimanon ang palibot ug kinaiyahan, lamdagan ang katawhan sa maayong pamaagi sa panalapi, teknolohiya ug kultura.

Kining tanan kabahin sa ligdong, hugot ug malangkubong pagtoo, kabahin kini sa katumanan sa Diosnong sugo sa gugma. Kay kining maong pagtoo dili lamang nato tipigan sa atong kaugalingon kondili mismo ang atong ipaambit ngadto sa uban ug sa katilingban sa atong pagpakiglambigit kanila ngadto sa nagkalainlaing grupo diha sa ngakalainlaing kahimtang. Kining maong pagpakig diyalogo naggikan sa Eyukaristiya ug mobalik sa Eyukaristiya. Kining maong pagsangyaw nagasukad gikan ug mosangpot ngadto talad sa Ginoo.

Diha man god sa pagtambong nato ngadto sa talad sa Ginoo nahitabo ang atong pagpakig diyalogo Kaniya… Diha sa Santos nga Misa, gipadayag nato ngadto Kaniya ang atong kasinatian aron kita usab makapaminaw gikan Kaniya kon unsay angayang hinumduman ug malig-on kita niya diha sa pagbuhat nato sa unsay kinahanglan.  

Sa Liturhiya sa Pulong, ang Ginoo diha sa mga pagbasa gikan sa Balaang Kasulatan ug sa pagpasabot sa binasa diha sa wali, nakighinabi kanato diha sa atong tagsatagsa ka kahimtang, mahitungod sa kinabuhi ug gugma… Diha sa Liturhiya sa Eyukaristiya si Kristo mipaambit sa iyang kinabuhi, lawas ug dugo timaan sa iyang gugma aron tagbawon, ang atong kagutom ug kauhaw ug aron puypuyon ang mga kabalaka ug kahigwaos.

Diha sa Eyukaristiya gipadayag sa Dios ang iyang pag atiman nga makabuhong ug atong masabtan ang mga hinungdan sa kawad-on. Atubangan sa paghalad sa Ginoo sa iyang kaugalingon, mas nakita nato ug mapangutana ang kawalay pagpakabana, ang panghunahuna lamang sa kaugalingon ug ang kahakog sa tawo nga maoy gamut sa inhustiya. Ato usab nga maatubang ang pamaagi sa pagpangulo nga sukwahi sa panig ingnan nga Kristo nga puno sa pagpaubos ug naglantaw unsay maayo alang sa uban. Labaw sa tanan, ang Eyukaristiya nga nagpadayag sa pagkamanggihatagon sa Ginoo naghagit sa kunsumerismo ug materialismo nga nagtan-aw sa mga kabus ug huyang sama sa mga butang nga palitonon ug mga kahimanan nga gamiton lamang alang sa pagkab-ot sa mga hinakug nga mga tumong. Si Kristo gayud ang pan sa kinabuhi, kalan-on alang sa mga kabos ug nag antos nga magdala  sa tawo ngadto sa pagpaambit sa iyang kaugalingon ngadto sa kaigsoonan.

Kita nga gipaambit sa iyang lawas ug dugo mamahimong usab unta nga “kalan-on” diha sa pagpaambit sa mga gigutom. Ug gikan sa atong pagpakiglambigit sa katawhan ug sa katilingban, sa nagkalainlaing kasinatian ug kahimtang, mobalik kita sa samang talad sa Ginoo aron ipadayon na usab ang pagpaminaw kaniya ug pagpakig ambit kaniya. Niining paagiha mahingpit ang pagpakiglambigit nato sa atong kaigsoonan, sa atong katilingban ug sa tanan lakip sa kabuhatan.

Ang Eyukaristiya gayud ang dugukan ug lintunganay sa panagbinayloay: Dios nganhi kanato ug kita ngadto Kaniya, ug kita diha kaniya ngadto sa atong mga kaigssonan nga nanginahanglan. Ang pag-ambitay sa lamesa, pag-inambitay sa higala.

Pangutana alang sa pagtuon ang pamalandong atol sa pag-inambitay:

1. Unsa ang pagpakig diyalogo? Kinsa ang modelo niining maong misyon sa Simbahan? Sa unsang paagi makig-diyalogo ang Simbahan? Unsa ang ligdong, hugot ug malangkubong pagtoo? Sa unsang paagi ang Eyukaristiya usa ka kasinatian sa pagpakig diyalogo?
2. Unsay imong pagsabot sa misyon sa Simbahan? Ang imo bang misyon sa kinabuhi nahisubay sa maong pagkabinunyagan? Kumusta ang imong pagpakabana sa imong palibot: katawhan, kinaiyahan?

Sugyot nga Kalihukan:
Maghimo ug kinaugalingon nga Katilingbanong Pag-ampo sa sunod nga Kasaulogan sa Pulong alang sa mga nanginahanglan nga silingan diha sa iyang partikular nga kalisdanan.

Ang mga gasa nga dal-on atol sa kasaulogan sa sunod nga tigum mamahimong ihatag sa silingang nanginahanglan.