Suporta sa Pamilya, Korona sa Gng. Sto. Rosario

“Tan-awa ang sash. Dili lamang kita naghimo sa popularity contest. Naay mensahe kini hilabi na sa ilang pamilya. Dili sila maanaa kung walay suporta sa ilang pamilya,” kini gipamulong sa kura paroko sa Sto. Rosario Parish Fr. Roy Mejias sa Coronation Night sa Gng. Sto. Rosario 2015. Gipahigayon ang maong aktibidad sa St. Peter’s College of Toril gym niadtong Oktobre 4, tulo ka adlaw sa wala pa ang kapiyestahan sa parokya.

Matud pa sa Fund-Raising Committee Vice-Chairperson Teodoro Ardepolla, “ang 19 Ginangs nakatabang sa pagtigom ug P700,000 aron matabangan ug bayad ang 16 milyones nga kantidad sa Pastoral Center sa parokya.”

Nanghinaut ang tanan nga magpadayon ang pagtinabangay sa mga pamilya sa Toril aron makatigom pa ug pundo. “Pagahimoon ang raffle draw karong Disyembre 27. Multi-cab, tricycle ug motorcycle ang atong ipanghatag. Buot nato nga maka fundraise ug 1 milyon alang sa atong Simbahan,” panapos ni Ardepolla.

Si Norma Gonzaga gikan sa Living Hope Servant Community ang gikoronahan isip Gng. ng Sto. Rosario. Siya malipayon nga nakasuporta ug nakaserbisyo sa Ginoo tungod niining kompetisyon. Dise otso na ka tuig nga byuda ug inahan sa unom ka anak, ang iyang kahinangop sa iyang asawa wala nakapaundang kaniya aron muserbisyo isip GKK PSK, treasurer, healing minister, ug preacher. “Natingala ko nga kusgan ko karong adlawa. Salamat sa kusog nga gihatag sa Ginoo.”

Malipayon ang anak nga si Edith Lofstrand sa pagkadaug sa inahan. “Nagtinabangay ming mag igsoon. Sabi namin, manalo, matalo basta si Mama pa rin ang modelo sa tanang inahan.” Alang kang Esther, importante nga sila napud ang musuporta sa ilang inahan tungod kay, “She prays for us. Ing-ana siya karelihiyoso. Everyday mi nagarosaryo sa balay, then we gather once a month for a prayer meeting.”