House-to-House Rosary nagapadayon

House-to-House Rosary nagapadayon

Ang mga bata ug batan-on sa GKK Sta. Cruz Cervantes, sakop sa Sacred Heart of Jesus Parish, Obrero naga ampo sa Rosaryo sa matag balay nga sakop sa GKK. Kini ginahimo duyog sa pagselebrar sa bulan sa Rosaryo. Dugay na kini nga debosyon, apan buhi gihapon kini aron sa pagpamalandong sa istorya sa Kinabuhi ni Kristo uban sa iyahang inahan nga si Birhen Maria. Kini usab usa ka dakong paagi sa pagpahinumdom sa matag pamilya sa pag ampo alang sa kalinaw sa kalibutan. Ang pag ampo sa Rosaryo dakong hagit kanatong tanan isip mga binunyagan. Dinhi sa Dabaw, usa lamang kini sa pipila pa nga GKKs nga aduna pay House-to-House Living Rosary. Ang uban naa sa San Lorenzo GKK sa Matina ug sa San Vicente GKK sa Vincent Heights. (Queen Shiel Girl Mullot | SHP SoCCom)

“San Francisco, Hulagway sa Mahigugmaong Kabus Diha sa Yukaristiyanhong Katilingban”

Mao kini ang tema sa ika-21 nga kapistahansa St. Francis of Assisi sa Maa niadtong Oct 4. Tukma kayo kay naatol usab sa ika-7 ka adlaw sa nobena ang pagbisita kanila sa IEC Symbol ug relic sa krus diin gilansang si Kristo. Mahinangpon kaayo ang 34 ka GKKs nga sakop sa parokya sa pag-apil sa mga kalihokan sa pista: Ang Procession of GKK Patron Saints; Cultural Night Pistasa Baryo; Dance, Drum and Bugle demonstration gikan sa mga nagkalainlaing mga eskwelahan sa Maa ug sa mga empleyado sa mga barangay nga nahisakop sa parokya. Pagkahapon, gipahigayon ang pagbendisyon sa mga tanaman ug kahayupan.

Adunay booth nga nagbaligya ug mga handicrafts nga gihimo sa mga inmates sa Davao City Jail. Ug tungod kay pista man, naghatag ug libre nga paniudto alang sa tanang mamistahay nga moduol sa mga GKK booths ilabina gayud ang mga kabus natong mga igsoon. (MRaquel | SFAM SoCCom)

Kaparian midaug sa basketball match

Usa sa mga aktibidades nga gipahigayon duyog sa kapistahan sa parokya sa San Francisco de Asis Tagakpan mao ang basketball game nga giapilan sa Davao Clergy ug Association of Barangay Captains (ABC), niadtong Oktubre 4.

Dili layo ang mga scores gikan 1st quarter hantud 4th. Tungod sa kusog nga depensa, natapos ang dula sa iskor nga 103-94 pabor sa Davao Clergy. Matud pa ni Fr. Rene Ribac, importante ang fitness tungod dili makaserbisyo ang tawo kon dili kini fit ug healthy in mind and body.

Ang kura paroko nga si Fr. Ariel T. Celeste, OSJ nagpasabot nga “gihimo kini una, pahinungod sa kapistahan ni San Francisco; ikaduha, aron mahatagan og higayon ang mga kaparian nga magkahimamatay pinaagi sa pagdula; ug pagahugtan ang ilang panaghigalaay lakip na sa mga katawhan.” (Mary Jane Alba | SFA SoCCom)