Ang Santos nga Rosaryo

Karong bulana ang tibouk Simbahan nagsaulog sa bulan sa Rosaryo, gani ang October 7, mao ang gihatag nga adlaw sa atong Simbahan isip opisyal nga kapistahan. Kini nga kapistahan gipahinungod sa kadaugan ngadto sa atong Langitnon nga Inahan, pinaagi sa iyang panabang nga nahimong nag-madaugon ang gubat nga nahitabo didto sa Lepanto sa tuig 1517 batok sa pagpangsakop ug pagpamatay nga gihimo sa mga Ottoman Turks batok sa mga Kristiyanos diin sila napildi pinaagi lamang sa pag-ampo sa Santos nga Rosaryo, busa si Papa Pio V mideklarar nga ang Oktobre bulan paghandom sa Rosaryo (Our Lady of the Rosary).

Ang pulong Rosaryo nagkahulogan ug “korona sa mga Rosas” o Crown of Roses, ang Rosas mao ang rayna sa mga bulak maingon usab nga ang Santos nga Rosaryo usa ka Rosas sa mga debosyon, ug kini nga pag-ampo mao ang pinaka-hingpit tungod kini naga-asoy sa kasaysayan sa atong kaluwasan. Kini ilang giingon nga kapoy nga pag-ampo kay kuno balik-balik apan sama ra kini sa duha ka managhigugmaay nga tungod sa ilang gugma sa usag-usa sila walay puas nga mopadayag sa ilang gibati sa pagbalik-balik usab sa pag-ingon ug “I LOVE YOU”. Kini dili dautan kay nagapadayag lamang ikaw sa imong tinuod nga gibati maingon man usab dili dautan kung atong balik-balikon sa pag-ampo ug pagpamalandong ang mga kaagi, kasakit, kalipay ug himaya sa atong Ginoo ginamit ang Rosaryo, sama sa gibuhat ni Ginoong Jesukristo nga siya nag-ampo sa iyang Amahan nga nagbalik-balik sa samang mga pulong (Mateo 26:44).

Usa sa mga dakong akusasyon kanatong mga Katoliko mao ang pagtamod ug pag-gamit nato ug Rosaryo nganha sa atong mga pag-ampo nga kini usa daw kono ka pagano nga paagi sa pag-ampo. Apan angay natong hisayran nga kining Santos nga Rosaryo usa kini ka pag-ampo diin atong gihandom ug gipamalandongan ang mga misteryo sa kinabuhi,kamatayon ug kahimayaan sa atong Ginoong Jesukristo uban sa atong halangdon nga Inahan nga si Birheng Maria.

Ang kasaysayan sa Santos nga Rosaryo, sumala sa mga historians nagsugod nga debosyon sa mga unang Kristohanon pa, ug sa tuig 1214 A.D. ang Simbahan midawat sa Santos nga Rosaryo sa maong pamaagi ug porma sumala sa pamaagi nga atong ginagamit karon ug kini gihatag sa Simbahan pinaagi kang Santo Dominggo (St. Dominic). Iya kining nadawat pinaagi kang Birheng Maria aron kini ampoon alang sa pagkabig sa mga erehiya nga gihimo sa mga Albigensians (Albigensians Heresy), ug sa mga makasasala ug kini mao ang nahimong instrumento ug hinagiban alang sa pag-bag-o sa kalibutan.

Gani liboan na ang mga nahimong Santos sa pag-gamit lamang niini nga paagi sa Pag-ampo adunay daghang natala na sa kasaysayan nga mga milagro pinaagi lamang sa pag-gamit ug pag-ampo sa Santos nga Rosaryo.

Naa diha ang dako nga milagro sa Fatima, Portugal niadtong 1917 diin ang atong Inahan nga si Birheng Maria nagpakita sa tulo ka bata nga mao sila si Lucia, Jacinta ug Francisco, diin si Birheng Maria ang Inahan sa atong Ginoo nagpahimug-at pa nga atong itamod sa atong mga pag-ampo ginamit ang Santos nga Rosaryo aron sa pagka-kabig sa mga makasasala.

Ang Santos nga Rosaryo mao ang pag-ampo sa Ebanghelyo, pagpamalandong usab sa mga importanteng nahitabo sa kinabuhi sa atong Ginoo ug sa iyang Langitnong Inahan nga si Birheng Maria, ug si bisan kinsang mosupak niini ilabi na sa Rosaryo, sama usab nga wala nimo dawata ang Balaang Kasulatan.

Kita nag-ampo ginamit ang Rosaryo kay kini mao ang gitudlo ni Ginoong Jesukristo kanato ang Amahan Namo (Mateo 6:9-13), ug namalandong kita sa mga kaagi ug kinabuhi ni Ginoong Jesukristo (Misteryo sa KALIPAY, KAHAYAG, KASAKIT UG HIMAYA) uban sa paglitok Maghimaya ka Maria, Puno ka sa Grasya, ang Ginoo maanaa kanimo (Lucas 1:28), Bulahan ikaw sa mga babayeng tanan ug bulahan usab ang bunga sa tiyan mo nga si Jesus (Lucas 1:42), ug musunod dayon ang pag-ampo nato agi ug pangsangpit kang Birheng Maria nga unta iya tang matabangan ug i-ampo sa iyang Anak nga si Jesus sa pag-ingon Santa Maria, Inahan ka sa Dios (Lucas 1:43), ig-ampo mo kaming mga makasasala, karon ug sa oras sa among kamatayon. Ang Santos nga Rosaryo mao ang labing gamhanan nga hinagiban batok sa yawa ug makadala kanato ngadto sa tinuod nga kalinaw.

Pinaagi sa atong pag-ampo niini uban sa atong Langitnong Inahan kita makatagamtam ug dakong gasa ug makahatud ug pagbag-o sa atong kasing-kasing kay ang pag-ampo ginamit ang Santos nga Rosaryo makahatag ug kalinaw sa tibook kalibutan sumala pa sa atong Langitnong Inahan didto sa iyang pagpakita sa Fatima, 1917; ug gani si Papa Pio XII nag-ingon sa iyang Encyclical letter nga Mense Maio o In the Month of May, kini nga pag-ampo haduol ug gikahimut-an pag-ayo sa atong Langitnong Inahan ug makusganon nga girekomenda sa mga Santo Papa, maingon man usab si Fr. Patric Peyton namulong, kung ang matag Pamilya mogahin ug pag-ampo sa Santos nga Rosaryo makatagamtam ug tumang kalinaw ang panimalay. Ug kung mag-ampo kita sa Rosaryo makuha nato ang kaayohan niini, makadala ni nato ngadto sa hingpit nga kahibalo mahitungod sa atong Ginoong Jesukristo, maka-hinlo sa atong kalag ngadto sa mga kasal-anan, makahatag ug kadaugan gikan sa atong mga kaaway, ug mabuhat nato ang mga birtudes sa sayon nga pamaagi, makapakusog sa atong paghigugma ngadto sa Ginoo ug makadugang sa atong grasya ug mga merito. Busa kining pag-ampo nato ginamit ang Rosaryo, usa ka bililhon ug makatabang pagpalambo sa atong espiritohanong kinabuhi, dili kini usa ka tinumotumo lamang nga mga pag-ampo kondili kini gisubay gayud diha sa Balaang Kasulatan nga nag-asoy sa kinabuhi ug ang pagpangluwas kanato ni Ginoong Heuskristo, ug sa mga tawo nga dili modawat niini ug gani mosaway pa, kini kabahin lamang nga wala nila hatagi ug bili ug pamalandong ang makaluwasnon nga mga mensahe niini. Subay sa atong mga nahisgutan na, sila ang gikinahanglan nga atong ampoan gamit ang Rosaryo aron sa pagbag-o kanila subay sa hangyo ug awhag sa atong Langitnon nga Inahan sa iyang mga pagpadayag uban sa paghatag niya ug mga mensahe.