Gamhanan sa Pagpangalagad

Ika-29 nga Domingo sa Ordinaryong Panahon
Is. 53:10-11/Ps. 33/Heb. 4:14-16/Mk. 10:35-45

Wala pa gayod ug wala na gayo’y tawo sa kalibutan nga atong makita nga gamhanan sa pagpangalagad. Ang iyang pagkagamhanan nagsukad sa iyang mapaubsanong pag-alagad. Kini mao si Hesukristo, ang Dios nga nahimong tawo aron pagluwas kanato.

Nagtuo ang mga tinun-an nga tungod sa ilang pag-uban kang Kristo sa pagsangyaw sa maayong balita, sila makalingkod sa talagsaong lugar sa gingharian sa langit. Sila nagdahum nga tungod sa ilang pagsunod kang Kristo sila dunay pabor nga madawat unya sa langit.

Apan sukwahi ang panglantaw sa Dios. Kay bisan nasayod si Kristo nga mamahimong ilang masinati ang pag-antus nga agian ni Kristo, sila dili angay nga maghulat ug balus gikan sa Dios. Alang kang Kristo, ang gahum nga angay natong huptan mao ang pag-alagad nga mapaubsanon.

Kung kita mibati sa gahum isip ginikanan tungod kay mas hamtong kita sa atong mga anak, ato ba kahang naamguhan ang responsibilidad sa paghatag kanila ug maayong panig-ingnan? Ato ba kahang gibuhat sa dakung gugma ang pagpadaku kanila sumala sa gitudlo sa Simbahan? Kung kita mibati sa pabor nga atong nahimo isip mga pangulo sa atong GKK, atong ba kahang naamguhan nga kining maong talagsaong gasa sa pagka-opisyales sa katilingban pag-ambit sa misyon ni Kristo? Gibati ba nato nga kini atong pasalamat sa gasa ug talento nga atong nadawat gikan sa Dios? Kung kita mas dunay kahibalo ug kakayahan sa paghimo ug paghatag sa mas ubos kanato ug mas nanginahanglan, giisip ba nato nga kita mipaambit niini alang sa gihatag nga gasa sa Dios kanato?

Kung unsa man ugaling ang atong naangkon nga makaya o mabuhat o pabor nga nahimo alang sa uban, kini unta dili nato abusuhan. Kung kita dunay kahigayonan sa pagkahimong gamhanan ug nakahatag kita ug pabor alang sa uban, kini unta atong himuon uban sa kasing-kasing nga mapaubsanong mag-alagad alang sa uban. Mahimo unta kitang gamhanan diha sa pagpangalagad.