K of C misuporta sa Lasang GKK

ANG Knights of Columbus (Distrito 13, Davao North) nakigduyog sa ika-62 nga kapistahan sa Birhen sa Kasilak GKK, Purok Scorpio, Sitio Bucana, Barangay Lasang, Davao City, karong bulana. Subay sa tema, “Santa Maria, Birhen sa Kasilak, putling sumbanan sa pagsaulog sa Tuig sa Kabos,” mipahigayon ang grupo ug pipila ka kalihukan sama sa pagpanguna sa unom ka Honor Guards gikan sa Davao Nort CAN 3436 sa motorcade, ug pagpasalida sa “For Greater Glory: The True Story of Cristiada.” Kabahin ang K of C sa paghimo ug paghatag ug pinansyal nga hinabang aron kini makit-an dili lang dinhi sa atong Arkidayosis.

Mitambong sad ang K of C sa mga aktibidad sa pista sama sa Zumba ug Layko’s Night kauban ang D’Bigtym Band (Panabo Musicians Association) diin mitambong usab ang kura paroko sa St. Francis Xavier Parish, Tibungco nga si Fr. Severino A. Capulong, Jr. ug Worthy District Deputy Sir Knight Rodrigo C. Binasbas. Si Fr. Arnulfo Cubero ang nagsaulog sa GKK Fiesta Mass.

Ang Distrito 13 gipaluyuhan nila Brod. Doroteo L. Torrejas, Brod. Carlos P. Cabudlan, Barangay Captain Allan Simo-ag, ug ang nagsulat, Sir Knight Rogelio P. Andama, Jr.