Rosaryohan gikan sa kalubihan

MATI CITY –  Sa miaging duha ka bulan, gipangbansay ang kapin 200 ka mga tawo, babaye ug lalake, gikan sa nagkalainlaing mga Gagmayng Kristohanong Katilingban (GKK)sa Parokya ni Santiago Apostol sa Cateel, Davao Oriental, sa paghimo og mga rosaryohan gikan sa mga nanga-ibot nga kalubihan sa bagyong Pablo.

Nikabat na karon sa 235 ka mga manghimoay og Rosaryohan sa parokya nga naghugpong ilawom sa pangalan sa ilang pundok nga St. James the Apostle Handicraft Association, pinangulohan ni Yaddi Andrade.

Matud ni Andrade, gipunting sa ilahang pundok ang paghimog 50,000 ka buok ka Rosaryohan nga gi-order na sa ubang mga nasud, samtang ang ilang nahimo gatus-gatusan ka buok pa lang tungod kay wala pa silay kaugalingong mga makina sa paghulma sa himuonong Rosaryohan gikan sa natumba nga mga kalubihan.

Ang Philippine Coconut Authority (PCA) pinaagi ni Mr. Rolando Edquila nagpadala na og makina aron temporaryong magamit sa mga gipangbansay aron sa paghulma sa mga gipangtuhog nga Rosaryohan nga hinimo gyud gikan sa mga tabla sa mga nanga-ibot nga lubi sa pagbagyo sa miaging Disyembre 4, 2012.

Ang Rosary-making gisuportahan sa Brotherhood of Christian Businessmen of the Philippines (BCBP), Fiber Industry Development Authority (FIDA), Department of Trade and Industry (DTI), ug Philippine Coconut Authority (PCA).

Ang katapusang pagbansay sa paghimog rosaryohan gipahigayon sa parish seminar house niadtong Hunyo 4-5, 2013, ug kini gitambongan usab sa mga representante sa mga ahensya nga nagasuporta niini, ingon man mga opisyales sa Building Back Better (BBB) Movement nga programa sa probinsiya sa pagpabangon sa panginabuhian kon livelihood program alang sa mga biktima sa bagyo sa Davao Oriental; ang BBB anaa ubos sa superbisyon ni Marciano Tapiador, Jr.. (@dcherald)

By Sr. Marietta Alo, OND/Contributor