Ang mga GKK ug ang Bokasyon

Nagkinahanglan ba og Pari ang GKK?

Sa mga GKK nga nagasaulog sa Pulong matag Dominggo, anaa kanunay ang kamatngonan sa panginahanglan sa Pari nga magmisa uban sa GKK kon naa pa unta. Apan kay wala man, nagsaulog na lamang sa Pulong nga nagahandum sa pagkaanaa sa Pari pohon. Ug mao gayud kini ang gipangiliyupo nila sa ilang paghandum sa pagkanaa sa Pari.

Dayag kaayo kanila ang panginahanglan sa Pari alang sa Misa. Ang Misa gayud unta ang angay nga saulogon nila sa adlaw Dominggo. Ang Kasaulogan sa Pulong, nga gitugot lamang kanila nga maglisod gayud sa pagsaulog sa Misa, dili gayud makahulip sa kasaulogan sa Misa nga gipangulohan sa Pari. Ang Misa maoy nagatukod ug nagaumol ug nagapalambo sa GKK, kay si Kristo ang batong sukaranan ug lintunganay sa GKK. Ang Pari maoy nagtindog alang kang Kristo, ang Pangulo sa Simbahan ug bugtong tigpataliwala tali sa Dios ug tawo.

Daghan kaayo sa atong mga GKK ang panagsa ra gayud makasaulog sa Misa. Sa mga okasyon nga dunay Misa ang mga kabataan nga nageskwela dili gihapon maka-apil maoy hinungdan nga kulang kaayo ang ilang kasinatian sa Misa. Nagadako sila, ug mohamtong nga kulang kaayo ang pagtagad sa Misa, ilabi na ang mga lalaki.

Ang Bokasyon dili man lamang alang sa pagkapari ug relihiyoso. Alang usab kini sa ubang mga laing panginahanglan sa Kristohanong katilingban. Anaa usab ang bokasyon sa pagalagad isip mga Katekista, mga Pangulo sa Pag-ampo ug Pagsimba, mga Pangulo sa Alagad. Anaa usab ang bokasyon sa pagdumala isip mga opisyales. Kining tanan nga pagpangalagad sa Simbahan kinahanglan og pagtoo, paghiguma, ug pagsunod kang Kristo.

Kon kulang sa mga Bokasyon nga ginadawat ug ginatubag sa mga sakop sa GKK, ang kakulang sa hamtong nga pagtoo ang hinungdan. Walay lain nga kasulbaran ini gawas sa mapadayonong pagumol sa pagtoo pinaagi sa Evangelization ug Katekesis alang sa iyang mga ginsakpan, diha sa mga pamilya, sa cluster, ug sa zona.

Busa, unsay mahimo ug angay nga himoon? Natural kinahanglan ang pagusab sa ginapaninguhaan sa GKK. Mobalik gayud kita sa pagtagad sa pagumol sa pagtoo diha sa pamilya:

1. Atimanon ug ubanan og maayo ang mga nangandam alang sa kaminyoon diha sa inyong GKK.
2. Ang mga magpabunyag sa ilang mga anak tabangan aron makapangandam og maayo.
3. Mapadayonon nga pagbisita ug pagawhag sa mga magtiayon ilabi na ang dili kaayo aktibo sa Simbahan.
4. Atimanon ug tabangan ang mga pamilya nga anaa sa spesyal nga kalisod.
5. Magpadayon nga tabangan ang mga ginikanan sa pagumol sa pagtoo sa ilang kabataan pinaagi sa mga kalihokan alang sa mga bata ug batan-on, kay sila ang dakong bahin sa atong Simbahan.
6. Ang makanunayong pagsaulog sa Misa ug ubang sakramento ipahigayon sa mga opisyales sa GKK uban sa ikang Pari
7. Magtinabangay ang tanan nga nangatungdanan sa GKK uban sa zona ug parokya sa pagpahigayon sa tanan alang sa pagtukod ug paglambo sa diosnon ug sulondon nga pamilya.

Ang GKK wala gitukod ug ginapalambo alang sa debosyon ug kapistahan lamang sa mga Santos nga Patron. Ang GKK gitukod aron mahimong instrumento ug sakramento sa kaluwasan alang sa katawhan, mahimo siya tuburan sa kinabuhing dayon nga malipayon, masaksihon ug malaumon. Ang mga nagkalainlain bokasyon sa pagpangalagad gikinahanglan, ilabi ang bokasyon sa Pagkapari ug Kristohanong Kaminyoon. O Ginoong Jesus, Birheng Maria, ug San Jose, iampo kami ug panalangini kami.