Lay Adorers Suportado sa Simbahan

Gihagit ni Arsobispo Romulo G. Valles ang tanang mitambong sa ikaduhang Adoracion Nocturna Filipina (ANF) Regional Congress sa Arkidayosis sa Davao ug mga diyosesis sa Digos, Tagum ug Mati (DADITAMA) nga himuong “first class” sa kanunay ang pagsaulog ug pagtambong sa Balaang Eyukaristiya tungod kay “ang presensya ni Hesus mao man ang gisaulog.” Nanghinaut pud siya nga mapaabot pa sa layong dapit ang recruitment aron mas daghan pa ang muapil sa kalihukan. “Dili lang unta sa sentro, manaka ta sa bukid…ipaabot sa tanang corners sa parokya kining inyong pagbihilya kay Hesus.”

Tumong sa panagtapok mao ang pag-ilhanay sa mga laykong miyembro, ug pag-andam sa umaabot nga International Eucharistic Congress. Duyog sa tema nga “Eucharist: Source and Summit of ANF life,” ang aktibidad niadtong Septembre 12 sa Social Hall sa University of Southeastern Philippines (USEP) panahon usab sa paghisgot sa mga kasamtangang krisis nga ginaatubang karon sa mga “turno” kon grupo sa “adorers” sama sa pagkunhod sa membership.

“Nanghinaut mi nga ang mga nangawalang Turno sama sa 1162 sa Talicud Island mahibalik,” matud pa sa Archdiocesan ANF Coordinator Bro. Josito Cambarijan. Isip miyembro sa ANF sukad 1996, pangandoy ni Cambarijan nga magpadayon pa ang grupo ug mahibalik ang mga monthly Eucharistic vigils sa tanang turno uban sa suporta sa mga parokya kay “di jud kabayran ang kalipay sa pagbihilya, busa kami nga mga miyembro gidawat ang hagit ni Abp. Valles.” Ang ANF Davao Regional Council President Bro. Sofronio Cruz mibungat ug mga rason sa nagkahinay nga partisipasyon sama sa “kalay-on sa balay sa sentro/parokya, di maayo nga panahon, problema sa balay, ug kakulangan sa hustong pagtoo sa Sakramento.”

Nanghinaut usab ang ANF Spiritual director nga si Fr. Leonie España nga ang congress “…makahatag kanila ug lawom nga pag ila og paghigugma sa Eyukaristiya.” Importante alang kay Fr. España nga suportahan sa Simbahan ang ANF tungod kay, “Bunga sa ilang pagka adorer nahimo silang aktibo diha sa nagkalain-lain nga apostolado. Ang uban nahimong gift bearers, lay ministers, readers, ug active ministers.” Naglaum siya nga mas mudoble pa ang mutambong sa sunod congress. Kung mahitabo kini, “meaning ning double or ning increase pud ang awareness sa mga parokyano sa devotion to being an adorer and a member of ANF.”

Gipasabot ni Fr. Jorge Angga, nga ang tumong sa maong congress mao ang pagpakigsayod, pagporma ug pagbag-o sa mga adorador sa Katolikong pagtulon-an. Si Fr. Dexter Veloso midugang: “Si Hesus ang inspirasyon sa maong kalihokan, kung dinhi sa ato walay forever, kang Kristo adunay forever – ang iyang kahayag. Magpadayon kita sa pagdawat kang Kristo sa Eyukaristiya.” Si Fr. Kim Cossid, kura paroko sa Sto. Rosario Parish (Malita) nagkanayon, “Ang kura paroko jud mismo ang manguna sa adorasyon, aron nga madasig usab ang katawhan nga motambong ug masinati pag-ayo si Hesukristo.”

Una nahuman ang kongreso, nagpasabot ang ANF National Spiritual Director Rev. Fr. Manuel M. Flores sa kamahinungdanon sa suporta nga ihatag sa layko. “The laity is the Church served by the clergy. There is only 1 priest in every 11,000 Catholics. It is 99.9% laity. There is only 1 priest in 5,500 males. The ANF purpose is to know, love, adore, serve, proclaim Jesus in the Holy Eucharist. Ang effort since I came is Formation. Formation. Formation.”

Ang ANF usa ka organisasyon sa mga lalaki ug babaye nga layko. Tumong niini mao ang pagporma ug mga adorers nga mag-ampo, magtukaw alang kang Kristo. Sa paglabay sa panahon, aduna nay mga babae nga nagpamiyembro niini. Ang ANF magsaulog sa ika-100 anibersaryo sa tuig 2020. (Janin Langoy | Cheryl Vilog)