Kayano ni San Nicolas Buot Pamarisan sa Katilingban

Aktibo ang mga miyembro hilabi na ang mga batan-on sa San Nicolas de Tolentino GKK, El Rio Vista (Phase 5), sakop sa Assumption Parish, Davao City pagsugod pa lamang sa Fiesta Novena pag abli niining bulana. Human sa novena, adunay Kasaulogan Sa Pulong (KSP) nga gipanguluhan sa mga Pangulo sa Liturhiya (PSL) gikan sa mga kasilinganang GKKs. Ang kapistahan gisaulog sa maong GKK niadtong Septembre 10 diin misa-pasalamat ang unang aktibidad nga gipangunahan ni Rev. Fr. Andres Malawis, SSS. Gipaambit sa naasoy’ng pari ang kinabuhi ug birtud ni San Nicolas nga taga Tolentino, Italya. Matud pa nga ang maong monghe nabantog sa iyang dedikasyon sa pag-alagad sa mga masakiton.

Ang maong pangilin giduyugan sa kasadya tungod sa liga sa Basketball, parlor games ug uban pa. Ang Pangulo Sa Katilingban (PSK) Achilles Carumba nagpasalamat sa mga opisyales ug miyembro tungod sa kalampusan sa mga buluhaton. “Nanghinaut ako nga ang inyong pag-alagad ug pagpakabana magpadayon ilabi na sa inyong moral, pinansyal og ispiritwal nga suporta. Sigurado ako nga sa atong hiniusang paglambigit sa panahon sa kapistahan man o mga kabilinggan, si San Nicolas sa kanunay nalipay og kita paulanan niya sa daghang panalangin,” matud pa niya.

Si San Nicolas maoy patron sa mga nagsabak og manganakay. Siya ang napili sa katilingban tungod kay wala kini kapangalan sa mga GKKs nga duol sa parokya, ug nga sila gustong muduyog sa kayano ug kalumo sa maong santo. (Carolina Carumba)