Ang Krus ug Pagpanguros

ALANG kanatong mga Katoliko ang Krus may dakong kalambigitan sa atong espirituhanong kinabuhi, ang atong pagtamod sa Krus ni Ginoong Jesukristo nagatimaan nga kita Kristiyanos ug ang atong tibook kinabuhi anaa kaniya. Kay ang Krus maoy gigamit nga kahimanan pagpatay sa atong Ginoo aron pagtubos kanato (Mat.27:35).

Nasayod kita nga pinaagi sa kamatayon ni Ginoong Jesukristo sa Krus nakabaton kita ug kaluwasan (Fil.2:8, Mat.20:28), kay ang pag-ula ni Kristo sa iyang bililhong dugo maoy nakapahinlo kanato sa pagka-ulipon sa kasal-anan (1 Ped. 1:18-19), mao nga ang Krus alang sa mga nagkalaglag usa kini ka binuang, apan alang sa mga ginaluwas gahum kini sa Dios (1 Cor. 1:18).

Ang Krus ni Kristo alang natong mga Kristiyano simbolo sa gugma ug kalooy sa Dios. Si San Pablo miingon: “kay alang kanako nagpasigarbo lamang ako sa Krus sa atong Ginoong Jesukristo, kay pinaagi sa iyang Krus patay na ang kalibutan ug ako patay na alang sa kalibutan…ug tungod sa Krus ni Jesus akong lawas ulipon nganha kaniya” (Galacia 6:14,17). Busa ang Krus ni Kristo ato kining itamod kanunay sa atong kinabuhi timailhan nga kita gibugkos ug misunod kaniya (Mat.16:24).

Angay ug takos nga tawagon kita ug Kristiyanos, kay ang Krus timaan sa pagka-matuod nga Kristiyanos. Ang pagpanguros mao ang pagpadayag sa duha ka importanteng misteryo sa atong pagto-o isip Kristiyanos, Una, mao ang pagpadayag nato sa misteryo sa Santisima Trinidad. Ikaduha, mao ang pagpadayag sa pagpangluwas.

Sa dihang moingon kita ug “SA NGALAN” atong gipadayag ang kamatuoran nga adunay USA lamang ka DIOS (1 Cor. 8:6), ug sa dihang moingon usab kita ug “SA AMAHAN, ANAK UG ESPIRITU SANTO”, atong gipadayag diri ang tulo ka managlahi nga Persona sa Dios (Mat. 28:19-20). Sa dihang atong i- porma ug Krus sa atong lawas dungan sa paglitok sa ngalan sa Amahan, sa Anak ug sa Espiritu Santo dinhi atong napadayag ang dakong kamatuoran nga ang anak sa Dios nagpaka-tawo, nagpasakit ug nagpa-kamatay aron pagluwas kanato pinaagi sa Krus.

Ang Krus maoy gigamit nga kahimanan aron pagluwas kanato (Mat. 27:35), mao nga si San Pablo nag-ingon nga ang Krus alang sa mga ginaluwas gahum kini sa Dios, apan lang sa mga nagka-laglag usa kini ka binuang (1 Cor. 1:18).

Ang Krus gihimaya ug gipasigarbo sa uban sa pagpatik sa lawas (Gal, 6:14,17), mao nga ang Pagpanguros timaan nga kita iya ni Kristo ug kita matuod nga Kristiyanos, kay ang pagtimaan nato sa Krus agi ug pagpatik sa lawas simbolo sa pagluwas kanato, mao nga angay natong hinomdoman, sa timaan sa Krus makuha nato ang mga panalangin sa Dios ug maprotektahan kita batok sa mga katalagman ug uban pang kadaut ma-ispiritwal man o ma-pisikal. (Ezequiel 9:4-6).