IEC 2016 Dungan nga Ilusad sa Tibuok Arkidayosis sa Dabaw

Dungan nga ilusad sa tanang simbahan sa Arkidayosis sa Dabaw adlaw’ng Domingo, Septembre 13, 2105 ang pag-abli sa mga kalihukan hangtod ang gitakdang International Eucharistic Congress 2016.

Sa Circular letter ni Arsobispo Romulo G. Valles, D.D. gi-aghat ang tanang mga parokyano nga makighiusa sa mga kalihukan alang sa IEC 2016. Sa tanang mga misa sa Domingo, i-ampo ang IEC Prayer, kantahon ang IEC 2016 Theme Song, ug ipasundayag ang Primer, mensahe ug ang Piso Para sa Misa ng Mundo Fund Campaign sa usa ka AVP nga gi-andam sa Archdiocesan Liturgical Center.

Matud pa ni ALC Director Fr. Joel Caasi sa iyang report sa Davao, Digos, Tagum and Mati (DADITAMA) meeting niadtong Septembre 3, ang IEC usa ka internasyonal nga panagtigom aron mapasabot pa ang kahalangdon sa Eyukaristiya isip sentro sa kinabuhi ug misyon sa Simbahan. “This is a pause. Muhunong kita kadali aron magsaulog ug mag ampo. Sama sa giingon ni San Pablo, we only have one affiliation — si Kristo lang. Gibalik ta niya sa sentro, so embrace the future with hope,” pagpasabot ni Fr. Caasi subay sa tema gikan Colossians 1:27: “Christ in You, Our Hope of Glory.”

Isip pakighiusa sa tibuok Katolikong Simbahan, andam na ang Arkidayosis sa Dabaw alang sa pag-abot sa International Eucharistic Congress (IEC) symbol nga ituyok sa mga piling parokya sulod sa kinse ka adlaw gikan Septembre 29 hangtud Oktobre 3, 2015. Pagadawaton kini gikan sa Dayosis sa Tagum ug himoon ang unang bihilya sa Parokya sa San Jose, Sasa.

KATEKISMO UG ‘PISO PARA SA MISA NG MUNDO’
Sa wala pa gituyok ang IEC symbol, pipila na ka mga aktibidades ang nasugdan na sama sa katekismo tinabangan sa John XXIII Catechetical Center (JCC). “Mikonekta kita sa JCC aron sa pagpatigayon sa katekismo sa IEC sa mga eskwelahan, parokya, dayon ngadto sa GKKs. Pagpangandam usab kini sa Tuig sa Eukaristiya ug Pamilya sunod tuig,” dugang ni Fr. Caasi.

Ug kay kini nanginahanglan man ug igong pundo, nagapadayon usab ang Piso para sa Misa ng Mundo. “Kung moingon ta sa Piso, dili lang kini gibuhat sa Pilipinas kondili sa ubang lugar sa tibuok kalibutan sama sa North America, Canada, ug Europe… matag diocese, mu-remit. Sa update sa building sa Cebu, 82.3% na ang completed. Hope mapadagan pa ni sa mga parokya ug mga eskwelahan. “Nagkuha mi ug daghang boxes. Sa mga gusto pang magkuha, makahatag pa. There is no definite deadline yet as to submission.”

DELEGASYON
Duha ka klase ang delegasyon: official ug non-official. “Ang mga benepisyo nga makuha sa mga official delegates mao ang entrance to all activities, IDs, pagkaon, accommodation (per diocese). Sa Davao, nakakuha ta ug 1 ka hotel, packaged…Sa mga non-delegates, mamahimo silang makaapil sa mga activities sama sa opening and closing mass, apan dili sila makasulod sa complex diin pagahimuon ang mga talks kay ‘seating capacity’ man,” pagpaklaro sa ALC Director.

“P’werteng huota sa Cebu that time because of the Sinulog. Aside from that, naa pay exhibits open to the public until February 8. Busy daw ang Cebu…Prior to the IEC, aduna puy IEC Theological Symposium alang sa mga invited bishops, professors on a separate registration, January 20-22. “Ang mga speakers, prominent. Those interested can register online — www.iec2016.ph or email: info@iec2016.ph,” panapos ni Fr. Caasi.

Ang Archdiocesal Liturgical Center (ALC) mao ang pastoral agency nga gitahasan sa pag-organisa ug pag monitor sa tanang mga aktibidad dinhi sa Simbahan kabahin sa IEC.

Ang IEC nga nagsugod sa Lille, France niadtong 1881, ginasaulog kada upat ka tuig. Ikaduha na kining pagsaulog sa Pilipinas sukad 1937 sa Manila. Kahinumduman nga sa ulahing adlaw sa IEC sa Ireland niadtong Hunyo 17, 2012, gianunsyo ni Pope Emeritus Benedict XVI nga ang Cebu ang sunod nga mugunit sa dakung selebrasyon.