Ang Kristohanong pamilya ug ang bokasyon

Human kita maghisgot sa miaging isyu sa Sugid, mahitungod sa pag-ampo alang sa bokasyon, karon ang kaakuhan sa Kristohanong pamilya bahin sa bokasyon atong hisgutan.

Magsugod kita sa kahimtang sa bokasyon karon. Sa usa ka bahin, sumala sa datos sa diyosesis, aduna kitay mga 1,260 ka mga GKK sa tibuok diyosesis nga nasakop sa 29 ka parokya ug mga mission stations. Kon kapin kon kulang 30 ka pamilya matag GKK, mokabat sa 37,800 ka pamilyang Katoliko nga naglangkob sa atong diyosesis.

Apan sa laing bahin, gikan niining 37,800 ka pamilya duna lamang, kapin kon kulang, 15 kapin ka batan-ong lalake nga mosulod sa Seminaryo nato matag tuig sa miaging 14 ka tuig. Sa kombento sa mga Relihiyoso, samot pa jud ka gamay. Kapin kon kulang, mga 1-3 ka mga kandidato ang mosulod sa kombento. Dako kaayo ang agwat, dili ba? Ingon niini ang krisis sa bokasyon sa atong panahon.

Gamay kaayo ang gidaghanon nga, bisan na lang mosulay, nga motubag sa tawag sa Ginoo ngadto sa pagkapari ug pagkarelihiyoso. Apan, gikan sa mao ra gihapong mga pamilya, pila ang nagtinguha nga magmaestra, magnurse, magkomersyo, magcomputer technician, agriculturist, magpulis, magenhinyero, seaman, welder, kusinero? Daghan kayo, dili ba?

Ngano man ang kahimtang ingon niini? Tungod ba kaha kay gamay ra gayud ang gipili ug gitawag sa Dios alang sa ministriya sa Simbahan? Nga wala nakamatngon ang Ginoo sa kagamay nilang nidawat sa bokasyon? Makatuo kaha kita nga mao kini ang hinungdan? Ako, dili ko motoo.

Ang krisis sa bokasyon sa Simbahan, nagpahayag lamang sa nagpailawom nga krisis — ang krisis sa pagtoo sa Dios ug sa kinabuhing spiritohanon. Dili kita matingala niining maong kahimtang. Dakong porsyento sa mga binunyagang Katoliko wala pa mihamtong sa pagtoo ug dili aktibong nangilabot sa kinabuhi sa Simbahan. Sumala sa pakisusi, 8 sa matag 10 ka pamilya dili mga aktibong Katoliko.

Sa laraw sa Dios, ang pamilya maoy natural nga sinugdanan sa relihiyosong bokasyon, tungod kay siya ang Simbahan diha sa pamilya. Ang kristohanong pamilya maoy nagahatag og maayo ug saktong kahimtang diin mahimugso ang bokasyon sa pagkapari ug pagkarelihiyoso. Gikan sa matoohong magtiayon ang pagmatuto sa pagtoo sa ubang miembro sa pamilya mao gayud ang maayong pagpangandam sa yuta diin mapugas ang mga binhi sa bokasyon ug paminawon ug malipayong dawaton ang maong gasa gikan sa Dios.

Ang pag-ampo alang sa bokasyon kinahanglan anaa na diha sa pamilya. Ang amahan ug inahan kanunay abli sa gasa sa kinabuhi nga gitagana sa Dios alang kanila ug kanunay mapasalamaton sa maong gasa. Uban niini mao ang dayag nilang pagpahayag sa Dios nga malipayon silang modawat ug mosuporta sa ilang mga anak mga tawgon sa Dios kon ugaling kini maoy Iyang pagbuot.