Si Chit ug ang Misang Makalangit

“Come with praise people of God, come with your heart’s thanksgiving.”

Mao kini ang kantang misugat sa mga nagsimba Sabado sa hapon didto sa parokya sa St. Francis of Assisi Parish, Ma-a. Nindot kaayo ang pagkanta sa choir ug labaw pa gyud nga nindot tungod sa pagduyog sa organ. Tibuok misa murag naa sa langit. Paghuman sa misa, miduol ko sa choir aron i-congratulate. Akong nasayran nga ang organist diay medyo edaran na nga babaye ug maglisud na gani sa pagsaka sa taas nga staircase diin nahimutang ang choir.

Si Mrs. Chit Suarez, 74 na ang edad, nagserbisyo sa parokya sukad pa sa pagtukod niini mga 19 ka tuig ang milabay. Ingon niya sa San Pablo siya nag serve kaniadto sa wala pa ang St. Francis. Sa ato pa, mga 30 ka tuig na siyang nagserbisyo. Karon hamtong na siya, apan wa gihapon kini mihunong sa pagtugtog kada adlaw. Gani, ihatud nalang kaniya ang “Holy Host” kay maglisud naman siya sa hagdanan. Kung dili siya muduyog, usa pud siya ka Eucharistic Minister of Communion (EMC). Abtik siya nga leader sa Catholic Women’s League (CWL) ug nag sponsor pud ug mga scholar nga mga kabus.

“Nagpasalamat ko sa Diyos sa chance nga gihatag niya nga nakaserve ko sa iyaha,” matud pa ni Ma’am Chit kinsa gusto nga magpadayon sa pag alagad hangtud sa makaya pa sa iyang lawas, ug ikatugot pa sa Ginoo. (Marian Carmela Raquel | SFDA Soccom)