Ang Tinuod nga Pagtoo

Ika-24 nga Domingo sa Ordinayong Panahon
Is. 50:5-9/ Ps. 116/ James 2:14-18/ Mk. 8:27-35

Ang binasa karong Dominggoha nagpadayag sa dangatan sa usa ka propeta nga mohalad sa iyang kaugalingon sa Diyos. Andam siya moatubang sa mga tawo uban sa pagsalig nga dili modaut ug magpakaulaw kaniya kay siya kumbinsido nga ang Diyos nga si Yahweh dili gayod mubiya kaniya.

Sa unang pagbasa giingon, “Ang Dios molaban… ug ania siya sa akong duol.” Mao usab kini ang pangutana ni Hesus sa iyang mga tinun-an kung kinsa siya para kanila? Ang tubag ni Pedro ikaw mao ang Mesiyas (Markos 8:29). Si Hesus nag ingon: ang Anak sa Tawo mag antos ug ang buot magsunod kaniya mag antos usab sa pagpas-an sa iyang krus. Dili usa ka pulong kundi usa ka pamaagi sa pagpuyo sa kinabuhi. Sa sulat ni Santiago Apostol, “Pakitaan ko ikaw sa akong pagtuo diha sa akong mga buhat” (San 2:18).

Nindot ug dakong hagit ang pagsunod kang Kristo. Una sa tanan, kinahanglan ang pag ila sa personal o suod nga pagpakighigala kaniya. Kay kundili suod, lisod ang paghalad sa kinabuhi. Ikaduha, ang pagka-Kristiyano, usa ka “lifestyle” kun pamaagi sa kinabuhi diin kabahin niini ang pagsagubang sa mga unos ug kasakit nga masinati. Dawaton nato kini sa tanang panahon ug tanang panghitabo adlaw-adlaw bisan asa man kita. Ikatulo, ang kristiyanismo konkreto nga pagkinabuhi kay kung dili mapuy-an, kawang lamang kini ug mahimo kitang bakakon.

Mag-unsa kaha kita sa atong panahon karon?

Sumala ni Santo Papa Francisco, tabangan nato ang mga kabus ug kitang mga Kristiyanos maglihok diha sa pag-alagad. Dili kini bag-o diha sa atong pandungog. Apan tinuod ba kaha nga daghan pa ang naglisod sa pagpalit sa bugas, tambal ug pagpaeskwela sa ilang mga kabataan?

Tinuod ba kaha nga daghang mga kabataan nalambingit sa droga ug pagbaligya sa lawas para makakwarta? Tinuod ba kaha nga daghang mga pamilya nga nagkabungkag ug wala nay kahulugan sa pagpuyo diha sa panimalay tungod sa away ug walay maayong relasyon?

Daghan pang mga panghitabo sa atong palibot. Apan tinuod ba usab nga karon daghang mga tinuod nga Kristiyanos — mga sumusunod ni Kristo nga mubarog sa pagtabang sa problema o kasakit sa katawhan? Dili lamang sa pulong kondili diha sa buhat. Kini ang atong kalipay sa pagpaambit diha sa pagtuo nga makita sa buhat sa pagpaambit sa panahon, bahandi, talent, ug uban pa. (Fr. Jose Marie Z. Escuadro, D.C.D.)