Krusada sa Pagrosaryo og Paghalad

“Gugma, Duyog Kasakit Sa Mga Kabus Alang Sa Mga Kabus”

Sulod niining tuig sa mga Kabus, ipahigayon ang ika-3 Diyosesanong PSAM-Caritas Convention sa atong Diyosesis sa Digos karong umaabot nga Agosto 29, 2015. Ang tema sa panagtigom- “Gugma, Duyog kasakit sa mga kabus, alang sa mga kabus.”

Higayon na usab kini una, sa pagdinasigay diha sa pagpangalagad ngadto sa mga nanginahanglan. Ikaduha, angayan usab ang hiniusang pagpasalamat sa Dios, kinsa pinaagi sa Simbahan, naghatag sa higayon aron makaalagad sa kaigsoonan. Ikatulo, dako usab nga kahigayunan sa pagbag-o sa pagtahan sa kaugalingon alang niining talagsaong ministriya sa gugma ug kalooy. MALIPAYON UG MABUNGAHONG CONVENTION SA TANAN!

Agi’g pagpangandam niining panagtigom, ginahimo ang “vicarial” assembly sa mga Psam-Caritas aron sa dugang pagpatin-aw ug pagdasig sa pagpahigayon og maayo sa ministriya sa gugma ug kalooy sa matag parokya. Ang tumong niining kalihokan mao nga makakaplag ug dugang ug batan-onn pang lumilihok nga bolontaryo alang sa lainlain programa sa maong ministriya. gikinahanglan usab ang pagpili sa maayo ug kasaligan nga “parish core group.” Sa ingon, aduna siya’y kaugalingong kinabuhi ug kaigmat nga dili lang mag-agad sa pagdasig o pagsuporta sa nagkambyo-kambyo nga mga Pari nga magdumala nila sa parokya.

UBAS
Sa Psam-Caritas nga diyosesanong panagtigom, ang Provincial Director sa Department of Interior and Local Government (DILG), nga si Mr. Abito Bernasor usa sa mga mamumulong, nga maghisgot gamay bahin sa giplano nga Ugnayan ng Barangay at Simbahan (UBAS). Ako na ning nalakbitan niadtong sa milabay nga mga artikolo sa Daditama. Kining UBAS, programa nga gipangunahan sa DILG, sa panahon pa ni Sec. Jesse Robredo, kinsa namatay sa aksidente niadtong tuig 2012.

Gituyo sa maong programa ang paghatag og dugang pagdasig ug higayon sa mga lungsuranon nga mangilabot sa mga kalihokan sa Barangay. Sa lain bahin, gituyo usab sa UBAS nga madasig ang kamugnaan sa kultura sa responsableng pagpangilabot sa mga ordinaryong lungsuranon ug sa mga namunoan sa kinabuhi ug pagpadagan sa Barangay, alang sa kalinaw ug kaugmaran sa tanan.

KRISTOHANONG DALAN SA POLITIKA
Usa sa mga tagaan og tutok sa Psam-Caritas, karong tuig ug sa sunod, mao ang pagsalmot ug pagpangilabot sa politika sa mga magtotoo. Nagsingabot na ang lain na usab nga nasudnon ug lokal nga piniliay sa sunod tuig 2016. Kinahanglan magsugod na usab kita sa pagpangandam alang sa makahuluganon, mabag-ohon nga pagsalmot pinasikad sa lamdag sa Ebanghelyo ug pagtulun-an sa Simbahan.

Kahiusahan, Gugma, Kagawasan, Katarong, Kaayuhan sa tanan, ang pipila ka mga Kristohanong hiyas nga pagatagaan ug pagtagad niining Kristohanong paagi o dalan sa Politika. Nagkinahanglan kini sa pagbag-o sa tanang lungsuranon, ilabi na ang mga politiko. Gikan sa politika sa pagkabahin-bahin ngadto sa politika sa kahiusahan. Gikan sa Politika sa pipila lamang nga pamilya ngadto sa politika nga malukpanon ug masalmoton.

Alang niining tumong, nagpahigayon na og tulo ka adlaw nga pagtuon, pamalandong ug pag-ampo bahin sa Kristohanong pagsalmot sa politika ug panggamhanan. Himoon kini sa Setiyembre 17-19, 2015. Adunay mga taga Dilaab Foundation, pinangulohan ni Fr. Carmelo Diola nga moanhi sa Digos aron paggiya niining pamalandong.