47 Ka Mga GKK Misubli sa Panaad

Subli nga misaad sa ilang pagpangatungdanan ang mga pangulo sa nagkalain-laing ministriya sa 47 ka Gagmayng Kristohanong Katilingban (GKK) nga sakop sa Parokya ni San Miguel sa Panacan niadtong  Hunyo 9, 2013. Mipadayag ang Kura Paroko nga si Fr. Jhun Gimeno sa iyang kalipay ug pasalamat ngadto sa mga pangulo tungod sa ilang gipakitang dedikasyon ug kakugi sa ilang pagpangalagad. Nanghinaut usab siya nga sa pagpadala kanila (send-forth) pagbalik ngadto sa ilang GKK magpabilin silang madasigon kanunay nga mosuporta sa ilang katilingban ug alang usab sa kalamboan sa parokya ug sa kinatibuk-ang simbahan.

Atol usab sa maong adlaw gilunsad and “Signature for a Cause” alang sa pagatukoron nga Sacristy sa San Miguel. Isa lamang kini sa mga gipahigayong fund raising activities aron makatigum ug kantidad para sa maong proyekto. Mainiton kining gisuportahan sa mga parokyano, pinangulohan sa Kura Paroko nga maoy pinaka unang mipirma, ug sa Parish Coordinating Council (PCC), pinaagi sa pagsulat sa ilang pirma sa signature wall. Matag pirma mo donate ug P50.00. Matud pa ni Fr. Jhun, ang maong signature wall gahinan ug dapit sa sulod sa sacristy aron mahimong handumanan sa mga parokyano nga kabahin gayud sila sa pagtukod niini.

By Ate Neng Lumontod-Pascua/Contributor