BSEK IN MINDANAO AT 50: Panaw sa Pagtoo

Ang Congregation sa Benedictine Sisters of the Eucharistic King (BSEK) nagsaulog sa ika-50 ka tuig o Golden Jubilee sa ilang presensiya ug pagpakiglambigit sa misyon sa Simbahan dinhi sa Mindanao niadtong Mayo 27- 29, 2013. Tulo ka adlaw nga kasaulogan ang ilang gipahigayon sa St. Benedict Priory, Ulas, Davao City uban sa ilang mga Oblates, benefactors, kaparian, mga relihiyoso ug kamadrehan gikan sa lain-laing komunidad, mga layko nga ilang nakauban sa misyon, obispo ug uban pang mga bisita.

Si Rev. Fr. Edgar Friedman, OSB, Prior sa St. Benedict Monastery, Cogon Digos City, mao ang nangulo sa sa Santos nga Misa sa unang adlaw. Kabahin sa maong kalihukan ang unveiling sa marble bust sa ilang founder nga mao si Rev. Mother Edeltraud Danner, OSB. Siya usa ka german nga madre natawo sa Chieming, Bavaria Germany niadtong Mayo 13, 1988. Sakop siya sa Congregation of St. Scholastica Sisters, Tutzing. Uban sa pag-ampo ug paggiya sa  Espiritu Santo ug subay sa lagda ni San Benito nadasig siya sa pagmugna og bag-ong katilingban nga adunay duha ka estilo sa kinabuhi: ang Contemplative Nuns nga mao karon ang mga mongha nga anaa sa Cogon, Digos City ug ang Monastic Missionary nga mao ang madre nga anaa sa Ulas, Davao City ug nakiglambigit sa misyon sa local nga Simbahan sa Diyosesis sa Digos, Surigao, Ipil, Archdioceses sa Zamboanga ug Davao.

Sa ikaduhang adlaw ang Obispo sa Digos, si Most Rev. Guillermo Afable, D.D. ang nangulo sa Santos nga Misa. Sa iyang homiliya personal siya  nga nagpasalamat sa mga madre dili lamang tungod sa ilang mga nahimo nga kaayuhan sa simbahan kondili tungod usab sa ilang presensiya. Malipayon usab si Bishop Afable nga nakig-uban sa kamadrehan panahon sa ilang salu-salo tungod kay matud pa niya, “sa 50 katuig nga presensiya sa BSEK dinhi sa Mindanao, kabahin siya sa maong panaw sulod sa 35ka tuig.” Iyang gipahinumdoman ang mga madre sa kaanindot sa ilang bokasyon og kini makita diha mismo sa ilang mga pangalan.

Ang Arsobispo sa Davao, Most Rev. Romulo Valles, D.D. diha sa iyang homiliya sa ikatulong adlaw nga misa mapasalamaton usab sa maong katilingban tungod kay ang local nga simbahan sa Davao nahimong kabahin sa ilang misyon. Ang BSEK miabot dinhi sa Davao niadtong tuig 1963. Una silang nagmisyon sa Parokya sa Sto. Rosario, Toril niadtong tuig 1965 kauban sa mga PME Fathers. Ang unang Obispo sa Arsdiyosesis sa Davao, Most Rev. Clovis Thibult mao ang nag-imbita sa Congregation nga maghimo sa ilang misyon dinhi sa local nga simbahan. Kabahin sila sa pagmugna sa John 23^rd Catechetical Center (JCC) sa tuig 1969; Archdiocesan Biblical Apostolate ug Archdiocesan Liturgical Center(ALC) tuig 1985 kauban sila Rev. Fr. Patrice Picard, PME ug Bishop Arturo Bastes, SVD.

Sa pagkakaron nagpadayon sila sa pagpangalagad sa nagkalain-laing parokya dinhi sa Davao, sa Diyosesis sa Digos, Ipil, Zamboanga ug Surigao. Dako ang ilang kalambigitan sa pormasyon sa mga layko nga nag-alagad sa simbahan sama sa katekista, mga laykong ministro sa liturhiya, Bible animators ug Youth ministers. Ang BSEK anaa usab nagmisyon sa Oriental Mindoro, Cubao, Quezon City, San Fernando La Union, Baguio, Zambales, Pangasinan, Vigan ug ang ilang foreign mission anaa sa Indonesia, Belgium, Germany ug Israel.

Ang kasamtangang Prioress General si Mother Araceli Escurzon, OSB mapasalamaton sa tanang nahimong kabahin sa misyon sa Benedictines ug malaumon sa dugang pang grasya sa Dios ilabi na ang gasa sa bokasyon ug matinud-anong paglahutay sa kinabuhing relihiyoso subay sa lagda ni San Benito ug sa panlantaw, misyon ug karisma sa Congregation. Dalaygon ang Dios sa tanang panahon ug sa tanang butang. ®

By Sr. Isabelle Domingo, OSB/Contributor