Mga Santos sa Kabus: Nakighiusa sa Piyesta

Nakaila ba mo sa inyong Patron sa GKK?

Kini mao ang hagit nga gitubag sa San Roque Parish sa Malabog, Paquibato District sa dihang usa ka Divine Costume Play (Cosplay) ang gipahigayon isip pagsaulog sa GKK Night sa Brgy. Malabog gym niadtong August 9. Nahitabo usab kini sa ikatulong adlaw sa ilang novena alang sa kapiyestahan niadtong Agosto 16. Ang GKK night ang miabli sa aktibidades sa ika-31 nga kasaulogan.

Ang Divine Cosplay usa ka pasundayag diin ang patron sa matag GKK ipaila-ila sa mga nanambong sa maong kalihukan. Ang mga partisipante isip paghulagway sa ilang Patron, magsul-ob ug bisti, mulihok, ug mag-istorya sama sa ilang santo o santa.

Matud pa sa San Roque Parish Priest Fr. Jemasol Ortiz, “tumong niini nga madungagan pa ang pag-ila sa mga Santos kay sila man ang sumbanan sa pagtoo. Kini simple lang nga pagsangyaw aron mas dili malimtan.”

Aron makatubag sa Q and A portion, ang matag partisipante gihibaw-an nang daan ang kinabuhi sa ilang patron. Sila gihatagan ug higayon nga mopasabot sa kahulugan sa ilang costumes. Ug tuod man, ang mga partisipante nagpakita ug igo nga kahibalo bahin sa ilang Patron. Sadya gayud ang maong pagpaila, “pati ang mga bata naningkamot ug tubag,” matod pa ni Fr. Ortiz, hilabi na ang mga “Santo Niño.”

“Next year, tanang kabatan-onan na pud,” dugang pa niya. “Hagit sa Santo Papa nga ipadayon ang pagsangyaw sa mga kabus. Kini effective kaayo. Nalingaw kita ug nakat-on sa mga kinabuhi sa mga Santos. Pinaagi usab sa DC Herald coverage, mahibaw-an unta kini dili lamang dinhi sa Malabog kundili pati na sa lain pang lugar sa kasikbit nga mga parokya ug lugar sa dakbayan nga makabasa niini.

Daku ug tabang ang hugot nga suportang ginahatag sa barangay. Si Brgy. Captain Joselito Areja, maskin dili Katoliko, mipasibaw sa iyang kahimuot. “Nalipay ako tungod kay ang aktibidad nakapaaghat sa mga lalaki nga mupartisipar sa kalihukan sa Simbahan. Nanghinaut ako nga kining maong kalihukan ma-maintain kada tuig.” Panghinaut sa PSL Coordinator Mr. Ruel Bonsubre, “nga mapanaminan ug maambitan unta sa tanan ang mga hiyas sa mga Santos ug mahimong sumbanan sa tagsa-tagsa ka kinabuhi.”

Gikan sa 34, ang mga midaug mao ang Sto. Niño – Saloy, Sto. Rosario – Zone 10, Senior San Miguel – Meluya, Inahan sa Kanunay’ng Panabang ug ang San Vicente Ferrer nga maoy nahimong Grand Champion.