Clergy Annual Retreat Focuses on Theological Virtues

Clergy Annual Retreat Focuses on Theological Virtues

Sulod sa lima ka adlaw, Agosto 3-7, 2015, ang 40 ka sakop sa diocesan clergy sa Mati diocese nagtapok ug namalandong kabahin sa ilahang pagkapari kon presbyter sa Betania Retreat House sa Malasag, Cagayan de Oro City.

Ubos sa direksyon ni Msgr. Lorenzo “Boy” Salvador sa Artsidiyosesis sa Cagayan, ang tinuig nga Retreat nagtuki sa tema nga: “The Theological Virtues in the Ministry and Life of Presbyters.” Giusa-usa pagpalambigit ni Msgr. Boy ang mga teyolohikanhong birtud ngadto sa kinabuhi sa pari. Sa usa ka pakighinabi sa radyo, gihulagway kini sa kura sa Calapagan, Fr. Carmelito “Lito” B. Salisad isip: Paglaum (Hope)- ang unang birtud nga motukmod sa pari sa pagpadayon sa pag-alagad sa panahon nga matintal siya sa pag-isip nga nahikatulog si Hesus, ug busa mahigmata ang iyang pagsalig sa Ginoo (Mt. 4:35-41).

Ikaduha, mao ang Gugma o ang Eukaristiya nga maoy prinsipyo nga nagabugkos (presbyteral unifying principle) sa ministriya ug kinabuhi sa pari, ug ikatulo mao ang Pagtuo o pastorship, ang pagtuman sa mga panaad ug panerbisyo sa pagkapari. “Dako gyud ang among nasinating kadasig sa among bokasyon sa pagkapari,” matud pa ni Fr. Lito, “tungod sa among panag-ambitay, very enriching sharing kabahin sa koneksyon sa mga teolohikanhong birtud sa among kinabuhi isip pari.” Gidugang usab ni Apostolic Administrator ug Station Manager Fr. Edito S. Bano nga “haom o relevant gayud sa ilang priestly life ang mga pakigpulong ni Msgr. Boy tungod kay “nagiyahan kami sa pagkinabuhi hangtud sa hangtud sa mga birtud sa pagtuo, paglaum ug gugma pinaagi sa among maampoong pagtimbang-timbang sa among parianong kinabuhi ug bokasyon.” Kahinumduman nga sa miaging tuig, ang Mati diocesan clergy nag-retreat sa Augustinian (OSA) Retreat Center sa Tolotolo, Consolacion, Cebu, kauban usab si Bishop Emeritus Patricio H. Alo, D.D.

Renewal Movements

Duha ka adlaw sa Life in the Spirit seminar (LSS) ang gitanyag sa Catholic Charismatic Renewal Movement (CCRM) niadtong Agosto 7-9, 2015 sa St. Joseph Retreat House sa Dahican, Mati City. Ang mga mitambong naggikan sa managlahing mga pundok sa Gagmayng Kristohanong Katilingban (GKK) ug sa kabatan-onan sa Diocesan Youth Apostolate (DYA) sa San Nicolas de Tolentino Cathedral. Si CCRM diocesan coordinator Sr. Edith Tayko, LGC, maoy nangasiwa sa maong kalihokan ug siya usab ang mipahiluna og balik sa CCRM Prayer Meeting on the Air sa DXHM matag miyerkoles sa alas 3:00 sa hapon. Sa laing bahin, sa pagkakaron, nagpadayon ang simultaneous evangelization sa Neo-Catechumenal Way (NCW) sa diyosesis sa Mati nga gipahigayon sa mga parokya sa Caraga, Lupon ug Katedral sa Mati sukad pa sa bulan sa Hunyo, 2015. Kini ginahimo makaduha sa matag semana, matag lunes ug huybis, alas 7:00 sa gabii. Mga lideres sa kalihokan mao sila si Brod Pedrito Bilbao sa Caraga, Dante Marcelo sa Lupon, ug Edgar Caina sa Mati. Gilantaw usab nga mosunod ang mga organisandong pundok sa NCW sa mga parokya sa San Ignacio ug Boston.

Ika-200 nga Kasumaran sa Adlaw’ng Natawhan ni San Juan Bosco

Karong Agosto 16. Mga paring Salesiano ni Don Bosco (SDB) sa parokya sa Mahal nga Kasingkasing ni Hesus sa Dahican ug sa Don Bosco Training Center (DBTC) ang nag-andam ug nagdapit sa katawhan sa ilahang mga ispisyal nga kalihokan, gikan sa Agosto 14, kanus-a gihalad ang unang Triduum Mass sa Divine Mercy Shrine and Parish, sinundan sa motorcade sa Don Bosco. Saulogon ang fiesta Mass karong domingo, Agosto 16 alas 8:00 sa buntag, ug sa gabii ang dinner with the clergy and religious. Samtang gipahigayon ang Search for Mr. and Miss Don Bosco Centennial sa mga kabatan-onan sa gabii sa Agosto 15, sa ikaduha nga adlaw sa intramurals. Nasaksihan usab ang safety driving seminar nga gi-sponsor sa Honda, niadtong Agosto 14-15. Ipadayon usab sa lunes Agosto 17, ang selebrasyon sa 200th birthday ni Don Bosco. Dugang mga aktibidades ang imantala unya sa sunod nga isyu sa Herald.