Panaghiusa sa mga Kapariang Diosesano

Karong Dominggoha mao ang dominggo ni San Juan Maria Vianney, patron sa mga diosesanong pari.

Sa gabii nga siya gibudhian, ang atong Ginoo sa katapusang panihapon nag-ampo ngadto sa iyang Amahan alang sa iyang mga apostoles ug alang kanila nga pinaagi sa ilang pagtudlo, motoo Kaniya. Siya nagkanayon, “mahiusa unta silang tanan, Amahan, sama nga ikaw anaa kanako ug ako anaa kanimo, aron mahiusa sila diha kanato, ug ang kalibutan motoo nga ikaw ang nagpadala kanako.” (Jn. 17:21)

Ang maong pag-ampo sa Ginoo labing makahuluganon kaayo tungod sa kahimtang sa kakulang sa pagsinabtanay ug panaghiusa mismo sa iyang mga apostoles. Tungod sa panaglahi sa ilang gigikanan ug kasaysayan. Tungod sa panaglahi sa ilang pagsabot ug mga laraw sa ilang pagsunod kang Kristo. Tungod sa ilang panaglalis ug palabwanay, gitugyan sa Ginoo kining mga sumusunod ngadto sa iyang Amahan aron mausab unta sila.

Sumala sa maong pagampo, gipadayag sa Ginoo kon unsa ang kamahinungdanon sa kahiusahan sa iyang mga apostoles, aron ang kalibutan motoo nga ang Amahan maoy nagpadala sa Ginoong Hesus. Bug-at diay kaayo ang bili sa ilang panaghiusa. Sa ato pa, daw mapakyas ang kalamposan sa misyon sa Ginoo niining kalibutan sa pagkabahinbahin sa iya mismong mga apostoles.

Gipadayag usab ang sukaranan sa ilang panaghiusa luyo sa panaglahi nga makabahinbahin. Ang panaghiusa uban sa Ginoo ug sa Amahan. Diha kanila ang tinubdan sa kahiusahan.

Gisulay gayud ang maong panaghiusa nga giampo sa Ginoo. Nianang maong gabii, ang usa kanila nagbudhi sa Ginoo. Ang usa naglimod Kaniya. Samtang ang uban, gawas sa usa nga nagmatinud-anong miduyog Kaniya hangtod sa tiilan sa krus didto sa Kalbaryo.

Ang gasa sa Spirito Santo maoy langitnong gahum ug kusog nga naghiusa sa mga apostoles ug sa ilang mga tinun-an. Natawo ang Simbahan. Nasugdan ang ilang pagtuman sa misyon sa pagsangyaw sa Maayong Balita sa kaluwasan.

Latas sa mga katuigan, hangtod sa atong kapanahonan karon, diha sa Simbahan ang panaghiusa sa sa mga kaparian uban sa ilang obispo kanunay ginasulay ug ginahagit nga maghatag dayag ug lig-on nga panig-ingnan ngadto sa katawhan.

Ang Dios wala magkulang sa pagbulig sa iyang mga tinawag ug pinili. Lainlaing paagi sa pagtabang sa iyang mga kaparian aron mahiusa sila diha sa kahiusahan sa Dios, ang iyang gidasig ug gipahimugso sa nagkalainlain dapit sa kalibutan. Ang usa niini mao ang iyang gidasig nga masugdan taliwala sa mga paring diosesano didto sa Germany, France, Italy sa tuig 1862 pa. Kini ang Apostolic Union of the Clergy (AUC).

Human sa pipila ka tuig, giaprobahan sa Simbahan ang maong kapunungan sa mga diosesanong pari niadtong April 17, 1921. Pagabot sa ika-2 Konsilyo sa Batikano, gidasig pagayo sa Simbahan ug gisuportahan ang katukuran sa mga kapunungan sa mga kaparian alang sa pagpalig-on sa ilang inigsoong panaghiusa ug pagtabang sa pagkabalaan sa mga kaparian (P.O. N.8). Niadtong 1998 ug 2007, giaprobahan sa Simbahan usab ang nabag-o nga mga lagda sa AUC. Sa ingon, ang maong kapunungan nagapadayon sa pagbag-o haom sa mga timaan sa panahon.

Niabot na sa lainlaing nasud ang AUC. Dinhi sa Asia anaa na siya gidawat sa India, Vietnam, Myanmar ug sa Indonesia. Nahimo siyang tabang sa mga diyosesis sa pagpatuman sa pagampo ni Hesus didto sa katapusang panihapon alang sa iyang mga sumusunod.

Karong tuiga, makasugod na tingali ang pipila ka mga kapariang diosesano sa DaDiTaMa nga magsugod ang AUC dinhi sa Pilipinas, sa habagatang Mindanao. Itugyan nato sa panabang ni San Juan Maria Vianney, patron sa mga diosesanong pari nga matuman ang katuyuan Sa Dios alang sa AUC dinhi sa Pilipinas. Hinaot pa unta.