“Sa Panaw sa Kinabuhi, Ang Dios ang Maghatag sa Pan nga Maghatag sa Kinabuhing Dayon”

19th Dominggo sa Ordinaryo nga Panahon (B)
Pagbasa: 1 Kings 19: 4-8; Ephesians 4:30, 5:2; John 6: 41-51

Nakasinati ka ba ug kakapoy diha sa imong kinabuhi? Ang pamati nimo nga ikaw lamang ang adunay mabug-at nga palas-on ug ikaw gikapuyan sa imong pagpanaw sa kalibutan?

Diha sa unang pagbasa gikan sa unang Libro sa mga Hari (1 Kings 19: 4-8), si Propeta Elias gibati ug kakapoy diha sa iyang pagpanaw. Gilutos siya sa iyang mga kaaway tungod kay gibuntog niya ang mga kaparian ni Baal nga wala pamatia diha sa ilang pagsangpit sa ilang dios-dios. Ilang gilutos si Propeta Elias ug buot nila nga patyon. Mao nga diha sa atong pagbasa karong adlawa si Propeta Elias gikapoy ug nahikatulog apan gipukaw siya sa anghel sa Diyos aron pakan-on. Dinhi gipadayag kang Propeta Elias nga wala siya biyai sa Diyos. Siya gipakaon nga nakahatag kaniya ug kalig-on diha sa iyang pagpadayon pagpanaw sa kinabuhi.

Sa atong ebanghelyo sumala sa pagsaysay ni San Juan (Juan 6: 41-51) adunay mga Hudeyo nga wala makadawat sa pagtulun-an sa atong Ginoong Hesus. Gipasabot Niya nga Siya mao ang pan nga mikanaog gikan sa langit. Kini nga pagtulun-an ang dili gayud nila madawat. Nakaila sila kaayo kang Hesus busa dili nila madawat nga Siya mao ang pan gikan sa Langit. Gipasabot ni Hesus kining mao nga pagtulun-an nga lisod nila dawaton apan mao gayud ang kamatuoran. “Ako ang buhing pan nga mikanaog gikan sa langit, ang mokaon niining pan mabuhi sa dayon (v. 51).”

Sa Panaw sa kinabuhi, Si Kristo ang Pan nga maghatag ug kalig-on.

Mga kaigsoonan, sama kang Propeta Elias kita usab nagapanaw dinhi niining kalibutan. Bation nato ang kalaay, kakapoy tungod sa mga pagsulay ug mga suliran nga atong gi-atubang. Usahay sulayon ang atong pagtoo. Usahay bation nato nga daw gipasagdan kita sa Diyos. Apan mga kaigsoonan ayaw pagpakawala sa paglaum. Sama kang Propeta Elias, kita usab pakan-on sa kalan-on nga makahatag ug kalig-on. Iya kitang lig-onon diha mismo sa pulong sa Dios ug sa lawas ug dugo sa atong Ginoong Hesukristo.

Diha sa atong pag-alagad sa atong pamilya ug sa katawhan sa Diyos dili gayud kita mawad-an sa paglaum. Batuki gayud kanunay ang kaluya tungod kay ang Diyos mismo mao gayud ang maghatag kanato ug kalig-on. Iya kitang gipakaon sa Iyang lawas. Dangop diha sa Eyukaristiya nga mao ang pan nga makahatag kanato sa kinabuhing walay katapusan. Diha sa Iyang paglig-on kanato magpadayon kita sa atong pagpanaw ug paglig-on usab sa uban natong mga kaigsoonan! Sila nga nagkaluya atong pahinumduman sa atong Ginoong Hesukristo — ang pan sa kinabuhi. Panalanginan unta kita sa Dios!