Foundress/Superior sa CSJ mipanaw na

Foundress/Superior sa CSJ mipanaw na

GIDALA sa iyang katapusang kapahulayan niadtong Hulyo 22, 2015, si Sr. Bernadette “Badette” R. Dollete, labing unang miyembro kon pundadora (ubos sa giya ni Obispo Emeritus Patricio H. Alo) ug superyora sa orden sa Catechists of St. Joseph (CSJ) nga nakabase sa Milagrosa Formation Center, Pahamutang, Matiao, siyudad sa Mati.

Si Sr. Badette ang ikaduha sa walo nga mga anak nila anhing Carlos Dollete, Sr. ug Josefina Regalado sa Panabo City, kon asa usab natawo ang madre niadtong Marso 26, 1948.

Nakabsan siya og gininhawa niadtong Hulyo 13 sa Southern Philippines Medical Center (SPMC) diin gi-confine siya tungod sa mga komplikasyon ug sakit sa kalawasan. Matud pa sa iyang magulang, si Ate Elay, gusto na gyud unta mouli ni Sr. Badette sa Mati human sa kapin usa ka bulan sa balay-tambalanan, apan miagad nalang siya sa mga sugyot sa doktor nga posibleng mamaayo pa siya.

Apan diay, nabatyag na niya, matud pa ni Elay, “ang tawag sa pagpauli ngadto sa sabakan sa Dios Amahan, ang Magbubuhat kang kinsa usab iyang gihalad ang iyang bug-at kaayo nga kasakit ug mga pangandoy alang sa iyang komunidad sa CSJ ug sa Ad Jesum Development Foundation, Inc. (AJDFI) aron makabangon kini gikan sa grabeng trahedya hatud sa bagyong Pablo ug ubang sosyo-ekonomikanhong problema.”

Kahinumduman nga natukod ang AJDFI niadtong Mayo 23, 1997 ug nakatabang sa panginabuhian sa katawhan sa hapit tanang 19 ka mga parokya sa diyosesis sa Mati ug gani hangtud sa Sarangani, Davao del Sur ug del Norte—onse ka mga sanga ug kapin libo nga mga miyembro sa pamilya, ug nakakaplag usab og mga recognition awards gikan sa kaulohan.

Kanhi kini naila sa Child Survival Development (CSD) program sa diocese dekada 1980s. Gipadayon ang mga maayong buhat ni Sr. Badette sa iyang mga kaubanang CSJ nga gipangunahan karon ni Sr. Melvin Manligoy, kasamtangang finance director sa Trinity Cable Television (TCTV), kauban usab sila Sr. Percilita Mamelic uo Sr. Eva Marie Tabugoc sa mga programa sa Pormasyon ug Katekesis. Sa usa ka pakigpulong, miingon si Bishop Alo nga dako ug dili hikalimtan gayud ang mapaubsanong gitanyag ni Sr. Badette alang sa kalamboan sa diyosesis sa Mati diha sa pag-alagad sa mga kabus.

Ed’l Fitr gisaulog sa Mati kauban sa mga kaigsoonang Muslim

GISAULOG niadtong Hulyo 17, 2015 ang Ed’l Fitr, ang piyestang Islam sa pagtapos sa usa ka bulan sa pagpuasa sa Ramadan sa mga kaigsuonang Muslim sa Mati ug sa probinsiya sa Davao Oriental, kini duyog sa tibuok kapupud-an ug sa kalibutan. Ang selebrasyon sa Hariraya ug Kanduli diha sa pag-inambitay sa ilahang pag-ampo ug pagkaon sa mga putaheng Muslim, labi na ang daghang pinutos nga kagumkom nga amit, ang giobserbar sa hiniusang katilingban sa Kamusliman ug mga higalang Kristiyano ug Lumad sa managlahing mga dapit.

Miduyog usab ang provincial government sa maong okasyon alang sa tanang mga empleyadong Muslim sa Kapitolyo.

Na-una ini, gihatagag konsiderasyon sa oras sa ting-trabaho ang mga empleyadong Muslim aron maka-obserbar sila sa ilahang Ramadan.

Ang ilahang oras sa trabaho ang nagsugod alas 7:30 sa buntag hangtod na sa alas 3:30 sa hapon, nga nagpasabot gihapon og walo ka oras nga trabaho.

Labot ni-ini, nagpahayag og pasalamat ang kahugpungan sa mga empleyado sa Kapitolyo, hilabi na ang mga empleyadong Muslim sa dakung konsiderasyon nga gihatag ni Gov. Cora Malanyaon.

NFA nagklaro nga wala’y synthetic rice sa City of Mati

GIKLARO karon sa Nat’l Food Authority sa probinsiya sa Davao Oriental nga wala’y synthetic rice nga nakasulod sa siyudad sa Mati.

Gipahayag kini ni NFA Asst. Prov’l Manager Josefa Lianza.

Gibutyag pa ni Lianza nga nagpahigayon sila ug planning conference sa Davao City sa dihang mi-ulbo ang balita mahitungod sa synthetic rice.

Agig aksyon, naghimo dayon sila ug inspection sa mga NFA-accredited retailers sa probinsiya, partikular sa poblacion ug sa palengke sa Mati City.

Mitumaw nga nasayod na ang mga retailers sa siyudad kabahin sa synthetic rice, ug tungod niini, wala dayon sila nagpasagad sa pagpalit ug bugas.

Ang Davao Oriental Provincial Police Office, sa pagpanguna ni Police Senior Inspector Magdadaro ang naghimo na usab ug pakigsusi sa mga NFA retailers labot sa ilahang tinda nga bugas, ug gituki kung asa kini gikan.

Kauban sa kapulisan sa inspection si NFA Provincial Investigator Eddie Alago, ug mga sakop sa Trinity Cable TV, DXHM, ug DXDV-FM Newsteam. Gitambagan sa Opisyal ang katawhan nga aron makasiguro nga dili peke nga bugas ang ilahang ma-konsumo, NFA rice na lang ang ilahang paliton. Gidugang pa niya nga ang supply sa bugas, maka-sustener sa panginahanglan sa katawhan. Ang ilahang stocks gikan sa Vietnam ug Thailand, ug ingon man sa lungsod sa Cateel, ning probinsiya sa Davao Oriental. Gi-awhag usab sa buhatan ni Bise Gobernador Mayo Almario ang publiko nga itaho dayon sa buhatan sa NFA kung aduna sila’y mamatikdan nga mga makatahap nga mga bugas nga ginabaligya sa mga tindahan o sa mga merkado.