Novena

ANG Nobena usa ka pamaagi sa pag-ampo ug pag debosyon, gikan kini sa latin nga pinulongan nga novem buot pasabot siyam o nine.

Busa ang nobena usa ka balaanong pag debosyon sulod sa siyam ka adlaw uban sa pagtuo ug paglaum nga makakuha o makaangkon kita ug grasya ug uban pang mga espesyal nga katubagan sa atong mga gikinahanglan ug maingon usab sa atong gipahinungdan sa maong pag nobena. Ang numero nga siyam o nine may lalom nga kahulogan diha sa Balaang Kasulatan.

Nagapasabot kini ug pagsakripsyo ug pagbangutan (cf. Ezeikel 7:24).

Ang siyam ka-adlaw nga pag-nobena kasagaran ginapahinungod kang Birheng Maria uban sa iyang mga titulo, sa mga Martires ug mga Santos ug mga Angheles, maingon usab sa Dios nga labaw sa tanan.

Kining pag nobena nagsukad sa Balaang Kasulatan, diin ang mga Apostoles ug mga tinun-an ni Kristo uban si Birheng Maria nagtapok sa usa ka lawak nagpaabot sa pagkunsad sa Espiritu Santo pinaagi sa ilang pag-ampo sulod sa siyam ka adlaw. Mao kadto ang Pentekostes o ang pagkunsad sa Espiritu Santo nganha kanila. (cf. Buhat 1:12, 12:5).

Tataw kaayo nga ang pag-nobena diay nagsukad pa gayud sa panahon sa mga Apostoles diin sila mismo mao ang unang nag-nobena.

Ang unang nobena nga ilang gipahinungod mao ang nobena sa Espiritu Santo, ug isip Kristiyanos ato kining nasunod ug namana gikan gayud kanila. Adunay upat ka kategorya ang pag-nobena: Una, mao ang Nobena sa mga minatay, dinhi ato silang gihandom pinaagi sa atong mga pag-ampo ug pag-sakripsyo sulod sa siyam ka adlaw o gabii, diin maoy ilang gikinahanglan nga tabang natong mga buhi (cf. Sirac 7:33 ug 2 Macabeo 12:41-46).

Ikaduha, mao ang mga Kapistahan sa atong Simbahan lakip na diha ang piyesta paghandom sa pagkatawo ni Kristo o ang Pasko, mga titulo ni Birheng Maria, sa mga Santos ug mga Angheles diin atong gihandom sulod sa siyam ka-adlaw ang mga importanteng butang nga may kalambigitan sa atong espirituhanong kinabuhi subay sa ilang mga ehemplo.

Ikatulo, mao ang pag-nobena sa mga butang kon aduna kitay espesyal nga ihangyo sa Dios, sa Mahal nga Birhen, sa mga Santos ug Angheles (expiatory). P’wede kini grupo o mahimong indibidwal nga pag petisyon depende kon kinsa ang imong pangayoan pinaagi sa pag-debosyon-nobena.

Ika-upat, mao ang pag-nobena aron makakuha kita ug indulhensya o ang pagtanggal sa kastigong temporal tungod sa atong mga sala (indulgence for the remission of sins). Uban sa kondisyon nga kinahanglan modawat kita sa Sakramento sa Pakig-uli ug pagtambong sa Santos nga Misa.

Sumala sa lagda sa atong Simbahan ang pag-nobena pwede nato buhaton sulod sa Simbahan, kapilya, panimalay ug lugar nga may balaanong dapit o solemni nga lugar. (Source: CCC or Catechism of the Catholic Church and www.newadvent.org › Catholic Encyclopedia)