Ang kalooy sa Ginoo moabot pinaagi ra usab sa tawo

Ika-17 nga Dominggo sa Ordinaryong Panahon
2 Hari 4:42-44/ Ps. 145/ Eph. 4:1-6/ Jn.6:1-15

A dunay usa ka pari nga nahimoot nga nag estorya mahitungod sa usa ka bata nga gustong mahimong “altar boy.”

Gipangutana niya ang bata, “Dong, nganong gusto man ka nga mosulod pagka ‘altar boy’?” Mitubag ang bata, “Gusto kong mutabang sa Ginoo Nyor.” Nakatawa ang pari nga mipaambit niining maong tinuod ug simple kaayong tubag sa maong bata. Apan kun atong sabton sa tinuoray, tinuod gayod nga ang Ginoo nanginahanglan sa tawo aron iyang ikapaabot ang iyang kalooy ngadto sa kinabag-ang katawhan sa kalibutan.

Ang atong ebanghelyo karon naghisgot sa dakung milagro nga gihimo ni Jesus sa dihang iyang gipakaon ang lima ka libo ka mga tawo pinaagi lamang sa lima ka buok pan ug duha ka isda.

Adunay tulo ka importante kaayo nga punto ngano nga nahitabo kining maong milagro. Una, mao ang dakong kalooy sa Dios sa gigutom nga katawhan, ika-duha, iyang giimbitar ang tawo sa pagplano uban kaniya aron makakaon ang katawhan, ug ang ika-tulo mao nga adunay usa ka manggihatagon nga bata nga mipaambit sa iyang pagkaon alang sa tanan.

• ANG KALOOY SA DIOS. Ang tibuok misyon ni Kristo sa kalibutan nagasugad sa Iyang dakung kalooy kanatong mga tawo kay nahisama kuno kita sa mga karnero nga walay magbalantay, walay modala kanato ngadto sa lunhaw nga sibsibanan ug mopakaon kanato. Sumala ni San Juan sa atong Ebanghelyo karon, sa dihang nakita ni Jesus ang katawhan nga gigutom, gibati Niya ang dakung kalooy alang kanila.
• GIDAPIT NI JESUS ANG TAWO SA PAGPLANO UBAN KANIYA ARON ANG GIGUTOM NGA KATAWHAN MAHATAGAN OG PAGKAON. Ang pagbati sa kalooy mahimo lamang makahuluganon kun kini adunay sunod nga aksyon. Diha sa atong ebanghelyo karon, si Jesus nangutana kang Felipe: “ASA MAN KITA MAKAPALIT OG IGONG PAGKAON ALANG NINING MGA TAWO?”
  
  Matud ni San Juan, bisan nasayud na si Jesus kun unsa ang Iyang buhaton, sa gihapon Iyang gipanguta si Felipe kun unsa ang buhaton aron masabtan ni Felipe ang iyang kaakuhan sa pagtabang niining maong gigutom nga katawhan.
• ANG PAGKAMANGGIHATAGON. Diha sa Ebangelyo, atong nadungog nga nahitabo ang milagro tungod kay adunay usa ka bata nga mipaambit ug mihatag sa iyang dalang pagkaon ngadto sa mga apostoles aron kini ibahin bahin sa katawhan. Kini naghulagway lamang nga bisan pa man ang Dios gamhanan sa tanan, nanginahanglan Siya sa atong pagkamanggihatagon sa gamay nga ania kanato, sama sa ‘BATA’ aron kini iyang panalanginan ug ika-apod-apod ngadto sa gigutom ug gi-uhaw nga katawhan.

Mga kaisoonan, ang Dios sa kanunay ania uban kanato ug sa kanunay buot Niyang ipabati ang iyang dakung gugma ug kalooy ngadto sa Iyang katawhan nga gigutom ug gi-uhaw sa tinuod nga katagbawan sa kinabuhi. Aron kini mahimo ug mahitabo, sama sa ebanghelyo, ang Ginoo nangutana kanako ug kanimo “unsa may atong buhaton” aron Iyang mahimo ang mapadayonong milagro sa pagpakaon sa gigutom nga katawhan karon?