Mati Diocese celebrates the Eucharist for Araw ng Davao Oriental (Mati Newsbits)

Mati Diocese celebrates the Eucharist for Araw ng Davao Oriental

KALIPAY sa Diocese of Mati ang ilahang pagduyog sa lokal ug probinsyal nga panggamhanan sa selebrasyon sa 48th Araw ng Davao Oriental niadtong Hulyo 1, 2015. Gisaulog ang Balaang Eukaristiya sa San Nicolas de Tolentino Cathedral, kung diin ang mga lungsuranon ug hapit tanang kaparian sa tibuok diyosesis—diocesan ug religious clergy—ang misalmot gayud sa hiniusang pagpadayag ug pasalamat sa Diyos sa daghang mga panalangin ug grasya nga nadawat, usa na ang makanunayon nga pagsuporta sa mga opisyal sa gobyerno sa mga kalihokan sa simbahan.

Ang lokal ug probinsyal nga panggamhanan mapasalamaton usab gumikan sa pagduyog sa simbahan sa ilahang mga kalihokan. Gani, nasaksihan kini sa pagpartisipar sa lokal nga panggamhanan sa Mati ug sa probinsiya sa mga nightly presentations padulong ngadto sa Kapistahan ni San Nicolas de Tolentino.

Hugot nga gipasigarbo sa probinsya ang maayong relasyon tali sa probinsyal nga panggamhanan ug sa simbahan, labi na niining katapusang paghupot ni Gov. Corazon Malanyaon sa renda sa panggobyerno atol sa katapusang tuig sa iyang paglingkod. Kanunay na nga gipahayag ni Malanyaon nga sa sinugdanan pa lang, wala gayod siya’y nasinati o nahimo nga problema sa Simbahan. Sa programa nga gipahigayon sa probinsiya sa Araw ng Davao Oriental gibungat sa gobernadora sa iyang State of the Province Address (SOPA) ang iyang kinasingkasing nga pasalamat ngadto kang Bishop Emeritus Patricio H. Alo, Apostolic Administrator Fr. Edito Bano, sa katuyuan nga maila ang kinatibuk-ang pagsuporta gikan sa eklesiastikong sektor sa katilingban.

‘Dili angay nga mahimong babag sa kalampusan ang ka-pobrehon’

KINI ang gipamulong ni Manila Vice-Mayor Isko Moreno atol sa iyang pagbisita sa DXHM-AM ug DXDV-Spirit FM sa selebrasyon sa 48th Araw ng Davao Oriental niadtong Hulyo 1, 2015.

“Dili gayod angay nga mamahimong babag ang ka-pobrehon sa tawo aron molampos,” gitataw sa opisyal sa iyang paghulagway sa iyang kaugalingong ka-pobrehon. Matud pa niya, dili niya gikaulaw nga natawo ug nagtubo siya sa Tondo, ug tungod sa kawad-on, high school lang ang iyang nahuman.

“Apan wala ko mihunong sa pagpangandoy. Nahimo akong basurero, ug kini ang nakatabang ug daku sa inadlaw-adlaw namo nga pagpakabuhi,” gidugang pa niya. Sa dihang nakakita siya ug higayon nga mahaw-as gikan sa kalisod pinaagi sa showbiz, gipasalamatan niya kini. Wala usab nahuman ang iyahang pangandoy sa showbiz. Nadani siya sa serbisyo publiko, kung diin ana-a usab sa iyaha ang tinguha nga makasilbi. “Kasaysayan na ang uban. Nahimo akong Konsehal sa Manila, ug karon Bise-Mayor. Kinsa ang magto-o nga ang usa ka basurero mamahimong usa ka konsehal ug bise-mayor?” Sa iyang pagpangatungdanan, na-angkon usab niya ang mga pagsaway gumikan sa kakulang niya sa kina-adman.

Agi’g tubag sa maong hagit, mipadayon siya sa pagtungha, mikuha ug kurso, ug nakapag-abogasiya pa. “Kung nawad-an ko ug paglaum, dili ko molampos sama ni-ini karon. Busa kinahanglan g’yod nga lig-on ang imong pagtoo inubanan sa determinasyon, ug labaw sa tanan, pag-ampo,” maoy hinapos nga pahayag sa Bise-Mayor.