Walang iwanan sa GKK San Juan

“HE must increase. I must decrease.”

Mao kini ang gipamulong ni San Juan Bautista sa Juan 3:30 nga nahimong tema sa homiliya ni Rev. Fr. Jun Gimeno atol sa ika-25 nga fiesta celebration sa GKK San Juan, Diversion Road, Panacan.

Matud pa ni Fr. Jun angayan lamang himoong sumbanan ang pagkamapaubsanon ni San Juan bisan pa sa kadako sa gisangon kaniya sa Dios ug sa iyang pagkainila. Ang pagbarog isip usa ka tinuod nga mga saksi ni Kristo maoy dakong hagit alang sa katilingban labi na sa mga pangulo niini, dugang pa sa kura paroko.

Gikalipay gayud ug dako sa mga pangulo ug mga miyembro sa GKK San Juan ang maong kasaulogan tungod kay luyo sa pipila ka higayon nga nahulga ang katilingban nga masirad-an tungod sa kakulang sa motubag sa pagkapangulo, wala gayud motugot ang mahal nga patron nga masirad-an kini ingon man ang pipila nga mibarog gayud alang sa pag-alagad isip mga lideres sa lain-laing ministriya.

Gani, una ang final blessing, gipasidunggan ang mga niagi ug kasamtangang Pangulo sa Katilingban (PSK) sulod sa 25 ka tuig pinaagi sa paghatag ug Certificate of Recognition kanila.

Ang mga nakadawat sa maong pasidungog mao sila Aurora Zamora, Genara Langgamon, Verona Espina, ug Perfecto Librea. Human sa Santos nga Misa gipahigayon ang fellowship dinner alang sa tanan samtang gilingaw sa live band ang mga nitambong niini.

Dugang nakabibo mao ang gipahigayon nga raffle draw diin usa ka sako nga bugas ang grand prize. (San Miguel SocCom)