MES gipahingusgan sa GKK

ANG Family and Life Apostolate, Marriage Enrichment Seminar (MES) Team sa St. Joseph the Worker Parish, Sasa nga gipanguluhan ni Jimmy ug Nellie Malazarte nagpahigayon og Marriage Enrichment Seminar (MES) Batch 121, Hunyo 26-28 sa GKK Sto. Domingo 1, Brgy. Pampanga.

Sa paningkamut sa Pangulo sa Katilingban Claudia (Baby) Batucan ug sa ilang Pangulo sa Katilingbanong Banay (PSKB), Mike ug Marie Fe del Rosario, 13 ka magtiayon ang mitambong.

Katuyuan niining maong kalihukan mao ang pagpukaw balik sa kainit sa ilang paghinigugmaay, pagsabot sa pagkasagrado sa kaminyoon, pagbag-o sa panaad, ug pagbutang sa Dios diha sa sentro sa ilang relasyon. Ang paghikap sa kinabuhi sa mga pamilya ug paggiya kanila ngadto sa pagkasuod sa Dios usa ka hagit ni bisan kinsa. Alang sa core group, dako nga higayon nga mutumaw sa matag partisipante ang kinaiya nga dala na sa atong pagkatawo — ang pagkamaayo sa tawo.

Sumala sa kura paroko nga si Fr. Diony Tabiliran, “pinaagi niining inyong pagtambong kung abli ang inyong kaugalingon sa pagdawat sa mga pagtulun-an, mas malig-on pa ang inyong paghinigugmaay. Kung lig-on ang pamilya, lig-on usab ang simbahan.” Siya nanghinaut nga adunay MES nga ipahigayon kada bulan.

Matud pa mga partisipante Frank ug Shirly Salinas, “sulod sa 42 ka tuig sa among kaminyoon, naka-amgo kami nga kinahanglan pa gayud diay namo ang maong pagtulun-an kay naa pa kami angay nga usabon alang sa kalambuan sa among relasyon.”

Nagpasalamat ang Parish FLA coordinator Ed ug Susan Andoy sa pagdawat sa GKK sa programa. Giisip kini nga dakung hagit sa mga facilitators kinsa sa dugay na nga mga katuigan nangalagad, nagpaambit sa ilang mga panahon, talento ug bahandi, sa pagpadayon sa maong misyon bisan pa man sa mga babag nga nasinati, tungod kay daghan pang pandayon ilabina diha sa mga pangulo sa pamilya. (Amie Desquitado)