Kalipay sa pagpakig-uban sa katawhan

Ikanapulo’g unom nga Domingo sa Ordinaryong Panahon
Jer. 23:1-6/Ps. 23:1-6/Eph. 2:13-18/Mk. 6:30-34

Sa pagbisita ni Santo Papa Francisco niadtong Enero, hilabihan kadaghang tawo ang nag-atang kaniya. Daghang mialirong kaniya bisan asa siya moadto. Daghang miapong kaniya sa telebisyon. Daghang naminaw kaniya sa mga radyo.Daghang nagsunod kaniya sa social media. Sa iyang edad, daw wala gani siya’y panahon sa pagpahulay aron lamang iyang mahimamat kining daghang katawhan. Apan kini gikalipay dili lamang sa mga tawo kondili usab sa Santo Papa mismo.

Mao usab kini ang kalipay ni Kristo uban sa iyang mga tinun-an. Bisan buot unta sila mamahulay tungod sa kakapoy gikan sa ilang misyon, sila gidugok sa katawhan. Naunhan pa gani sila sa mga tawo. Wala gani sila makakaon tungod sa daghang miduol kanila. Apan si Kristo naluoy sa katawhan kay sama sila sa mga karnero nga daw walay magbalantay. Iya silang gitudloan.

Dinhi natuman ang kalipay nga gisaad sa unang pagbasa nga atong gitubag sa Salmo. Niabot ang Magbalantay nga mao si Kristo aron paghiusa sa katawhan. Mao nga sa ikaduhang pagbasa, kining maong katawhan nahiduol ug nahiusa gayod sa kalinaw diha ni Kristo.

Ato ba kaha usab nga naangkon kining maong kalipay isip ginikanan kung taliwala sa atong kakapoy gikan sa trabaho sugaton kita sa atong mga anak nga mamarayeg kanato? Ato bang kalipay isip estudyante bisan sa kakapoy gikan sa eskwela kita motabang sa trabahuon sa panimalay? Ato bang kalipay ang pag-atiman isip bana o asawa sa panginahanglan sa atong kapikas? Ato bang kalipay nga makiglambigit sa Kristohanong katilingban bisan kita duolan unya sa atong mga silingan aron mangayo sa atong serbisyo ug tabang?

Ang kalipay nga dala sa misyon sa usa ka Kristiyano dili sinukod sulod sa oras. Ang kalipay sa pag-alagad sa usa ka magtutuo dili limitado panahon. Walay binunyagan nga mag-inusara kay ang atong misyon katilingbanon. Taliwala sa kahasol ug kakapoy, kalipay ba nato ang pagpakig-uban sa isigkatawo?