Kaputian LGU nakig-alayon sa libreng kasal, bunyag

MASKIN na init pa ang isyu karon sa Same-sex Marriage, padayon gihapon nga ginalantaw sa kadaghanan ang kamahinungdanon sa Sakramento sa Kasal.

Dise otso (18) ka paresan ang malipayong nakadawat sa Sakramento sa Matrimonya samtang traynta (30) ka mga bata ang nabunyagan nga libre. Kini gipahigayon sa parokya sa Sr. Sto. Niño, Island Garden City of Samal (IGaCoS) niadtong Hunyo.

Ang libreng kasalan ug bunyag gipahigayon alang sa mga magtiayon ug ginikanan nga walay igong kapasidad nga pinansyal sa pagdawat sa maong mga sakramento.

Mapasalamaton ang parokya kang City Mayor Aniano P. Antalan, ang Mayor sa Isla iyang pagsuporta sa maong kalihukan aron kini mamahimong malampuson.

“Kining libreng kasalan ug bunyag mao ang konkretong pagpadayag sa atong kalabutan isip Simbahan nga kabus tungod kay karong tuiga gideklara man sa Catholic Bishops Conference of the Philippines (CBCP) nga Year of the Poor,” matud pa sa kura paroko, Fr. Rico Enriquez.

Mapasalamaton ang mga magtiayon ug ginikanan nga nakabenepisyo sa maong kalihukan tungod kay nakatabang gayod kini kanila ug sa ilang paghingpit sa relasyon sa Ginoo.