Archbishop Valles’ Birthday Wish: Lig-onon ang GKK

KABALO ka ba nga ang usa sa pinakadugay na nga kapilya sa Pilipinas makit-an dinhi sa Dakbayan sa Dabaw?

Tuig 1911, namugna ang kapilya sa Sagrada Corazon de Maria diha sa gamay’ng luna nga gihatag sa pamilya Serapio, Bangoy, Fuentes, Rasay (Mrs. Montgomery), Rasay, ug uban pa. Apan ang yuta dili gayud mulambo kon walay pagtinabangay sa mga sakop sa katilingban sama sa mga hulagway nga imong makita sa taas.

Sagrada Corazon de Maria ang napiling patron kay debosyon man kini sa relihiyosong pundok, Hiyas de Maria ug patron usab kini sa mga lumad sa Daliao, Toril.

Salamat sa opisyal nga Hapones nga si General Furukawa, mga miaging opisyales, ug mga miyembro nga nitabang aron kini malig-on ug makaabot gayud ug 104 ka tuig niadtong Hunyo.

Matud pa sa Pangulo sa Katilingban (PSK) Pat Hermosisima, 52 anyos, daghan na gayud ang kausaban sa kapilya. Kung sa una ang kapistahan adunay pasundayag sama sa drama sa entablado, bayle ug uban pa, karong tuiga, Sugba Festival, Zumba Street Party ug ang kinaunhang misa nga Arsobispo ang nanguna ang nakapalipay pag-ayo kanila.

Ang Gagmay’ng Kristohanong Katilingban (GKK) sa Sagrada, usa lamang sa 1,796 ka mga GKKs sa Artsidiyosesis sa Dabaw sa kasamtangan. Ug pamatia: Usa lamang si PSK Hermosisima nga nagadawat ug sulat diin si Arsobispo Romulo G. Valles, D.D. (a.k.a. Yanong Muloy) mismo ang nagapirma sa panahon nga adunay dagkong mga aktibidad sa Simbahan.

Tataw nga duol sa kasingkasing sa atong Arsobispo ang katilingban. Si Auxiliary Bishop George Rimando miingon, “We are so lucky that the Archbishop is in touch with the pastoral; he finds time; very extraordinary na!”

Matud pa ni Arsobispo diha sa Foreword nga makita sa bag-ong GKK Guidelines and Norms: “I am very happy to be the shepherd of this local church that centers its pastoral life on the Basic Ecclesial Communities in our parishes.”

Daan nang gilatid sa Archdiocesan Pastoral Assembly of Davao (APAD II) niadtong 1982 nga himuong pastoral priority ang GKKs, busa sa iyang paglingkod, gipangusgan usab ni Yanong Muloy ang pag-ila ug pag-atiman sa iyang mga ‘karnero’. Kabahin niini ang pagbag-o sa GKK Norms and Guidelines diin gideklarang opisyal nga dokumento niadtong Disyembre 17, 2014 atol sa ika-65 ka kasumaran sa simbahan sa Dabaw.

“I am super confident nga kini produkto sa lihuk sa usa ka participative church, ang simbahan sa katawhan sa Diyos…di ta muingon nga perpekto siya pero sa pagkakaron, produkto ni sa atong collective wisdom and communal discernment. The church is not an organization; it is sacramental,” matud pa ni Abp. Valles.

Sa pagsubay sa mga bag-ong mando alang sa kalambuan, padayon untang managhan pa ang mga GKKs. Sama sa maayong panig-ingnan sa Sagrada Corazon de Maria GKK sa Sto. Rosario, Toril, matuman unta ang b-day wish sa Arsobispo. Kini mao ang lig-on nga mga GKKs aron managhan pa ang mga lideres; ug kay tuig man sa relihiyosong kinabuhing hinalad—bokasyon hilabi na sa pagkapari.