Ang mga Relihiyoso ug Layko sa Tuig sa mga Kabus

Sa miaging meeting, sa mga namunuan sa upat ka diyosesis sa Davao, Digos, Tagum ug Mati, (DADITAMA), uban sa ilang mga kabulig nga mga pari, relihiyoso ug mga layko, nasayran ang nagapadayon nga gipaninguhaan nila labot sa nagapadayon nga Tuig sa mga Kabus. Kadaghanan nila mitaho lamang sa mga kalihokan nga gipahigayon sa diyosesis o sa mga parokya.

Namatikdan nga wala matagai og kasayuran bahin sa daghang ginapahigayon sa ubang hut-ong sa Simbahan.

Adunay daghang mga tulunghaang Katoliko nga gidumalahan sa mga Relihiyoso. Sa syudad sa Dabaw, anaa ang mga dagkong mga tulunghaan sama sa Ateneo, Holy Cross, Assumption, Stella Maris, St. Peter’s, ubp. Siguradong duna silay mga gipanlimbasugan alang sa kaayuhan sa mga kabus. Dili nato kalimtan sila nga anaa nangalagad alang sa mga masakiton, mga tigulang, mga kabataan ug inahan sa mga ospital, clinic og mga development centers.

Daghan usab nga mga laykong organisasyon o movements kansang katuyuan dili lamang ang spiritohanong kalamboan sa tawo, apan nag organisa usab alang sa mga social development services. Ang usa ka ehemplo niini mao ang Couples for Christ – Ancop Foundation.

Nindot nga matagaan kini og pansin sa mga diyosesis ug iapil sa ilang imbentaryo aron matagaan og kompleto nga hulagway ang mga mapadayonong programa sa tibuok diyosesis, niining Tuig sa mga Kabus. Ang dugang nga epekto niining pagkompleto mao nga mapahiangay ang tanang panlimbasug sa Simbahan alang sa kaayuhan sa mga kabus uban sa mga kabus.

Ugnayan ng Barangay at Simbahan (UBAS)

Niadtong miaging semana, sa pagbisita ni Sec. Mar Roxas sa Davao del Sur, midalikyat siya og bisita sa akoa. Wala nako damha nga ingon niana ko ka importante sa iyaha. Labot pa, wala pa man siya nipadayag nga modagan siya pagka Presidente. Bitaw, miingon ang Provincial Director sa DILG, nga si Director Bernasor nga dunay importanteng tuyo ang Secretary nako. Hunahuna nako tagaan pud ko niya’g sakyanan kay nag apod-apod man siya’g sakyanan sa mga kapulisan.

Apan, mas mahinungdanon pa gayud diay iyang tuyo, mag Presidente man siya o dili. UBAS diay iyang tuyo nako. Ang UGNAYAN NG BARANGAY AT SIMBAHAN. Kauban ni Sec. Mar Roxas si Gov. Clude Bautista, DILG RD Ananias Villacorta, PCSUPT Wendy Rosario, DILG PD Abito Bernasor.

Kini nga programa nga UBAS sa DILG niadto pang panahon ni Sec. Jesse Robredo. Kini mao ang tinguha sa panggamhanan sa pagdasig sa mga lungsuranon nga mangilabot sa mga kalihokan alang sa kaugmaran sa tanang katawhan – dili lamang isip mga binipisyaryo kon dili kauban ug responsable usab sa katikaran ug kalampusan niining mga kalihokan nga gipundohan sa panggamhan. Sa ingon, angkonon sa mga lungsuranon ang kalihokan ug tabangan nila nga magmalamposon alang sa kaayuhan sa tanan nga mao may gituyo sa maong kalihokan. Diha pa lamang sa Barangay masugdan na ang pagbag-o sa kultura kontra korapsyon. Ug pagtukod sa kultura sa responsable ug manggiangayon nga pagkalungsuranon ug alagad sa katawhan.

Gipangandaman na sa DILG Provincial office ang local concept paper ug mechanisms nga hisgutan unya uban sa mga representante sa Simbahan. Unya ipahigayon ang launching niini sulod niining tuiga.

Panahon sa hiniusang Retreat

Nasayud ba mo nga ang atong mga kaobispohan sa Pilipinas matag unang semana sa bulan sa Hulyo maoy ilang hiniusang panahon sa Retreat kon panahon sa pag-ampo ug pamalandong? Kasagaran adto sila mag-usa og retreat sa Tagaytay, sa Betania Retreat House sa mga RVM Sisters. Sa maong paagi nangandam sila alang sa ika-2 nilang panagtigom sa tuig. Ang unang panagtigom sa bulan sa Enero.

Ato silang iapil sa atong mga pag-ampo niining semana aron makapaminaw sila og pag ayo sa tingog ug lamdag sa Spirito Santo sa angay nilang tagdon ug tubagon sa padayon nilang pagpangalagad isip mga magbalantay sa Simbahan dinhi sa Pilipinas, duyog sa pagpangalagad ni Papa Francisco sa tibuok Simbahan.