Abp Valles: ‘Maningamot ta sa atong pagtoo’

ANG GKK mao ang katumanan sa simbahanong panglantaw sa Vatican II—usa ka katilingbang naghiusa ug nagapadayon sa Misyon isip Katawhang Propeta, Pari ug Hari, ug Simbahan sa Kabus. Busa, ang kada tuig nga selebrasyon sa kasumaran, halangdon.

Mao na nga gikalipay pag ayo sa mga taga San Antonio de Padua GKK, Matina ang ika-50 niini nga kapistahan.

Matud pa ni sa PSK nga si Salome Realista, usa ka grasya ug dungog na kaniya ang iyang ika-5 ka tuig isip Pangulo ug nga nakaabot siya sa ika 50. Kini giuyunan ni Rehinda Yba, asawa sa miaging PSK. Gikalipay niya nga nakaabot siya sa golden anniversary sa iyang GKK ug nasaksihan ang pagkahiusa sa mga residente. Nakigduyog usab ang mga opisyales sa barangay ug congressional district.

Sa Misa nga gipangunahan ni Abp. Romulo G. Valles, gipasabot niya ang katuyuan ug importansya sa GKK. “Sama sa GKK, sama sa classroom nga gagmay’g sulod, mag study jud ta ani pagkagabii kay makarecite jud tanan. Makalihok ang tanan, pamati jud nato nga ato ni nga Simbahan. Mao na’y tuyo sa GKK, sayon sa ato ang pagpamati.”

Gihagit ni Abp. Valles ang tanan, nga muapil sa mga aktibidad.

“Nindot ang pagbalik sa ginagmay, ang gapundok-pundok, para aduna’y atmosphere na maningamot kita sa atong pagtu-o,” panapos niya. (Janin Langoy)