Ang Kapistahan sa Santos nga Yukaristiya (Part 2 of 2)

Read Part 1

ANG Santos nga Yukaristiya usa ka Sakramento. Usa usab kini ka sakripisyo nga gitukod Hesukristo. Diha sa Yukaristiya, ubos sa dagway sa PAN ug BINO, ang atong Ginoong Hesukristo anaa gayud, gihalad ug pagadawaton.

Busa ang kinatibuk-ang Kristo anaa gayud, matuod ug presenti diha sa Yukaristiya.

Ang pulong nga “Yukaristiya” nagkahulogan usab ug pagpasalamat o “thanksgiving.”

Sama sa atong nahisgutan, si Hesukristo gayud mismo ang nagtukod niini diha sa katapusang panihapon. Busa ang Simbahan kanunay nagatudlo nga ang Yukaristiya mao gayud ang tinuod nga lawas ug dugo ni Hesukristo.

Kini nga pagtulon-an lisod dawaton sa uban. Apan, kini nga pagtoo ang tinuod nga presensya sa lawas ug dugo ni Kristo (Santos nga Yukaristiya). Diha gayud nagsubay sa mga pulong nga gitudlo kanato mismo ni Hesukristo. Sa ebanghelyo ni San Juan 6:48-57 atong mabasa:

“Ako ang pan nga naghatag sa kinabuhi, ang inyong mga katigulangan nagkaon sa mana didto sa kamingawan, apan nangamatay gihapon sila, ang mokaon sa pan nga gikan sa langit dili mamatay. Ako ang pan nga gikan sa langit nga naghatag sa kinabuhi. Ang mokaon niining pan dili gayud mamatay. Ug ang pan nga akong ihatag mao ang akong unod aron mabuhi ang kalibutan. Ang akong unod mao ang tinuod nga kalan-on, ug ang akong dugo mao ang tinuod nga ilimnon.”

Para kanilang dili modawat sa tinuod nga presensya sa lawas ug dugo ni Kristo, usa lamang kini ka simbolo. Pero kung atong basahon ang nahitabo sa Juan 6:60-66 daghan sa iyang mga tinun-an ang nakadungog niini ug miingon, lisod kaayong dawaton kining pagtulon-ana. Tungod niini, daghan sa iyang mga tinun-an ang mibiya ug wala na gayud mokuyog kaniya.

Si San Pablo miingon, “busa ang mokaon sa Pan sa Ginoo ug moinom sa iyang kupa sa paagi nga dili takus, nakasala batok sa lawas ug sa dugo sa Ginoo (1 Cor. 11:27), mao nga ang Simbahan ni Kristo kanunay gayud nagapahimangno sa tanang magtotoo nga modawat kita niini hinlo ug takus gayud sa atong kinabuhi. Busa adunay dakong bili sa atong Kristohanong kinabuhi kining Santos nga Yukaristiya sanglit kini mao man ang pinakataas ug sentro sa tanang Sakramento.